L'uomo nell'ombra
|
C'l artìcul chè 'l è scrit in
Miranduléś |
 The Ghost Writer
| ||
| L'uomo nell'ombra | ||
 Ewan McGregor in na figùra dal film | ||
| 'L óm in dl'òra 2010 | ||
|---|---|---|
| Regìa: Roman Polański | ||
| Scritōr: Robert Harris • Roman Polański | ||
| Atōr: Ewan McGregor • Pierce Brosnan • Kim Cattrall Olivia Williams • Timothy Hutton • James Belushi | ||
| Müsica: Alexandre Desplat | ||
| Léngua: Ingléś | ||
| Dürä dal film: 128 minüt | ||
| Nasiōṅ: Régn Unî • Frància • Germàgna | ||
L'uomo nell'ombra (’L óm in dl'òra) 'l è 'n thriller dal 2010 ad Roman Polański trat da 'l rumànś „Al ghostwriter“ ad Robert Harris. La pelìcula l'è stada preśentàda a 'l 60śum Fèstival ad Berlîṅ in dua l'à purtâ a cà 'l „Órs 'd Argìnt“ par la regìa. Al persunàǵ 'd Adam Lang 'l è stâ scrit pinsànd a 'l prim minìst'r ingléś Tony Blair.
Custâ quarànta-sinc migliòṅ ad dòlar, al 'n à pò purtâ a cà da piò ad ssanta.
Sunt
Quànd Mike McAra, al ghostwriter d'l ex prim minìstar dal Régn Unî Adam Lang (Pierce Brosnan), al vèṅ catâ mòrt andgâ, tut i pèns'n a na daśgràsia anc parchè lì lò 'l iva bvû dimóndi cla nòt lè. A 'l sò pòst a in vèn tòlt 'n àt'r ad Lóndra (Ewan McGregor) par finìr la sò biugrafìa. L'asistènta e amànta dal pulìtig, l’Amelia Bly (Kim Cattrall), la gh fà catàr al manuscrìt minga incóra finî ma la gh diś ciàr e tónd che par di mutìṿ ad sicurésa nasiunàł al lìbar al n gh'à mia da finìr fóra da la vila che Lang al gh'à in dl'ìśula ad Martha's Vineyard a 'l lârg dal Massachusetts.
A sucéd però che 'l óm pulìtig, pròpria in chi dè lè, al vèṅ incriminâ da la Cōrt Penàla Internasiunàla dl'Aia p'r avér dâ 'l sò parmés a 'l rapimènt ad quàtar terurìsta 'd Al-Qaida da part dla CIA che pò al i à turturâ faghénd-an murìr òṅ. Al sò vèć minìstar d'l èstar, Richard Rycart (Robert Pugh), al diś ch'l è tut véra e acsè 'l al mét incóra da piò in di guàj. Tgnénd adrē a i cunsìli dal sò avucàt Sidney Kroll (Timothy Hutton), Adam al decìd 'd armàgn'r in di Stat Unî parchè i americàṅ i n arcgnósan minga al deciśiòṅ dla Cōrt.
'L editōr dal lìbar, John Maddox (James Belushi), naśànd 'l udōr di bèsi, al vrév ch'al vgnis fóra subìt in dal gir ad dū stmani e al mét présia a 'l ghostwriter. Chi lò però al capìs ch'a gh'è quèl ch'a traśa parchè Lang al s éra iscìt a 'l Partî Laburìsta dū an prima 'd cgnósar sò mujér a l'università 'd Cambridge, la Ruth (Olivia Williams), mént'r in dal lìb'r a s cònta ch'l'éra stada lē a cunvìns'r-al a far al sò ingrès in pulìtica, e pò un vèć dal pòst al gh diś ch'l è impusìbil ch'la curènt l'àppia purtâ 'l cadàvar pròpria lè.
Al scritōr al và a far dal dmandi a 'n prufesōr universitàri americàṅ che Mike 'l iva incuntrâ al dè ch'l è mòrt, Paul Emmett (Tom Wilkinson). La sò ghigna la s véd davśèṅ a qvéla 'd Lang in na foto vècia da i tèmp dla scōla lugàda in un casét da Mike. Da drē a gh'è 'l nùm'r ad telèfun ad Rycart, minìstar licensiâ pròpria da Adam quànd 'l éra a 'l guèran.