The Cure

Da Wikipedia.

Vai a: navigazione, Zerca

C'l artìcul chè 'l è scrit in Miranduléś

«

And I laugh as I drift in the wind blind dancing on a beach of stone, cherish the faces as they wait for the end, a sudden hush across the water and we're here again. And the sand and the sea grows, I close my eyes move slowly through drowning waves going away on a strange day.»

(EN)(A strange day, 1982)

«

E a rid mènt'r al vènt òrub al m pórta sèg balànd su na spiàgia ad giaròṅ, a tégn in dal cōr i vólt ch'i spètan la fiṅ, un silènsi impruvìś in mèś a l'aqua e a sém incóra chè. E la sàbbia e al mar i crésan, mè a sèr i òć muvénd-um piaṅ dèntar a gl'óndi ch'i m négan, mént'r a vag via in un dè straṅ.»

The Cure (La cura) 'l è al nóm 'd un grup muśicàl ingléś post punk, ch'l à eśurdî in dal 1976, durànt 'l éra New Wave, in cumpagnìa ad band cuma Joy Division, Bauhaus, Sisters of Mercy, Cocteau Twins e Siouxsie and the Banshees.

I Cure live in dal 2004

La band, la cui furmasiòṅ l'è cambiàda da spés in dal córs di an e la gh'à abû da un mìnim ad du ad un màsim ad siée elemént, l'à tucâ al punt più grand dal sucès in di an Utanta, cun i sìngui Close to Me e Lullaby. Robert Smith, cantànt, chitarìsta, autór di tést e fundadór dal grup, 'l è 'l ùnic mémbar c'l à sémpar fat part di Cure.

I Cure i èṅ dimóndi spés mis incòst a i gènar gothic rock e dark, par via dla lór figùra trista e decadénta, specialmènt in di prim an Utanta quand i aṅ muciâ sù part dla lór pupularità par méś ad 'l àlbum Pornography, véra préda migliara dal gènar. Robert Smith però 'l à sémpar respint cla definisiòṅ lè, diśénd ch'i Cure i n è mai stâ goth.

«

'L è dimóndi trist quand «goth» al cuntinua a èsar tacâ al nóm «The Cure». Nuàtar a n sém minga clasificàbii. Cuma pō't descrìvar un grup ch'l à fat gnir fóra 'n àlbum cuma Pornography e anc Greatest Hits, in dua tut al cansòṅ i èṅ andàdi dèntar in di Top Ten ad tut al mónd? Mè a sòṅ sōl la mùśica di Cure, quéla ch'a sia.»

(Robert Smith al dascór su la definisiòṅ dal supòst gènar muśical di Cure)

Biugrafìa

I prim an (1976-1982)

Robert Smith, leader indiscùs dal grup, al nas a Blackpool in dal Lancashire, al 21 'd Avrìl dal 1959, ma al crés a Crawley in dal West Sussex. Da pìcul al vliva dvintàr un scritór e 'l iva garantî ch'al s sarév masâ prima ad cumpìr 25 an, ma pò al s è curèt dgénd:

«

A-j-ò capî ch'a gh 'l ò cavàda a far quèl in cla vita chè e quést al m à dâ na carga nóva. A m sènt più cuntènt. Al mè visi più brut 'l è quél ad bévar tròpa bira.»

(Robert Smith al śmintìs al sò inclinasiòṅ a 'l suicìdi quànd 'l éra śóvan)

I sò prim grup i èṅ The Obelisk e i Malice. In dal 1977 al fórma gl'Easy Cure e al dvénta al cantànt (prima a gh'éra Martin Creasy, un giurnalìsta). La banda l'è furmàda da lò a la chitàra, Michael Dempsey a 'l bas, Lol Tolhurst a la baterìa e Porl Thompson, al fradèl dla muróśa ad Lol.

«

Dòp un cuncèrt, a-j-ò girâ a vōd fiṅ tant chè a sòṅ rivâ in dal camarèṅ di Generation X par catàr al gabinét, ma qualchidòṅ a 'l us al m à dit ch'a n psiva minga andàr-ag dèntar. Mè a séra disprâ alóra a-j-ò fat finta ad gnint e a sòṅ andâ dèntar listés e a-j-ò vist Billy Idol in pē contra al pisatòi cun na ragàsa in na puśisiòṅ imbarasànta a basta. Lò al m à fat òṅ di sò ghign famóś ma mè a-j-ò pinsâ: «A n m in fréga gnint, a n vag minga via», acsè a gh sòṅ andâ davśèṅ e a-j-ò tirâ fóra al mè pistulèṅ. Lò al dgiva sōl: «Minga arliàr-at, minga arliàr-at!». Mè a m sòṅ girâ vèrs ad lò e a-j-ò dit: «OK, Billy...» e pò a gh'ò pisâ adòs!.»

(Laurence Tolhurts al cònta cum l'è andada quand 'l à incuntrâ Billy Idol in un cèso in Dicémbar dal 1978)

I nàsan i The Cure

Robert Smith e Jason Cooper durànt un cuncèrt a Praga in dal Favràr dal 2008

In d'l Avrìl dal stés an, la tedésca Hansa Records la fa un cuncórs par catàr di talènt nóṿ e la i mét sóta cuntàt dand-ag mila sterlìni, druàdi par cumpràr i strumènt muśicài e far i prim demo. Però sōl déś méś dòp gl’Easy Cure i vaṅ par cònt suo parchè i éran stuf ad subìr al presiòṅ dla cà discugràfica ch'la vliva sōl dal cover ad braṅ famóś.

«

Pinsànd-ag adès, al lōr interès 'l éra sōl p'r al nòstar look [...]. A n créd gnanc ch'i àppian mai scultâ la nòstra caséta - la gh éra piaśùda sōl la foto!»

(Robert Smith al dascór dla sò esperiénsa cun la Hansa Records)

In Maǵ Porl Thompson al lasa al grup parchè al vdiva ch'al stil muśicàl dal grup 'l éra difarènt ad quél ch'l arév vlû lò. In cal mèntar, ch'i àtar tri i càmbian nóm in The Cure.

