Florinda Bolkan

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

La Florinda Bolkan tòlta śò in dal 1975


La Florinda Soares Bulcão, cgnusùda méj c'n al nóm 'd art ad Florinda Bolkan (Uruburetama, 15 ad Favràr dal 1941), l'è n'atōra braśigliàna vinsidōra ad tri Dàvid ad Dunatèl. La lavóra in dal cìnema e anc p'r al fiction televiśìvi.

Biugrafìa

Fiōla 'd un deputâ e anvōda 'd un religióś, la Bolkan la taca a lauràr faghénd l'hostess par na cumpagnìa 'd aparéć braśigliàna. In cla manéra chè la gh'à la manéra 'd imparàr bèṅ al léngui cuma 'l Itagliàn, al francéś e 'l ingléś. In dal 1968 la cuntésa Marina Cicogna, prudutōra ad film, la gh buta i òć adòs e la s la pòrta in vacànsa a Ìschia (i vìv'raṅ insém p'r óltar vint an) cuciànd-la pò in dal mónd dal jet-set. Sò cuśèṅ Luchino Visconti al gh'à na part pìcula in dal sò film La caduta degli Dei (La cascàda di Dio). Sèmp'r in dal 1969 l'è la prutagunìsta dal film Metti, una sera a cena (Mét, na sira a séna), insém a Jean-Louis Trintignant, a Tony Musante e a l'Annie Girardot, ch'a gh fà vìnsar na “Targa 'd òr” a i Dàvid ad Dunatèl.

In dal 1970 la fà l’Augusta Terzi in dal film Indagine su un cittadino al di sopra di ogni sospetto (Indàśin su 'n sitadèṅ ad sōv'r ad tut i suspèt) 'd Elio Petri, na pelìcula ch'la s pòrta a cà 'l Prèmi Òscar p'r al film furastér e al prèmi speciàł dla giurìa a 'l 23śum Fèstival ad Cannes, e pò la rècita in di film Una stagione all'inferno (Na stagiòṅ a 'l Infèran), film ch'al dascurìva dal puvéta Arthur Rimbaud, e Anonimo veneziano (Venesiàṅ anònim). 'L an dòp la taca la sò culaburasiòṅ cun Lucio Fulci tulénd part a Una lucertola con la pelle di donna (Un nigrōl cun la pèl ad dóna) ch'la cuntìnua in dal 1972 cun Non si sevizia un paperino (A n s pōl minga far dal mâł a 'n pavarèṅ) in dua la fà la “Maciara” e la lavóra insém a Tomas Milian e a la Barbara Bouchet.

In dal 1975 'l è 'l tùr'n ad Flavia, la monaca musulmana mént'r in dal 1976 l'è impgnàda in Il comune senso del pudore (Al sèns cumùṅ dal pudōr) 'd Alberto Sordi. In di an Utànta la gira manc pelìculi, sōl sèt, al più impurtànti i èṅ Acqua e sapone (Àqua e savòṅ) ad Carlo Verdone dal 1983 e La gabbia (La gàbia) ad Giuseppe Patroni Griffi dal 1986.

Dòp avér fat la regìsta dal film inèdit in Itâglia Eu Não Conhecia Tururu, in dal 2003 la tórna a recitàr in dal thriller ad Pierfrancesco Campanella Cattive inclinazioni (Inclinasiòṅ catìvi) cun l'Eva Robin's, l'Elisabetta Cavallotti e la Mirca Viola.

Filmugrafìa

Culegamènt estéran