Novak Đoković

Da Wikipedia.

C'l artìcul chè 'l è scrit in Miranduléś Emiliàn


Prim piàṅ ad Đoković in dal 2011


Novak Đoković, (Belgrâd, 22 ad Maǵ dal 1987, ciamâ in Sèrb Новак Ђоковић, /ˈnɔvaːk 'ʥɔːkɔviʨ/, a l'ingléśa Novak Djokovic, a la miranduléśa Nòvac Giòcović scólta'l chè) 'l è 'n tenìsta sèrb nùm'r òṅ dal mónd, la prima vòlta al 4 ad Luj dal 2011.

'L è élt 188 cm e al péśa 80 chilo. In dla sò caréra 'l è stâ bòṅ ad vìnsar ssanta-sinc tìtui ATP (al prim in sla tèra batùda di Dutch Open al 23 ad Luj dal 2006 cóntar Nicolás Massú), c'n in mèś dódas ad qvéi dal Gran Slam (siē Australian Open, tri Wimbledon, dū US Open e 'n Roland Garros dònca 'l gh l'à cavàda a far al Career Grand Slam) e vint-nóṿ Masters Mila, siē sōl in dal 2015 ('l è 'n rècord). Inóltar 'l à anc vins sinc Masters.

Al 29 ad Śnar dal 2012 'l à sugâ la finàla 'd un Gran Slam più lunga dla stòria (a Melbourne, 5 óri e 53 minùt) vinsénd-la cónt'r al spagnōl Nadal.

In dal sircùit 'l è anc cgnusû dimóndi parchè al tōś in gir da spés, faghénd-an l'imitasiòṅ, soquànt di sò culéga cuma Rafael Nadal (quànd, dòp avér fat sù al mandghi dla majéta par tiràr fóra i mùscui di bras, al tira tut chi topspin cun al braghéti mèśi śò mulànd òṅ di sò sîg o quànd al s mét a pòst i sò cavìi da drē da 'l uréć prima ad bàtar), Filippo Volandri (ch'al gira cuma 'n nàdar), Andy Roddick (cun al sò brét tirâ śò), Roger Federer e anc na fémna, la Marija Šarapova (ch'la s prila sèmpar a 'l indrē prima ad mét'r-as a far di saltèṅ muvénd al sò cûl da 'l dū bandi)[1]. 'L è anc bòṅ ad dascórar dimóndi bèṅ in Itagliàn (cum anc al Tedésc, 'l Ingléś e, a n s in dascór, al Sèrb ch'l'è la sò léngua màdar) e al tîṅ la squàdra ad balòṅ dal Mìlan.

Finàli in di Gran Slam

Đoković al s piga in śnòć par ciapàr na bucìna cun 'l arvèrs


Turnéo An Vins/Pardû Aversàri in finàl Puntéǵ
US Open 2007 P Roger Federer 6-7 6-7 4-6
Australian Open 2008 V Jo-Wilfried Tsonga 4-6 6-4 6-3 7-6
US Open 2010 P Rafael Nadal 4-6 7-5 4-6 2-6
Australian Open 2011 V Andy Murray 6-4 6-2 6-3
Wimbledon 2011 V Rafael Nadal 6-4 6-1 1-6 6-3
US Open 2011 V Rafael Nadal 6-2 6-4 6-7 6-1
Australian Open 2012 V Rafael Nadal 5-7 6-4 6-2 6-7 7-5
Roland Garros 2012 P Rafael Nadal 4-6 3-6 6-2 5-7
US Open 2012 P Andy Murray 6-7 5-7 6-2 6-3 2-6
Australian Open 2013 V Andy Murray 6-7 7-6 6-3 6-2
Wimbledon 2013 P Andy Murray 4-6 5-7 4-6
US Open 2013 P Rafael Nadal 2-6 6-3 4-6 1-6
Roland Garros 2014 P Rafael Nadal 6-3 5-7 2-6 4-6
Wimbledon 2014 V Roger Federer 6-7 6-4 7-6 5-7 6-4
Australian Open 2015 V Andy Murray 7-6 6-7 6-3 6-0
Roland Garros 2015 P Stanislas Wawrinka 6-4 4-6 3-6 4-6
Wimbledon 2015 V Roger Federer 7-6 6-7 6-4 6-3
US Open 2015 V Roger Federer 6-4 5-7 6-4 6-4
Australian Open 2016 V Andy Murray 6-1 7-5 7-6
Roland Garros 2016 V Andy Murray 3-6 6-1 6-2 6-4
US Open 2016 P Stanislas Wawrinka 7-6, 4-6, 5-7, 3-6
Wimbledon 2018 V Kevin Anderson 6-2 6-2 7-6

Culegamènt estéran

Nòti