La prima publicasiòṅ dla banda, p'r la pìcula cà discugràfica Small Wonder, l'è dal Dicémbar dal 1978. A s trata dal sìngul Killing an Arab (Masànd 'n àrab) e al sò tèst 'l à tòlt ispirasiòṅ dal lìbar Lo straniero 'd Albert Camus. La canta l'à fat sù un muć ad pulèmichi p'r al sò tìtul e, dimóndi vòlti, i Cure i èṅ stâ custrét a far dal dichiarasiòṅ uficiàli par dir ch'a n è minga véra ch'la cansòṅ la gh'à na viśiòṅ rasìsta o viulénta. Purtróp cla giustificasiòṅ chè a n è minga a basta e la cansòṅ la sarà misa a 'l band dal ràddio americàni in dal perìud dòp 'l 11 ad Setémbar e i Cure, par far in manéra ad casàr via al pulèmichi, a gh'è al caś, i n l'aṅ più cantàda in fiṅ a l'Istâ dal 2005, quànd l'è turnàda indrē cun la piò 'lśéra Kissing an Arab.

«

Standing on the beach with a gun in my hand, staring at the sea, staring at the sand, staring down the barrel at the arab on the ground, I can see his open mouth but I hear no sound.»

(EN)(Killing an Arab, 1978)

«

A stag in spiàgia cun na pistóla in dla maṅ, guardànd al mar, guardànd la sàbia, a punt in śò la cana vèrs 'l àrab par tèra, a pòs védar la sò bóca vèrta ma a n sènt gnint.»

Al prim àlbum

Robert Smith piturâ in sal mur

'L àlbum 'd eśòrdi, gnû fóra in dal 1979 par la péna nada Fiction Records ad Chris Parry dla Polydor, al s intìtula Three Imaginary Boys (Tri ragàs imaginàri). I èṅ ciàr fin da subìt i riferimènt muśicài dla banda, a 'l punk e 'l art rock ad David Bowie ma anc i trat minimalìsta e persunài. A s fà nutàr anc la cretìniśia ad So What? (E alóra?), cun un Robert Smith imbariàg ch'a n gh la cava minga a far-as gnir in a mènt gnanc un tèst basta ch'a sia e alóra al lèś a 'l micròfun la reclàm 'd un sèt par la decurasiòṅ dal tórti a partìr da na cunfesiòṅ ad sùcar.

In Śugn i faṅ gnir fóra al secónd sìngul Boys Don't Cry (I ragàs i n piànśan minga) che, insém a 'l canti fati dòp Lullaby e Close to Me, 'l è, a s pōl dar, òṅ di sìngui più cgnusû dal grup.

«

I would break down at your feet and beg forgiveness plead with you but I know that it's too late and now there's nothing I can do so I try to laugh about it, cover it all up with lies, I try to laugh about it hiding the tears in my eyes 'cause boys don't cry.»

(EN)(Boys Don't Cry, 1979)

«

A m butarév a i tò pē e a t dmandarév scuśa par piaśér ma a sò ch'l è tròp tard e a n pòs più far-ag gnint, alóra a próṿ a rid'r-ag sù, lugànd incòsa cun dal buśìi, a próṿ a rid'r-ag sù, lugànd al làgarmi da i mè òć parchè i baghét i n piànśan minga.»

Al méś dòp Robert Smith al regìstra un sìngul cun un grup tirâ sù in cal mumènt, i «Cult Heroes», cun al pustèṅ 'd Horley Frank Bell cuma cantànt e al sò amìg Simon Gallup a 'l bas. Durànt la sesiòṅ ad registrasiòṅ, i s śóntan via via anc Porl Thompson, Janet Smith (ch'l'è pò la surèla ad Robert), e àtar dódas parsòni sèmpar 'd Horley, tuti lè a divertìr-as. Al sìngul I'm a Cult Hero/I Dig You al vénd bèn in Canada: 35.000 còpi.

In cal mèntar i Cure i cuntìnuan a far-'s i ós, sunànd a drē a i Wire, Generation X, The Police e Joy Division. Al 3 'd Agóst dal 1979, in particulàr, Robert Smith 'l incóntra al grup di Siouxsie and The Banshees e a gh fà subìt amicìsia. Quand impruviśamènt a Aberdeen al baterìsta e al chitarìsta di Banshees i mòlan lè al grup, Robert Smith al vèṅ tòlt da Siouxsie (al sècul Susan Ballion) cuma rimpiàs par cuntinuàr al tour.

Dòp la publicasiòṅ, in Nuvémbar, dal tèrs sìngul, Jumping Someone Else's Train (Sfrutànd qualchidòṅ àtar), Dempsey al vèṅ rimpiasâ par Simon Gallup parchè al n gh la cavàva minga a supurtàr 'l ategiamènt autoritàri ad Robert Smith.

'L an dòp, p'r al marcâ americàṅ, a vèṅ publicàda na versiòṅ difarénta d'l àlbum intitulàda Boys Don't Cry cun dèntar i tri sìngui (Killing an arab, Boys don't cry e Jumping Someone Else's Train) e àtar dū braṅ (Plastic passion e World war) al pòst ad Foxy Lady (na cover ad Jimi Hendrix), Meathook e It's Not You.

Al perìud dark (1980-1982)

Simon Gallup

Cun 'l ingrès ad Gallup e dal tasterìsta Matthieu Hartley (ex-Magspies cuma Simon), i tóṅ i sa scurìsan, incanalànd-as in dal melancónic Seventeen Seconds (Darsét secónd, 1980).

«

Mè e Simon a séraṅ càrag parchè l'éra par nuàtar la prima vòlta in studi. Par Robert e Lol l'éra cumpàgn parchè i psiva far quèl ad difarènt - A dir-la tuta, ninsòṅ 'l éra d'l umòr ch'a s sènt in dal disc ch'l è trist a basta.»

(Matthieu Hartley in sla registrasiòṅ d'l àlbum Seventeen Seconds)

'L ùnic sìngul tirâ fóra da 'l àlbum 'l è A Forest, un clàsic dal grup sunâ sémpar in di cuncèrt e cun un vìdeo da i tòṅ dimóndi scur e claustrufòbic. Anc chi atri canti (cuma M, Play for today, At night, In your house o la title track) i èṅ pini ad cl'atmusféra lè pina dna tristésa dastacàda.

«

Sunk deep in the night I sink in the night, standing alone underneath the sky I feel the chill of ice on my face, I watch the hours go by, the hours go by.»

