Simone Bolelli

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


Simone Bolelli tòlt śò in dal 2014


Simone Bolelli (Bulógna, 27 ad Dicémbar dal 1984, a s lèś [siˈmoːne boˈlɛlli] in Itagliàn) 'l è 'n tenìsta emigliàṅ prufesiunìsta da 'l 2003. Al 23 ad Favràr dal 2009 'l è rivâ a ès'r al nùmar trénta-siē dal mónd in singulàr. In dla sò caréra 'l à vins dódas turnèo Challenger e dū Futures rivànd na vòlta in finàl in un turnèo ATP a Mònag 'd Bavéra in dal 2008 pardénd però da Fernando González par 6-7 7-6 3-6.

'L è élt un mét'r e utànta-tri e al pésa stanta-nóṿ chilo. Al dróa al bras dèstar e al tira 'l arvèrs cun na maṅ sōla anc s'i sò cōlp mijōr i èṅ al servìsi e 'l drit. Al sò punt débul, in du 'l è 'n pò lòfi, 'l è la rispòsta. Al stà a Montecarlo. Sò pàdar Daniele 'l è 'n dentìsta, sò màdar Stefania na raśunēra e sò surèla più granda Simona na banchēra. Da 'l Agóst dal 2009 'l è spuśâ cun la mudèla Ximena Fleitas. A gh piàś al cìnema (Il Gladiatore 'l è 'l sò film preferî) e la mùśica (al scólta i Queen e Michael Jackson).

Caréra

Simone al s davśìna a 'l tènis a sèt an tgnénd a drē a i sò śugadōr preferî, Stefan Edberg e Patrick Rafter. In dal 2004 al s mét in bisàca i sò prim dū tìtui Futures, a Veróna e a Bulógna, e al fà cumpàgn in dal 2006 c'n i Challenger ad Bjèla e ad Côm.

In dal 2007 al s qualìfica p'r al turnèo ad Miami e pò al riva a 'l tèrs tùran baténd Gaël Monfils e Dmitrij Tursunov prima 'd cédar a David Ferrer par 6-7 2-6. In sla tèra rósa 'd Barcelóna al gh'à la méj su 'l èx nùm'r òṅ dal mónd Marat Safin par 6-4 7-6 ma a 'l secónd tùran al pèrd cun c'l àt'r itagliàṅ, Potito Starace. Al pasa pò 'n tùr'n a 'l Roland Garros, a Wimbledon e a gl'US Open, chè baténd Julien Benneteau. Al sèra 'l an a 'l 67śum pòst dal ranking.

Un drit rabî dal bulgnéś
Bolelli prònt a rispóndar, al sò punt débul

A 'l inìsi dal 2008 al gh'à da pigàr-as a Novak Đoković a gl'Australian Open, a Richard Gasquet a Marsìglia e a David Ferrer a Rotterdam ma pò al bat Marin Čilić a cà sua a Śagàbria quànd in dal turnèo cruàt al riva par la prima vòlta in semifinàl in 'n ATP, in dua al pèrd però cun Serhij Stachovs'kyj par 4-6 4-6. A Miami al fà fóra Santiago Giraldo e Philipp Kohlschreiber prima ad lasàr strada in tri sét a 'l rus Nikolaj Davydenko. In Avrìl al riva in finàl a Mònag 'd Bavéra ma al la pèrd cun Fernando González par 6-7 7-6 3-6. A Róma al dà la paga a i francéś Olivier Patience e Gilles Simon par cédar pò in di utàṿ a Andy Roddick par 6-7 3-6. A 'l Roland Garros al bat al nùmar daśdòt dal mónd Marcos Baghdatis e anc 'l argintèṅ Juan Martín del Potro ma pò al lasa strada a Michael Llodra par 6-7 4-6 6-7. Al riva a 'l tèrs tùr'n anc a Wimbledon in dua al pèrd da Lleyton Hewitt par 1-6 3-6 6-7. In Luj al bat Kevin Anderson a Cincinnati prima ad pèrdar par 6-7 6-7 cun Novak Đoković, nùmar tri dal mónd. A Madrid al manda a cà Nicolás Almagro ma a 'l secónd tùr'n al gh'à da bandunàr cun Andy Murray quànd 'l éra sóta 0-6 1-2. In Utóbar a Baśilèa, dòp avér vins cun Tomáš Berdych e cun Marcel Granollers, al patìs un 2-6 3-6 da Roger Federer in di quàrt.

Al bulgnéś al taca mâł al 2009 pardénd nóṿ di prim quìnd'ś incóntar śugâ anc se a Rotterdam al fà sudàr dimóndi Rafael Nadal pardénd sèg par 6-4 2-6 5-7. In Avrìl a Montecarlo al bat prima Robin Söderling e pò Janko Tipsarević prima ad lasàr strada a Ivan Ljubičić par 5-7 6-7. A 'l Roland Garros al bat incóra Tomáš Berdych ma pò al pèrd in sinc sét cun Jeremy Chardy. Dòp avér mulâ 'l sò alenadōr Claudio Pistolesi in Maǵ e èsar rivâ a gl'utàṿ a New Haven (2-6 4-6 da Leonardo Mayer) al mét in fila sèt scunfìti ad fila. Al sò 2010 'l è incóra pèś parchè al pèrd sèt partìdi ad fila, vinsénd fra 'l àtar sōl un sét, e finénd a 'l 126śum pòst in clasìfica. Simone al taca a pistàr incóra i camp di Challenger. In Maǵ al pasa 'l qualificasiòṅ a 'l Roland Garros ma pò al céd a 'l prim tùr'n a Pablo Andújar par 6-7 4-6 2-6. In Istâ al vins al Challenger ad Turèṅ baténd Potito Starace par 7-6 6-2 e pò al riva a 'l secónd tùr'n a Ambûrg (1-6 6-3 3-6 da Thomaz Bellucci) e a Umâg (6-7 7-6 1-6 da Juan Ignacio Chela), p'r al rèst gnint in tut. Al sèra la stagiòṅ da nùmar 167.

