Il fantasma del palcoscenico

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Phantom of the Paradise
Il fantasma del palcoscenico
Fantasma del palcoscenico.png
William Finley e la Jessica Harper in na figùra dal film
Al fantàśma dal palc
1974
Regia: Brian De Palma
Scritùr: Brian De Palma
Atùr: Paul WilliamsWilliam FinleyJessica Harper
George MemmoliGerrit GrahamRod Serling
Müsica: Paul Williams
Lengua: Ingléś
Dürä dal film: 92 minüt
Nasiòṅ: Stat Unî


«
Scarésa e umurìśum a tèmp ad rock.»
(Tagline dal film)


Il fantasma del palcoscenico (Al fantàśma dal palc) 'l è 'n musical ad scarésa dal 1974 ad Brian De Palma ch'al 'l à anc scrit.

La pelìcula l'à vins al Gran Prèmi a 'l Fèstival 'd Avioraz dal 1975 ma 'l à fat sù pôc dvintànd almànc un cult movie.

Sunt

Winslow Leach (William Finley) 'l è 'n scritōr ad canti ch'l à péna butâ śò n'òpra pop ispiràda a 'l Faust. Al prudutōr discugràfic Swan (Paul Williams) al naśa ch'la pōl ès'r un sucès e al gh la pòrta via cun 'l imbròj par druàr-la par spianàr la stagiòṅ dal sò teàtar nóṿ ch'al gh'à da vèrar, al „Paradìś“.

Quànd al sunadōr 'l al và a catàr in dla sò vila p'r avér indrē al sò lavōr, Swan 'l al para via par turnàr a mét'r al maṅ adòs a soquànti cantànti ch'i vrév'n avēr la part dla prutagunìsta in dal musical. Winslow al gh la cava listés a védar la Phoenix (Jessica Harper) a l'òpra. La sò vóś e la sò gràsia i fànan cōlp su 'd lò ma pò 'l impreśàri al fà in manéra ch'al véggna cundanâ cuma vendidōr ad dròga. In parśòṅ i gh tìran via tut i dènt miténd a 'l sò pòst na dintéra 'd metàl.

Siē méś dòp la ràddio la manda in ónda la sò òpra cantàda da na banda rock “an Sinquànta” che lò al n s pōl minga cumpatìr, i Juicy Fruits. Dòp èsar scapâ via da parśòṅ al gh la cava a rivàr in dal stabilimènt dla “Disc Mòrt”, la cumpagnìa ad Swan, giùst par finìr c'n al sò grugn sóta a i machinàri par schisàr i vinìi. Armàś uféś par sèmpar e cun la fàcia pîna 'd sangṿ e ch'la fava fum, 'l óm al s buta in un fiùm, c'n i giurnài i al dànan par mòrt. Winslow però 'l è incóra viṿ e adès al vōl vindicàr-as. C'n un vistî ad pèla négra adòs e na mascra da grandòć al fa sćiupàr na bómba in dal teàt'r in dua i sònan i Juicy Fruits ch'adès i s fànan ciamàr The Beach Bums.

Swan al próa a catàr 'n acòrd sèg e al gh śibìs ad cambiàr la sò mùśica par far-la cantàr a la Phoenix ma pò al fà cum a gh pâr a lò e al sarnìs cuma prutagunìsta un cantànt mèś fnòć, Beef (Gerrit Graham), e al mét la ragàsa a far la curìsta. Méntar Beef 'l è drē a cantàr sóta la dócia, Winslow al gh stablìs un stura-lavandèṅ in bóca dgénd-ag 'd a n pinsàr gnanc luntanamènt ad cantàr la sò mùśica o sinò lò 'l al cuparà. Quànd lò al tira avànti listés cantànd la sò “Old Souls” durànt al spetàcul, al Fantàśma dal palc al gh tira adòs na silta masànd-al. Winslow al próa a cunvìnsar pò la Phoenix ad mulàr Swan, ch'in cal mént'r al gh'iva prumìs ad dar-ag la part dla prutagunìsta, ma la ragàsa la gh diś ad nò.

Culegamènt estéran