(EN)(At night, 1980)

«

Sprufundâ in dla nòt a vag śò in dla nòt, stand da par mè sóta al cēl a sènt al fréd dal giàs in sal gnugn, a guard gl'óri pasàr via, gl'óri pasàr via.»

A cal punt lè, i Cure i ìvan bèla tacâ a giràr p'r al mónd in tour: Europa, Stat Unî e Austràglia. Na vólta turnâ a cà però Smith, Gallup e Tolhurst i s réndan cònt che Hartley a n è più adàt a restàr in dal grup e acsè al tastérista al và via.

Robert Smith a Singapór in d'l Agóst dal 2007

'L è acsè che i Cure i s càtan incóra in tri quand 'l è óra 'd registràr al tèrs àlbum, Faith (Fèd, 1981), un lavōr incóra più trist e vilî dal precedènt, ch'al dascór dla fèd e dla fidùcia e dal rapòrt che la gint la gh'à sèg.

Dimóndi impurtànt in d'l àlbum 'l è al braṅ trist e melancònic The Holy Hour dedicâ al cantànt di Joy Division, Ian Curtis, ch'al s éra masâ da pòc. Al sìngul 'l è Primary ch'l'è stada sunàda in présia par far in manéra ch'a gh fus quèl ch'a s dastachìs un pôc dal rèst, in manéra da psér èsar trasmìsa a la ràddio. The funeral party, The drowning man o All cats are grey i n psiva minga èsar sarnìdi cun cal scòp lè.

«

She stands twelve feet above the flood, she stares alone across the water, the loneliness grows and slowly fills her frozen body sliding downwards. One by one her senses die, the memories fade and leave her eyes, still seeing worlds that never were and one by one the bright birds leave her.»

(EN)(The drowning man, 1981)

«

Lì lē la stà dódas pē in sima a i flut, da par lē la guarda in mèś a l'aqua, la sulitùdin la crés e piaṅ piaṅ l'impinìs al sò còrp ślâ mèntar al śbliśga vers al bas. Oṅ a òṅ i sò sèns i móran, i ricòrd i sparìsan e i làsan i sò òć ch'i cuntìnuan a védar di mónd mai eśistî e òṅ a òṅ i luśènt uśèi i la làsan lè.»

I Cure i sònan a Iommla in dal 2004

In dla versiòṅ in caséta, al lât B al gh'à dèntar 'l inèdit Carnage Visors, un braṅ lung e strumentàl rigistrâ da Robert Smith par la culóna sunóra 'd un curtumetràǵ ad Ric Gallup, fradèl ad Simon. Carnage Visors 'l è stâ mis dèntar recentemènt in dla versiòṅ deluxe ad Faith.

In dal 1982 i Cure i faṅ gnir fóra Pornography (Purnugrafìa), al tèrs e ùltim àlbum ad na trilugìa ideàla tacàda cun Seventeen second. Però 'sta vòlta al disc 'l è scur fórt e pesimìsta, pîn 'd ràbbia (Lol al martèla a fónd cun la sò baterìa) e disperasiòṅ.

«

Al nichilìśum 'l iva tòlt al cuntròl, a cantavàm: «A n s in fréga gnint s a murém tut». E 'l éra propria quél ch'a pinsavàm in alóra»

(Robert Smith al dà al sò parér su Pornography)

Al sìngul 'l è The hanging garden ma i s faṅ nutàr anc One hundred years (ch'la dascór dla guèra), The figurehead, Cold e A strange day, la stòria 'd 'n óm ch'al s dà la mòrt decidénd 'd andgàr-as in un dè straṅ.

«

Stroking your hair as the patriots are shot, fighting for freedom on the television, sharing the world with slaughtered pigs, have we got everything? She struggles to get away. The pain and the creeping feeling, a little black haired girl waiting for saturday, the death of her father pushing her, pushing her white face into the mirror, aching inside me and turn me around, just like the old days, just like the old days. Caressing an old man and painting a lifeless face, just a piece of new meat in a clean room, the soldiers close in under a yellow moon, all shadows and deliverance under a black flag. A hundred years of blood crimson, the ribbon tightens around my throat, I open my mouth and my head bursts open, a sound like a tiger thrashing in the water, thrashing in the water, over and over, we die one after the other, over and over, we die one after the other after the other. It feels like a hundred years»

(EN)(100 Years, 1982)

«

Ta t lis i cavìi mèntar i partiôt i vènan masâ, cumbaténd par la libertà in televiśiòṅ, sparténd-as al mónd cun i ninét maslâ, gh'ém-j-a tut nuàtar? Lē la s àgita p'r andàr via. Al dulór e la sensasiòṅ ad traśamènt, na baghéta da i cavìi négar ch'la spèta 'l Sàbat, la mòrt ad sò pàdar la la cùcia, la gh stablìs la sò fàcia śbiàvda incòst a 'l spèć faghénd-um dal mal dèntar, e arbaltànd-um pròpria cuma in di dè andâ, pròpria cuma in di dè andâ. Dand na carésa a 'n vèć e piturànd na fàcia sénsa vita, sól un pès ad carna nóva in na cambra pulìda, i suldâ i s davśìnan sóta na luna śala, tuta ómbri e liberasiòṅ, sóta na bandéra négra. Sènt an ad sangṿ crèmas, al nàstar al sa strinś a la mè góla, mè a vèr la bóca e la mè tèsta la sćiòpa, un sòṅ cuma na tigra ch'la s àgita in dl'àqua, la s àgita in dl'àqua, incóra e incóra, nuàtar a murém òṅ a drē a c'l àtar, incóra e incóra, nuàtar a murém òṅ a drē a c'l àtar, i pàran sènt an»

In cal perìud lè, anc par cólpa dal dròghi e dal strès p'r i tròp impégn (Robert al sòna anc par Siouxsie and The Banshees), i rapòrt a 'l intéran dal grup i s fànan sèmpar più téś. Smith a s pìcia cun Gallup durant al Pornography tour e al basìsta al và via finìda la tournée.

Robert, dal cant suo, al s tōś un perìud ad vacansa ma in séguit al dirà che, in cal mumènt lè, i Cure i s éran lasâ ad fat.

Al perìud pop (1983-1986)

Steven Severin

Dòpa la deflagrasiòṅ ad Pornography, Robert Smith, praticamènt da par lò, al registra un braṅ par la rivìsta "Flexipop Magazine" ch'al s intìtula Lament. Al parti di bas i èṅ sunàdi da Steven Severin. A s trata dna cansòṅ ch'la dascór incóra 'd 'n àtar persunàǵ angâ, dopa The drowning man e A strange day.

