Omicidio a luci rosse
|
C'l artìcul chè 'l è scrit in
Miranduléś |
 Body Double
| ||
| Omicidio a luci rosse | ||
 La Deborah Shelton in na figùra dal film | ||
| Masamènt a luś rósi 1984 | ||
|---|---|---|
| Regìa: Brian De Palma | ||
| Scritōr: Brian De Palma • Robert J. Avrech | ||
| Atōr: Craig Wasson • Melanie Griffith • Gregg Henry Deborah Shelton • Guy Boyd • Rebecca Stanley Dennis Franz • David Haskell • Barbara Crampton | ||
| Müsica: Pino Donaggio | ||
| Léngua: Ingléś | ||
| Dürä dal film: 114 minüt | ||
| Nasiōṅ: Stat Unî | ||
Omicidio a luci rosse (Masamènt a luś rósi) 'l è 'n thriller americàṅ dal 1984 ad Brian De Palma ch'al tōś ispirasiòṅ da soquànt film 'd Alfred Hitchcock di an Sinquànta cuma Delitto perfetto, La finestra sul cortile e La donna che visse due volte.
La pelìcula l'à fat sù òt migliòṅ e òt ad dòlar ch'a gh cala quèl par rivàr a 'l budget stimâ 'd déś.
Sunt
Jake Scully (Craig Wasson) 'l è 'n atōr da quàtar sòld piutòst sfigâ in dla vita. Dòp avēr pardû na part par via dla sò claustofubìa, turnànd a cà al bèca la sò muróśa a lèt cun 'n àtar. Casâ via da la dóna, esénd ch'la cà la n è briśa sua, Jake 'l incróśa 'n tisi ciamâ Sam Bouchard (Gregg Henry) che, scultànd la sò stòria, al gh śibìs un pòst da durmìr esénd ch'al sò apartamènt adès 'l è lìbar parchè lò al gh'à d'andàr via par di impégn. Inóltar a gh'è na sò vśina 'd cà, la Gloria Revelle (Deborah Shelton), che tut al siri la s cava śò davànti a la fnèstra par far di balét purcùs e lò al s è inśgnâ par tōr un telescòpi par tgnir-la 'd òć ad nascòst ch'l è sèmp'r un bèl spetaculèṅ.
Na vòlta da par lò, Jake al taca subìt a spiàr cla malnéta là ma al fà anc a mènt ch'a gh'è 'n àtar, un tisi ch'al pâr 'n indiàṅ, ch'al fà àtar tant. La nòt dòp 'l atōr al véd c'l óm là insfilsàr-'s in dla sò cà par rubàr e par masàr-la c'n un tràpan méntar lò al n pōl far gnint parchè farmâ prima dal caṅ dla vitma. Interugâ da 'l detective Jim McLean (Guy Boyd), Jake al finìs listés in dla lista di suspetâ.
In séguit Jake al véd un trailer in televiśiòṅ 'd un film a luś rósi, “La Holly la s fà Hollywood”, in dua la prutagunìsta, la Holly Body (Melanie Griffith), la fà 'n balét dal tut cumpàgn a qvél ch'la fava la Gloria. Sinténd ch'a gh'è quèl ch'a traśa, 'l óm al decìd ad tōr part a 'n pruvèṅ dla cà 'd prudusiòṅ ad dla pelìcula là, in manéra 'd psēr cgnósar la Holly e dascórar sèg.