White trash

Da Wikipedia.

C'l artìcul chè 'l è scrit in Miranduléś Emiliàn

Baghét texàṅ dascàlsa di an Quarànta druâ par sunàr al cutòṅ in di camp
Patnadùra a la “mullet”
Risturànt mòbil dl'Alabàma


White trash (ch'a vōl dir “Biànc rusc”), dal vòlti scurtâ in PWT (acrònim ad Poor White Trash), l'è na paròla druàda in di Stat Unî p'r uféndar in na manéra dimóndi péśa e tōr in gir al parsòni americàni 'd pèla biànca ignurànti, śgarbàdi, biólchi, vistìdi mâł, badilóni e gréśi cuma la śmalta ch'i n èṅ gnanc bòni 'd dascórar bèṅ in ingléś. In gèn'r i mémbar dal white thash i èṅ da spés di buletàri sénsa cultùra.

Tgnéd adrē a 'l Oxford English Dictionary cla manéra 'd dir chè a s è tacâ a druàr-l' in dal 1830 da part di séruv négar dal famìji bèṅ ad Dixie Land par dar adòs a i mingòṅ biànc ch'i lavuràv'n in di sò sit dla tèra minga bòna e ch'in alóra i éran dit „magna-śmalta“. La paròla White trash la s davśìna dimóndi a 'l cuncèt ad redneck ma qvést chè a n è mia dit ch'al sia pòvar par fòrsa.

I White trash i èṅ da spés mis da na banda da part dla sucietà e i scàmpan faghénd di lavursèṅ da gnint, cuma qvéi 'd fadìga o da impiegâ a 'l masi o in di fèr vèć. I vìv'n in di camper o in di container in pòst bandunâ da tut.

Soquànt di stereòtip mis insém a la figùra dal White trash i èṅ:

  • èsar muśnènt
  • cà e màchini minga tgnudi adrē cum a s dév
  • manéra śgarbàda 'd cumpurtàr-as
  • ignurànsa
  • minga vója 'd far di pas avànti in dla caréra e in dla vita in generàł
  • famìji in ruìna
  • spurcaciòṅ dèntar, abòrt e gravidànsi da ragasōli, gusàdi cun di parènt, fiōi minga arcgnusû
  • magnàr minga bòṅ, da spés gras e bèla fat
  • dintadùra ruinàda cun di dènt cariâ, śbuśî o ch'i gh càlan
  • vója 'd quistiunàr, śmadunàr, imbariagàr-as
  • patnadùri a la mullet
  • par chi óm andàr in gir in canutéra (da cal bandi là ciamàda wife-beater ch'a vōl dir pìcia-mujér)
  • giràr cun di pick-up vèć
  • tgnir dacàt dal màchini scasàdi in giardèṅ
  • rasìśum

In dal 2015 al regìsta marchigiàṅ Roberto Minervini 'l à girâ 'n ducumentàri preśentâ a 'l 68śum Fèstival ad Cannes su soquànt White thrash dla Luiśiàna da 'l tìtul Louisiana (The Other Side)[1].

At pó dar 'n òć anc a...

Nòti