«

Today there was a tragedy underneath the bridge, a man walked cold and blue into La Ment. The sky coloured perfect as the man slipped away waving with a last vanilla smile.»

(EN)(Lament, 1982)

«

Incō 'l è sucès na daśgràsia sóta 'l pònt, 'n óm 'l è andâ déntar, fréd e trist, a La Mènt. Al cēl 'l iva di culōr parfèt méntar c'l óm lè al śliciàva via faghénd ciào cun 'n ùltim surìś ad vanija.»

Cun i Cure siòlt ad fat, al prudutór Parry 'l incuràgia Smith e Tolhurst (pasâ a sunàr al tastèri) a cambiàr lìnnea, mulànd al dark p'r al pop e par dal cumpuśisiòṅ più alégri. 'L è acsè che i du Cure, insém al turnìsta Steve Goulding, i dan vita a Let's go to bed cun al videoclip girâ par Tim Pope, un regìsta ch'a s legherà a i Cure par dimondi tèmp.

Tra Mars e Maǵ dal 1983, Robert Smith al taca un prugèt paralél, insém al basìsta di Banshees Steven Severin, ciamâ The Glove (Al guant) dand vita al disc psichedèlic Blue Sunshine (Al sól al splénd ad blu) gnû fóra in Setémbar cun i sìngui Like an Animal e Punish Me with Kisses. Purtróp, par cólpa di problèma cuntratuài, Robert Smith al n pól minga èsar al cantànt e al parti vucàli i èṅ òpera 'd Jeanette Landray, la muróśa ad Budgie, baterìsta (e futùr marè) ad Siouxsie. Smith al canta sól in du braṅ: Mr. Alphabet Says e Perfect Murder.

Finìda l'esperiénsa di Glove Smith al cuntìnua a muciàr sù di àtar sìngui cun i Cure: The Walk e The lovecats ispiràda al film ad Walt Disney Gli Aristogatti. Insém a Phil Thornalley al bas e Andy Anderson a la baterìa (Lol 'l è cunfirmâ al tastèri), i Cure i tórnan a far di cuncèrt méntar la Fiction la fa sù i sìngui post-Pornography e l'imbastìs na racòlta ciamada Japanese Whispers (Bacajamènt giapunéś, 1983) ch'la cuntèn na nóva versiòṅ ad Lament e di atri b-sides.

'L an dòp a vèṅ fóra The Top (La sima, 1984), un lavór dimóndi variegâ ch'a véd turnàr in di rang Porl Thompson. Al sìngul 'l è The caterpillar.

«

Dust my lemon lies with powder pink and sweet, the day I stop is the day you change and fly away from me.»

(EN)(The caterpillar, 1984)

«

Da śò la pólvra dal mè buśìi al limòṅ cun dla pólvra dólsa e ròśa, al dè ch'a m férm 'l è al dè ch'at cambi e ch'at vularà via luntàṅ da mè.»

Porl Thompson da 'l viṿ a Róma in dal 2008

I Cure i pàsan anc dal nòstri bandi: al 20 ad Maǵ dal 1984 i èṅ a Bulåggna.

In cal perìud chè Robert Smith a s masa ad fadìga: 'l è incóra mémbar di Banshees (in d'l '84 al dà na maṅ a 'l disc ad Siouxsie Hyaena) e in The top al scriv tut i braṅ, a i sóna anc (Phil Thornalley 'l éra in Austràglia cun i Duran Duran) tulénd da spés dal dròghi.

In Utóbar a vèṅ publicâ al prim disc da 'l viṿ, Concert: The Cure Live trat dal tapi ingléśi dal Maǵ dal 1984 ad Lóndra e Oxford dal «Top Tour». In dal lât B dla caséta, a s pól catàr na versiòṅ ad Forever, na canta ch'i Cure i faṅ impruviśànd sōl da 'l viṿ, cun Smith ch'al s invènta al paròli a 'l mumènt.

Durànt la tournée in Giapòṅ, al baterìsta négar Andy Anderson, alculiśâ pódag, al s buta adòs a chiàtar par piciàr-i ad nòt in 'n albèrg. Naturalmènt al vèṅ anc mandâ via. Al sò pòst a vèṅ tòlt par poc tèmp Vince Ely di Psychedelic Furs e pò, definitivamènt, Boris Williams di Thompson Twins. Sémpar in cal tour lè, Robert Smith a decìd ad mulàr definitivamènt i Banshees e la stésa ròba la sucéd a parti invertìdi cun Phil Thornalley ch'al lasa i Cure par sunàr da par lò. Par rimpiasàr-al, Smith a décid ad ciamàr indrē Simon Gallup (ch'al sunàva in cal méntar cun i Fools Dance). A 'l basìsta al gh và bèṅ acsè e al gh mét definitivamènt na préda in sima.

In dal 1985 i Cure nóṿ (Smith/Tolhurst/Gallup/Thompson/Williams) i pùblican 'n àt'r àlbum The Head on the Door (La tèsta in sima a 'l us) al lór più grand sucès cumerciàl fin lè, cun du sìngui dimóndi famóś anc in Itâglia: Inbetween Days e Close to Me, dal canti vludi apòsta alśéri, cun di vìddeo sèmpar girâ par Tim Pope.

Simon Gallup tòlt śò dal viṿ in dal Śugn dal 2008

Quél 'd Inbetween Days 'l è na viśiòṅ caleiduscòpica, cun di calsèṅ culurâ ch'i bàlan 'd intóran al grup e di culór flórésènt, méntar quél ad Close to Me, in prinsìpi cinsurâ par i mèddia, a véd i cumpunènt dal grup ch'i sónan cun di strumènt ad furtùna (Thompson, par dir-'n una, al sóna un pètan invèci che na tastéra), sarâ in 'n armàri ch'al casca śò da na sima e al finìs in dl'aqua. La part dark dal disc la tóca a A night like this e Sinking.

«

I am slowing down as the years go by, I am sinking. So I trick myself like everyboby else, the secrets I hide twist me inside, make me weake.»