Anc in dal 2011 Bolelli al fà fadìga a catàr dal sudisfasiòṅ in dal sircùit ATP. A Róma i gh dànan na carta salvàdga ma lò al pèrd subìt da Nicolás Almagro, nùmar déś dal mónd, par 0-6 5-7. Da qulificâ al riva a 'l secónd tùr'n a 'l Roland Garros ma al pèrd da Andy Murray par 6-7 4-6 5-7. A Wimbledon al fà incóra méj, pasànd al qualificasiòṅ e pò baténd prima Martin Fischer e pò Stanislas Wawrinka (nùmar 14 dal ranking) in tri sét. A 'l tèrs tùr'n al cata 'l francéś Richard Gasquet ch'l al manda a cà. In Setémbar al śōga al turnèo ad Bangkok e lè al s cava la sudisfasiòṅ ad dar la paga a Ernests Gulbis par 7-6 7-6 prima ad lasàr-'g al péni c'n al bùlgar Grigor Dimitrov.

In dal 2012 al s mét in bisàca al Challenger ad Florianòpulis baténd par 6-3 6-4 al śluvèṅ Blaž Kavčič. Dòp avér ciapâ la paga da Rafael Nadal a 'l Roland Garros, in s'l èrba dal Queen's al bat Ernests Gulbis e Gilles Simon prima 'd andàr fóra in di utàṿ p'r òpra ad Xavier Malisse. A Wimbledon al pasa 'l qualificasiòṅ ma pò al céd in quàtar sét a Jerzy Janowicz. In Luj al riva in di quàrt a Kitzbühel in dua al pèrd par 6-1 5-7 1-6 da Martin Kližan. C'n al śluvàc al gh pèrd incóra in Agóst in dla finàl dal Challenger ad San Marèṅ e in di utàṿ a San Pirènbûrg.

'L emigliàṅ al taca bèṅ al 2013. A Doha Bolelli al fà fóra Daniel Gimeno Traver e Łukasz Kubot prima ad lasàr strada a Nikolaj Davydenko pò finalìsta. Dòp un prim tùr'n a gl'Australian Open (5-7 4-6 3-6 da Jerzy Janowicz), in dua al riva almànc in semifinàl in dópi insém a Fabio Fognini, al cata la semifinàl a San Pàvel mandànd a cà in d'l órdan Tommy Robredo par 6-2 6-4, Juan Mónaco par 7-5 6-2 e Albert Montañés par 6-4 6-4. A 'l ùltim al céd però a David Nalbandian par 3-6 5-7. Insém a Fognini al riva anc in semifinàl in dópi e pò sèg al vins al turnèo ad Buenos Aires, al secónd tìtul par gl'itagliàṅ dòp Umâg dal 2012. In Mars al s infurtùna a 'l pōls a Miami durànt 'l incóntar cun Grigor Dimitrov. Par cólpa dla lusasiòṅ a i òs al pèrd dagnóra tuta la stagiòṅ, al próa a śugàr a 'l Roland Garros e a Wimbledon ma a n gh'è gnint da far.

'L arvèrs in top spin a na maṅ ad Simone

Crudâ dimóndi śò in clasìfica in dal 2014 par 'l infurtùni patî 'l an prima, da nùmar 321 dal mónd al śōga in Favràr al Challenger ad Bêrgum e 'l al pòrta a cà vinsénd c'n i tedésc Dustin Brown in semifinàl e Jan-Lennard Struff in finàl. A Montecarlo i gh dànan na carta salvàdga ma lò al pèrd subìt cun Philipp Kohlschreiber par 3-6 4-6. In Avrìl al śōga àtar dū Challengers a Varsèj e a Tùniśi e 'l i vins. A Róma al riva a 'l secónd tùran in dua al pèrd cun Milos Raonic, nùmar déś dal mónd, par 3-6 6-7. A 'l Roland Garros al pasa 'l qualificasiòṅ e pò al riva anc a 'l secónd tùran (2-6 3-6 2-6 da David Ferrer). A Wimbledon 'l è lucky loser ma in dal tablòṅ prinsipàł al śōga a la granda baténd Tatsuma Ito 7-5 7-6 3-6 7-6 e pò anc Philipp Kohlschreiber 4-6 6-4 6-3 2-6 7-5. Par na cria al n gh la cava briśa invéci a bàtar Kei Nishikori, al céd sèg 6-3 3-6 6-4 6-7 4-6, ma c'n i 106 punt purtâ a cà al s tira sù dimóndi in clasìfica rivànd a la puśisiòṅ nùmar 109. In Luj al vins al sò quàrt Challenger dla stagiòṅ in Germâgna. In Istâ a gl'US Open al vins la maratóna cun Vasek Pospisil par 2-6 6-4 6-2 3-6 6-3 ma pò al pèrd qvéla c'n al spagnōl Tommy Robredo ch'al gh'à la méj in sinc sét. In Setémbar al śōga in Śvisra 'l singulàr ad semifinàl ad Cópa Davis cóntar Roger Federer pardénd-ag par 6-7 4-6 4-6 e lasànd par strada sōl dū servìsi. Vint giōran dòp al tōś part a 'l ATP 250 ad Shenzhen. Dòp avér batû par 6-4 6-2 Matthew Ebden, al céd in dū partìdi a Andreas Seppi.

Culegamènt estéran