Billy Idol

Da Wikipedia.

C'l artìcul chè 'l è scrit in Miranduléś Emiliàn


«
Last night a little dancer came dancin' to my door, last night a little angel came pumpin' cross my floor, she said “Come on baby I got a licence for love and if it expires pray help from above”. In the midnight hour she cried “more, more, more”, with a rebel yell she cried “more, more, more”.»
(EN)(Rebel yell, 1984)
«
Ajér 'd nòt na balarìna l'è gnuda a la mè pòrta, ajér 'd nòt 'n angiulét al s è arbatû mèg in dal mè piâṅ, la m à dit “dai-mò teśòr, a gh'ò al parmès 'd amàr e s'al scad at gh'arà da dmandàr ajùt a di pès grôs”. A meśanòt la sigàva “incóra, incóra, incóra”, cun un strid arvèrs lē la sigàva “incóra, incóra, incóra”.»
(MUD)


Billy Idol (nóm 'd art ad William Michael Albert Broad) 'l è un cantànt britànic nâ a Middlesex al 30 ad Nuvémbar dal 1955.

Billy Idol tòlt śò dal viṿ

Al nóm Billy Idol 'l è nâ da un fat ch'al gh'è capitâ quand 'l éra śóvan. Al sò mìstar al gh'iva dat indrē un còmpit che lò 'l iva sbaliâ cun scrit in sima, cun di caràtar gigànt, “William is idle” ("William 'l è un bondagnìnt"). Da cal mumènt lè in avànti 'l à tacâ a far-as ciamàr da tut Billy Idol.

A gl'inìsi dla sò caréra 'l è stâ al frontman dal grup punk di Generation X par pò tacàr na caréra da par lò. Al s è fat cgnósar specialmènt in di an Utànta cun di braṅ dimóndi famóś cuma White Wedding, Rebel Yell, Eyes Without A Face e Cradle of love.

Biugrafìa

Billy Idol in dal 2003

I sò prim pas i èṅ dal 1977, quand al mét sù un sò grup par sunàr al punk dimóndi ad mòda in alóra. La banda la s ciamàva subìt Chelsea e pò Generation X.

Cun cal grup chè, in fiṅ a 'l 1981, 'l à fat gnir fóra tri àlbum e di braṅ quài Ready Steady Go, Night of the Cadillacs, King Rocker, Valley of the Dolls e Dancing with Myself, prima ad tacàr na caréra sulìsta, spatinànd a New York quand al punk 'l éra drē a sparìr e Billy 'l iva decìś ad lavuràr a di pès davśèṅ a 'l synthpop.

Lavurànd insém a Steve Stevens, al fà gnir fóra al sò prim disc umònim in dal 1982 e al sucès al riva, anc par via ad braṅ quài White Wedding e Dancing with Myself.

Al sécond àlbum par lò 'l è Rebel Yell dal 1984 e chè al fà al bòt dabòṅ, cun di sìngui da nuànta cuma Eyes Without A Face, Flesh For Fantasy e Rebel Yell.

Anc al tèrs disc 'l è fat insém a Stevens e al véd la luś dū an dòp, cun al cansòṅ ad punta ch'i èṅ To Be A Lover, Don't Need A Gun e Sweet Sixteen.

In dal 1990 'l è al tùran ad Charmed Life, sucès paletàri anc quést chè, cun al sìngul Cradle of Love druâ in soquànti culóni sunóri.

A partìr da cal mumènt lè però la róda la prila par lò e i sò lavōr i n càtan mia la furtùna da prima, a partir dal disc dal 1993 Cyberpunk. Idol al patìs un perìud ad depresiòṅ e al taca a tōr dal dròghi andànd in a risć ad murìr in dal 1994 dòp avér tòlt 'l àcid GHB.

In dal 2005 al tórna a far di disc, faghénd gnir fóra Devil's Playground e 'n an dòp na compilation ad braṅ ad Nadâl, Billy Idol: Happy Holidays.

Discugrafìa

Àlbum

  • Billy Idol (1982)
  • Rebel Yell (1983)
  • Whiplash Smile (1986)
  • Charmed Life (1990)
  • Cyberpunk (1993)
  • Devil's Playground (2005)
  • Happy Holidays (2006)

Dal Viṿ

  • VH1 Storytellers (2002)

Racòlti

  • Vital Idol (1985 UK, 1987 USA)
  • Idol Songs: 11 of the Best (1988)
  • Greatest Hits (2001)
  • The Very Best of Billy Idol: Idolize Yourself (2008)

EP

  • Don't Stop (1981)

Culegamènt estéran