(EN)(Sinking, 1986)

«

A sòṅ drē a 'ndar più piàṅ méntar i an i pàsan, a sòṅ drē a 'ndar a fónd. Acsè a m tóg in gir cuma tut chi àtar, i segrét ch'a lóg i m ródan déntar, i m fiàcan.»

Un pas ulteriór vèrs la selebrità i Cure i 'l fànan cun la racòlta di sìngui Standing on a Beach - The Singles 1978-1985 (Stand in spiàgia - I sìngui 1978-1985) dal 1986 cuntenènt anc Charlotte sometimes, na canta dal 1981 mai misa in 'n àlbum prima 'd alóra, ispiràda al lìbar umónim dal 1969 dla scritóra Penelope Farmer, su na ragasa ch'la viaśa indrée in dal tèmp e la s cata in un córp ad na sò cuetanea dal 1918. Par l'ucaśiòṅ a vèṅ fata na registrasiòṅ nóva ad Boys Don't Cry. La versiòṅ su CD la s intìtula Staring at the Sea (Guardànd al mar) e la cuntèṅ di pes da piò, méntar la versiòṅ su caséta la gh'à anc tuti al B-sides in dal lat B.

«

On that bleak track (see the sun is gone again) the tears were pouring down her face, she was crying and crying for a girl who died so many years before.»

(EN)(Charlotte sometimes, 1981)

«

In cal sintér spòli (guarda al sól 'l è andâ via incóra) al làgarmi i éraṅ drē a śliciàr śò da la sò fàcia, lē l'éra drē a piànśar par na ragasa ch'l'éra morta acsè tant an prima.»

Par selebràr cal perìud lè ad sucès, a vèṅ filmâ al cuncèrt dal 9 'd Agóst al teàtar rumàṅ 'd Orange, in Pruvénsa, distribuî 'l an dòp in di cinéma cun al tìtul "The Cure in Orange".

Madurasiòṅ artìstica e cunsacrasiòṅ internasiunàla (1987-1993)

I Cure dal viṿ in Purtugàl a Liśbóna

Al 5 ad Maǵ dal 1987 a vèṅ fóra al sètim lavōr dal grup ingléś, un disc dópi ad 18 canti ciamâ Kiss Me Kiss Me Kiss Me (Baś-am Baś-am Baś-am). La cupertìna d'l àlbum la móstra un prim piàṅ di làbar ad Smith, piṅ ad rusét 'd un ros ch'al dà a 'l òć in mèś a un sfónd arans viṿ.

«

A s tratàva dla vója ad mandàr śò la gint. L'idéa ad far-i andgàr piutòst che baśàr-i»

(Robert Smith al dascór dla cupertìna ad Kiss Me Kiss Me Kiss Me)

Al disc 'l è dimóndi vari cun di pès rock (The kiss e Shiver and shake), psichedèlic (If only tonight we could sleep e The snakepit), pop (Why can't I be you?) e dark (One more time). Par di prubléma ad spasi, la canta Hey You!!! la n gh'è briśa in dla versiòṅ su CD dal lavōr, ma sōl in sal vinìl e in sla caséta. La s cata però in dla versiòṅ deluxe dal 2006.

A difarénsa di lavōr vèć, in c'l àlbum chè tut i mémbar i aṅ dâ al sò cuntribùt, difàti Icing Sugar e The Perfect Girl i vènan da di idéi ad Simon, Like Cockatoos, Fight e The Snakepit i èṅ stadi scriti da Porl e Boris mèntar A Thousand Hours l'è ad Tolhurst.

In Itâglia quést chè 'l è al secónd disc di Cure ch'a gh la cava a finìr in di prim vint pòst dal clasìfica (13śum). A la fiṅ d'l an al sarà al 54śum disc più vindû dal 1987.

Al vìddeo dal sìngul Just Like Heaven 'l è girâ in dla baja ad Beachy Head (cuma anc Close to Me) ch'l'è dvintàda famóśa tristemènt p'r i tant suicìdi.

In d'l àlbum a gh'è anc na canta ispiràda a Les yeux des pauvres (I òć di pòvar) ad Charles Baudelaire, How beautiful you are.

«

And in the road before us stood a weary greyish man who held a child upon his back, a small boy by the hand, the three of them were dressed in rags and thinner than air and all six eyes were stared fixedly on you. The father's eyes said "beautiful! How beautiful you are!", the boy's eyes said "how beautiful! She shimmers like a star!", the child's eyes uttered nothing but a mute and utter joy and filled my heart with shame for us at the way we are.»

(EN)(How beautiful you are, 1987)

«

E in dla stràda in frònt a nuàtar a gh'éra 'n óm sfinî e griś ch'al tgniva un putèṅ in sla schina, un ragasól par man, tut lór tri i éran vistî 'd stras e più sutìi 'd l'aria e i lór siē òć i t fisàvan. I òć dal pàdar i dgìvan "Bèla! Cum at sē bèla!", i òć dal ragàs i dgìvan "Che bèla! La splénd cuma na stéla!", i òć dal putèṅ i n dgìvan gnint, sól na cuntintésa pina e muta, e i m impinìvan al cór ad vargóggna par cum a sém nuàtar.»

Al tasterìsta Roger O'Donnell

Cun c'l àlbum chè, preśentâ cun un tour mundiàl, i Cure i tàcan a far part definitivamènt ad 'l Olimpo muśicàl, méntar i fans i rìvan a di livèi 'd isterìśum mai vist. A Bruxelles, durànt al cuncèrt dal prim ad Nuvémbar, a s śònta 'n àtar mémbar, al tasterìsta Roger O'Donnell, tòlt sù par rimediàr al carénsi ad Lol, sémpar da piò inmisćiâ cun di prubléma 'd alcol. Al Kiss me tour al tóca anc 'l Emiglia-Rumàggna: al 29 and Nuvémbar dal 1987 i Cure i èṅ a Mòdna.

I Cure i tórnan preputentemènt al dark in dal Maǵ dal 1989 cun 'l àlbum Disintegration (Diśintegrasiòṅ), sèmpar prudót par la Fiction Records, un disc ad grand sucès cumerciàl (difàti 'l è stâ 'l prim di sò disc a entràr in di prim déś pòst in dla calsìfica itagliàna, tucànd al sètim pòst) cun al sìngul Lullaby lanciâ in tut al mónd par méś 'd un video inquietànt in dua Robert Smith, culgâ a lèt, al s impinìs via via ad tlarédi e pò al vèṅ magnâ da 'n ragnàs.

