Rosemary's Baby - Nastro rosso a New York

Da Wikipedia.

C'l artìcul chè 'l è scrit in Miranduléś Emiliàn

Rosemary's Baby
Rosemary's Baby - Nastro rosso a New York

La Ruth Gordon e la Mia Farrow in na figùra dal film
Al putèṅ dla Rosemary - Nàstar rós a New York
1968
Regìa: Roman Polański
Scritōr: Roman Polański • Ira Levin
Atōr: Mia FarrowJohn CassavetesRuth Gordon
Sidney BlackmerMaurice EvansRalph Bellamy
Victoria VetriPatsy KellyEmmaline Henry
Müsica: Krzysztof Komeda
Léngua: Ingléś
Dürä dal film: 168 minüt
Nasiōṅ: Stat Unî


«
Dgî na préga p'r al putèṅ dla Rosemary.»
(Tagline dal film)


Rosemary's Baby - Nastro rosso a New York (Al putèṅ dla Rosemary - Nàstar rós a New York) 'l è 'n film ad scarésa dal 1968 ad Roman Polański trat da 'l rumànś umònim 'd Ira Levin. 'L è stâ bòṅ ad vìnsar dū Prèmi Òscar par la senegiadùra minga uriginàla a Roman Polański e par l'atōra minga prutagunìsta a la Ruth Gordon cun chi lē ch'la s è purtàda a cà anc al Golden Globe.

In Itàglia 'l è vgnû fóra in di cìnema in dla vigìglia ad Nadâl. Custâ sōl tri migliòṅ e dū ad dòlar, al 'n à pò fat sù da piò ad trénta-tri.

Sunt

Guy Woodhouse (John Cassavetes) e sò mujér Rosemary (Mia Farrow) i èṅ na còpia śōvna ch'la pésca cà a New York. Lò al fà 'l atōr a teàtar e na quàlc reclàm, lē invéci l'à péna tòlt al diplòma. I càtan 'n apartamènt grand in un palàs elegànt in dua i gh staṅ sōl di vèć cuma i vśèṅ Roman (Sidney Blackmer) e la Minnie Castevet (Ruth Gordon). Chi lōr dū i faṅ subìt amicìsia c'n i dū śpóś e i gh śibìs'n ad pasàr na sira a séna da lōr. 'L è sōl 'l inìsi parchè pò i càtan sèmpar dal scuśi par far-as vèrar 'l us o p'r invidàr-i incóra a magnàr a cà sua. Un dè la Minnie la rigàla a la Rosemary na cadnìna cun na bucìna impinìda 'd èrbi che lē la diś ch'i pòrtan bòṅ.

In chi dè lè la caréra ad Guy la ciàpa 'l vōl parchè 'l atōr ch'al gh'iva fargâ na part impurtànta 'l armàgn òrub e acsè qvi là i sarnìsan lò a 'l sò pòst. Guy, cuntènt dimóndi, al fà savér a sò mujér ch'al vōl avér un putèṅ sèg e 'l à anc decìś quànd, i gh'àṅ da far-al a la fiṅ ad Setémbar. Quànd tut 'l è prònt p'r andàr a lèt a far 'l amōr, dòp na séna a 'l luśōr dal candéli, a sòna 'l campanèl: l'è la Minnie ch'l'à preparâ un dōls par l'ucaśiòṅ. Dòp che la ragàsa la 'l à magnâ, anc s'al gh fava schiva, la gh'à 'n mancamènt e sò marè al la mét a punsàr a lèt. Durànt la nòt la Rosemary la gh'à di arbgàt, cun lē misa in mèś a 'n saba infernàł.

La matìna dòp Guy al gh cònta ch'al l'à ciulàda listés anc se lē l'iva pardû i sèns, giùst p'r al fat ch'al vliva al putèṅ dabòṅ. Al prufesōr Hill (Charles Grodin), al sò ginecòlug, al gh cunférma ch'l'è gravda e ch'al putèṅ al nas'rà al 28 ad Śugn. Guy, cuntènt cuma na Pàsqua, al và a cuntàr incòsa a i Castevet ch'i rìvan subìt in cà sua par festegiàr. La Minnie la cunsìlia a la Rosemary ad cambiàr ginecòlug e ad tōr al dutōr Sapirstein (Ralph Bellamy) ch'l è al più brâṿ in sla piàsa. Malvluntéra lì lē la diś ad sè.

Culegamènt estéran