'L àlbum al misćia egregiamènt di braṅ rock, adàt a i cuncèrt (cuma Fascination street e Disintegration), di braṅ più persunài e intimìsta (cuma Plainsong, Pictures of you, Closedown e Homesick) a quéi più propriamènt dark (Prayers for rain e The same deep water as you).

In dal vinìl, i braṅ Last dance e Homesick i n gh'ènan minga par di mutìṿ ad spasi.

«

Al téma ad mólti ad cal cansòṅ chè, che dimóndi i càtan deprimènt, 'l è sól quél ad dvintàr vèć: quél ch'a sucéd quand a s mucia sù di an, a n cavàr-gh-la minga a sintìr al ròbi cun la stésa intensità, e cal sèns custànt ad pèrdida»

(Robert Smith al ciarìs al téma purtànt ad Disintegration)

Lol Tolhurst (in sla sinìstra) insém a 'n sò fan cun la maja ad Siouxsie adòs

Durant al registrasiòṅ, Laurence «Lol» Tolhurst al vèṅ luntanâ dal grup sénsa però èsar rimpiasâ. In dal disc però al figùra cuma sunadōr 'd „àtar strumènt“, tant par dir ch'al sò lavōr 'l è stâ praticamènt nul.

In séguit, in dal 1994, Tolhurst (ch'l iva furmâ in cal méntar i Presence e fat gnir fóra sōl un disc, Inside) al farà n'asiòṅ legàla in di cunfrónt ad Smith par 'l utilìś dal nóm dal grup ma al perdarà la càuśa.

«

I never said I would stay to the end, I knew I would leave you with babies and everything, screaming like this in the hole of sincerity, screaming me over and over and over. I leave you with photographs pictures of trickery, stains on the carpet and stains on the memory, songs about happiness murmured in dreams when we both of us knew how the end always is.»

(EN)(Disintegration, 1989)

«

a n ò mai dit ch'a sarév rimast fiṅ a la fiṅ, a saìva ch'a t arév lasâ cun i putèṅ e tut al rést, gridànd acsè vers 'l imbròj dla sincerità, gridànd-um adòs sèmpar da piò. A t las cun al fòto, spèć d'l ingàn, maci sul tapē e maci in dla memòria, canti ad cuntintésa bacajàdi in di sógn quand tut i du a saìvam cuma al ròbi i finìsan sémpar.»

Dòp al grand sucès mis in bisàca cun Disintegration, Smith al spiàsa tut faghénd gnir fóra na racòlta ad braṅ rimixâ, Mixed up, cun 'l inèdit Never enough in cóa.

«

There was nothing in the world that I ever wanted more than to feel you deep in my heart, there was nothing in the world that I ever wanted more than to never feel the breaking apart all my pictures of you.»

(EN)(Pictures of you, 1989)

«

A n gh'éra gnint al mónd ch'a 'ppia mai vlû da piò ad sintìr-at in dal prufónd dal mè cór, a n gh'éra gnint al mónd ch'a 'ppia mai vlû da piò ad sintìr minga sćiancàr-as mai tut al mè fòto ad tè.»

un Robert Smith suridènt

In dal 1992 i Cure i pùblican Wish (Deśidèri), al lór secónd àlbum ch'a finìs diretamènt in dla top ten itagliàna (nùmar òṅ in Gran Bretaggna e nùmar du in di Stat Unî) e ch'al mét 'd acòrd pùblic e critica. 'L è un disc misć in du a s pól catàr dal traci preggni ad malincunìa (Apart e To wish impossible things) ma anc alégri e scansunàdi cuma High, Doing the unstuck e Friday I'm in love, una dal canti più cgnusùdi dal grup. Al rock 'l è preśènt in Cut, End e Open, un braṅ devastànt ch'al gh'à un tèst dimóndi trist parchè al dascór dla depresiòṅ.

«

I can't take it anymore, this it I've become this is it like I get when my life's going numb, I just keep moving my mouth, I just keep moving my feet, I say I'm loving you to death like I'm losing my breath and all the smiles that I wear and all the games that I play and all the drinks that I mix and I drink until I'm sick and all the faces that I make and all the shapes that I throw and all this people I meet and all the words that I know, makes me sick to the heart! Oh I feel so tired and the way the rain comes down hard that's how I feel inside.»

(EN)(Open, 1992)

«

A n gh la fag piò, a sòṅ dvintâ cal lavór chè, quést chè 'l è quél ch'a dvént quand la mè vita la s fa tórbida, a pòs sól cuntinuàr a móvar la boca, a pòs sól cuntinuàr a móv'r i pē, a dig ch'a t vurò bèṅ in fiṅ ch'a scamp cuma s'a stis a tór fiâ e tut i surìś ch'a fag e tut i śóg ch'a śóg e tut al bvandi ch'a misć e ch'a bév in fiṅ a star mal e tut al faci ch'a fag e tut al fórmi ch'a tóg e tuta la gint ch'incróś e tuti al paróli ch'a cgnós, i m faṅ star mal chè dènt'r al cór! Oh a m sènt acsè stuf e la manéra che l'aqua la vèṅ śò acsè fòrt, qual lè 'l è pròpria cum a m sènt dèntar.»

Dal Wish tour i Cure i regìstran du àlbum live: Show (Spetàcul) e Paris, tut i du dal 1993. Finî al tour, Thompson e Williams i làsan al grup, rimpiasâ par Roger O'Donnell, ch'al tórna indrē, e Jason Cooper. Par quàt'r an i Cure i n faṅ piò di àlbum ma sól di braṅ spars, dimóndi spés par di culòni sunòri o dal compilation: Purple Haze ad Jimi Hendrix p'r al tribùt Stone free, Burn p'r al film Il corvo (Al còruv), Young Americans ad David Bowie par la compilation 104.9 XFM.

I an recènt (1994-incō)

Simon Gallup (Singapór 2007)

In dal 1996, dòp quàt'r an, a vèṅ fóra finalmènt al nóṿ àlbum 'd inèdit ad studi, Wild mood swings (Śbals 'd umór selvàdag). Pîn ad ridm e meludìi latinegiànti (cum al prim sìngul The 13th cun Robert Smith a lèt cun un travestî), al disc al spiasa e al delùd in gran part i fans più vèć ma 'l in càta anc di nóṿ.

Dal punt ad vista di tèst, quést chè 'l è 'n àlbum dimóndi fòrt, òṅ di mijór di ùltim tèmp: 'l è ispirâ in manéra ciàra a di esperiénsi persunàli (Strange Attraction o Want) o di sentimènt ch'a s prova ad èsar in un grup muśicàl par tant an (Club America, Round & Round & Round e Return).

«

I'm always wanting more, anything I haven't got, everything I want it all I just can't stop. Planning all my days away but never finding ways to stay or ever feel enough today, tomorrow must be more.»

(EN)(Want, 1994)

«

A-j-ò sèmpar vlû da piò, tut al ròbi ch'a n gh'ò minga, a vój tut, a n gh la cav propria a muclàr-la. A fag i mè piàṅ tut i dè ma a n cat mai la manéra ad fermàr-um o ad sintìr-'m a pòst incō, dmaṅ a gh'à da èsar méj.»

Ma cun 'l andàr in avanti dal tour, al fiàsc cumerciàl d'l àlbum e dla stésa tournée, mis insém al sèns ad ripiegamènt che Robert Smith al sènt bèla da soquànt an, i s fànan sintìr sèmpar da piò.

'L an dòp la Fiction la fà gnir fóra la secónda racòlta di Cure, Galore - The Singles 1987-1997 cun i sìngui muciâ sù da Kiss me kiss me kiss me a Wild mood swing, cun da piò 'l inèdit Wrong number.

«

Quietly he laughs and shaking his head creeps closer now closer to the foot of the bed and softer than shadow and quicker than flies, his arms are all around me and his tongue in my eyes! “be still be calm be quiet now, my precious boy, don't struggle like that or i will only love you more for it's much too late to get away or turn on the light, the spiderman is having you for dinner tonight”.»

(EN)(Lullaby, 1989)

«

Silensióś lò al rid e squasànd la tèsta al strìsia piò davśèṅ al pē dal lèt piò lśèr ad l'òra e piò śvélt dal móschi, i sò bras i m èṅ intóran e la sò lèngua in di mè òć! “stà férum stà càlum stà tranquìl, mè ragasól presióś, minga agitàr-at acsè o a t vurò bèṅ incóra da piò parchè 'l è trop tard par scapàr via o impisàr la luś, 'l óm ragn 'l è drē a ciapàr-at par séna stanòt”.»

I Cure i sònan a Roma in dal 2008

Robert Smith, però, a n vól minga butàr via la spuggna, dòp al mèś falimènt ad Wild Mood Swings, e acsè al taca a lauràr p'r al nóṿ àlbum. A 'l inìsi soquànt demo i van in dla diresiòṅ dal rock eletrònic e dimóndi péś ma dòp a gh vèṅ na śvòlta soft-acùstica e al riśultàt 'l è Bloodflowers (Fiór ad sangṿ, 2000), cun i braṅ ad punta Maybe Someday e Out of This World. Smith al cunsìdera al disc, numinâ cuma Wish par un Grammy Award in dla categurìa "Best Alternative Music Performance", cuma part ad n'ideàla "trilugìa gòtica" tacàda cun Pornography e purtàda avànti cun Disintegration.

Na versiòṅ rimixàda dal braṅ Watching me fall la s cata in dla culóna sunóra dal film American Psycho ad Mary Harron cun Christian Bale.

«

Yeah, I've been seen stripped to the bone in the mirror on the wall, seeing her swallow it whole like its not me at all, she holds out her hands and I follow her down to my knees and the sucking inside, insatiable smiles, you will forget yourself in me.»

(EN)(Watching me fall, 2000)

«

Propria acsè, a sòṅ stâ cavâ śò in fiṅ a i òs in dal spèć in dal mur, guardànd lì lē mandàr-al śò p'r intér cuma s'a n fus gnanc mè, lē la sténd al sò maṅ e mè a la tégn 'd òć śò in si śnòć, ciuciâ dèntar, la rid e la n gh 'n à mai a bàsta, ta t daśmingherà dèntar ad mè.»

Bloodflowers al gh'à un bòṅ sucès tra i crìtic ma al vénditi i làsan a deśideràr anc se 'l enérgic "Dream Tour" al rivitàliśa 'l impégn dal cantànt in di cunfónt dal grup.

Robert Smith e Jason Cooper

In dal 2001 i Cure i pùblican n'àtra racòlta Greatest Hits ch'la sancìs 'l abandòṅ par sèmpar a l'etichéta Fiction. Al disc al gh'à du canti nóvi Cut here e Just say yes.

«

Suddenly I stop but I know it's too late, I'm lost in a forest all alone. The girl was never there, it's always the same, I'm running towards nothing, again and again and again.»

(EN)(A forest, 1980)

«

A 'l impruvìś a m férum ma a sò ch'l è tròp tard, a m sòṅ pers in na furésta da par mè. La ragasa la n gh è mai stada, l'è sémpar cumpàgn, a sòṅ drée a cùrar vers al gnint, incóra e incóra e incóra.»

In dal 2003 i Cure i tàcan a lauràr al nóṿ àlbum par la Geffen insém a Ross Robinson (prudutór di Korn e Slipknot) e in dal 2004 a vèṅ publicâ The Cure ch'al gh'à un sòṅ generalmènt pop ma anc di pès dur cuma Lost e The promise. Al disc a s difarènsia da i lavór precedènt p'r èsar piutòst vari e al mucia sù un discrét sucès cun al braṅ The end of the world sarnî cuma prim sìngul. I braṅ cumpòst durànt la sesiòṅ dal disc e minga mis dèntar a The Cure i s pólan catàr cuma b-sides di sìngui.

«

I can't find myself in the soul of this stranger in love, no control over one to the other under faded setting sun and I don't know where I am. Should he beg her to forgive? So happy and so young and I stare as I live out the story of a stranger in love, waking up going on in the other world that spins around undone and I don't know where I am. Should she really say goodbye?»

(EN)(Lost, 2004)

«

A n m cat minga in dl'anma ad cal furastér chè inamurâ, gnanc un cuntról d'l òṅ su c'l àtar sóta 'l śbiàvad sól al tramónt e a n sò minga in du a sia. Gh'iva'l da dmandàr-'g a lē ad perdunàr-al? Acsè cuntènt e acsè śóvan e mè a guard mèntar a viṿ a l'aria vèrta la stòria 'd un furastér inamurâ, daśdar-as andànd avanti in 'n àtar mónd ch'al gira intóran e a n sò minga in du a sia. Gh'arév-la da mulàr-al dabòṅ?»

Al canàl televiśiv MTV a i sèlebra cun un speciàl preśentâ par Marylin Manson ciamâ MTV Icon cum éra bèla sucès prima par di àtar grup quai Aerosmith e Metallica. Durànt la traśmisiòṅ a s fa rivìvar la carèra dal grup e di àtar cantànt cuma Deftones e Blink 182 i càntan i lór braṅ.

Porl Thompson durànt un cuncèrt in Śvèsia in dal 2007

In dal Maǵ dal 2005, Robert Smith al licensia O'Donnell e Bamonte, parchè a gh'è al caś ch'a gh interesìs andàr drē a na diresiòṅ difarènta arciamànd indrē Porl Thompson ch'l iva sunâ in cal mèntar cun i Led Zeppelin. In dal Setémbar dal 2005 a vèṅ fóra al film Se solo fosse vero (Se sól a fus véra) cun Mark Ruffalo e Reese Witherspoon. In dla culòna sunóra a s cata la cansòṅ Just like heaven anc parchè al tìtul uriginàl dal film al gh'à al stés nóm.

«

Daylight licked me into shape, I must have been asleep for days and moving lips to breath her name, I opened up my eyes and found myself alone alone, alone above a raging sea that stole the only girl I loved and drowned her deep inside of me.»

(EN)(Just like heaven, 1987)

«

la luś dal gióran la m à mis in sèst, a gh'ò 'd èsar rimàst indurminsâ par di dè e, muvénd i làbar par suspiràr al sò nóm, a-j-ò vèrt i òć e a m sòṅ catâ da par mè in sima a un mar in tempésta ch'al m'à tòlt la sóla ragasa ch'a 'ppia mai amâ e a l'à 'ngada prufundamènt dèndar ad mè.»

In dal 2008 i Cure i pùblican al lór tredicéśum àlbum ad studi intitulâ 4:13 Dream (4:13 Sogn) ch'al cuntèṅ trédas braṅ e un pugn ad bòni cansóni: l'atmusfèrica ouverture 'd Underneath The Stars, al carsénd sinìstar ad The Scream, la rabìda It's Over e al pop traśversàl ad Sleep When I'm Dead e Freakshow, in dua Thompson al pómpa i sò wah wah 'd efèt.

Prima ch'a gnis fóra 4:13 Dream, al grup 'l iva decìś ad publicàr bèṅ quàtar sìngui (The Only One, Freakshow, Sleep When I'm Dead e The Perfect Boy), un al méś al 13 ad tut i méś, con na mòsa cumerciàla inisialmènt mandàda śò a fadìga da la lór etichéta, la Suretone Records, sucursàla dla Geffen. Chi braṅ chè i aṅ abû un sèrt sucès in Spaggna e in di Stat Unî.

«

It only takes a second but the second lasts forever, close your eyes and let me take you down and I get up and it's over, it's always fucking over, it's raining and I'm wrecked and it's late and you're. No, I can't remember anything I did or said or how I lost another life.»

(EN)(It's over, 2008)

«

A gh vól sól un secónd, ma al secónd al dura par sèmpar, sèra i óć e lasa ch'a t pòrt śò e a m léṿ sù e l'è finìda, l'è finìda 'd un Dio, a pióṿ e a sòṅ distrùt, 'l è tard e tè ta gh sē. No, a n pós ricurdàr gnint ad quél ch'a-j-ò fat o dit o cum a-j-ò pardû n'àtra vita.»

In dal 2011, in ucaśiòṅ d'l aniversàri di trént'an ad Faith, Lol Tolhurst al tórna a sunàr insém a i Cure durànt al spetàcul "The Cure Reflections" a 'l Vivid live festival ad Sidney.

Mémbar

I Cure a Roma in dal 2008

Quéi 'd adès

Robert Smith vóś e chitàra - (1976-incō)
Simon Gallup bas - (1980-1982, 1985-incō)
Porl Thompson saxòfun e chitàra - (1976-1979, 1984-1993, 2006-incō)
Jason Cooper baterìa - (1995-incō)

Ex cumpunènt

Laurence Tolhurst baterìa e tastéri - (1976-1989)
Michael Dempsey bas - (1976-1979)
Matthieu Hartley tastéri - (1980)
Phil Thornalley bas - (1983-1984)
Andy Anderson baterìa - (1983-1984)
Boris Williams baterìa - (1984-1993)
Roger O'Donnell tastéri - (1987-1990, 1995-2005)
Perry Bamonte tastéri, chitàra e bas - (1990-2005)

Discugrafìa

Smith e Gallup i sònan al Radio City Music Hall ad New York al 21 ad Śugn dal 2008

Àlbum

1979 - Three Imaginary Boys Fiction Records
1980 - Seventeen Seconds Fiction Records
1981 - Faith Fiction Records
1982 - Pornography Fiction Records
1984 - The Top Fiction Records
1985 - The Head on the Door Fiction Records
1987 - Kiss Me Kiss Me Kiss Me Fiction Records
1989 - Disintegration Fiction Records
1992 - Wish Fiction Records
1996 - Wild Mood Swings Fiction Records
2000 - Bloodflowers Fiction Records
2004 - The Cure Geffen Records
2008 - 4:13 Dream Suretone Records

dal Viṿ

1984 - Concert: The Cure Live Fiction Records
1991 - Entreat Fiction Records
1993 - Show Fiction Records
1993 - Paris Fiction Records

Racòlti

1980 - Boys don't cry Fiction Records
1981 - Happily Ever After A&M Records
1983 - Japanese Whispers Fiction Records
1986 - Standing on a Beach - The Singles 1978-1985 Fiction Records
1990 - Integration Elektra Records
1990 - Mixed Up Fiction Records
1997 - Galore - The Singles 1987-1997 Fiction Records
2001 - Greatest Hits Fiction Records
2004 - Join the Dots: B-sides and Rarities, 1978-2001 (The Fiction Years) Rhino/Universal Records
2006 - 4 Play Fiction Records

Culegamènt estéran

Estratto da "http://eml.wikipedia.org/w/index.php?title=The_Cure&oldid=70020"