Flavia, la monaca musulmana

Da Wikipedia.

C'l artìcul chè 'l è scrit in Miranduléś Emiliàn

Flavia, la monaca musulmana

Anthony Higgins e la Bolkan in na figùra dal film
Flavia, la mònaga musulmàna
1974
Regìa: Gianfranco Mingozzi
Scritōr: Raniero Di Giovanbattista • Francesco Vietri
Sergio Tau • Gianfranco Mingozzi • Fabrizio Onofri
Atōr: Florinda BolkanMaría CasaresFranca Grey
Anthony HigginsClaudio CassinelliSpiros Focás
Jill PrattDiego MichelottiRaika JuriCiro Ippolito
Müsica: Nicola Piovani
Léngua: Itagliàṅ
Dürä dal film: 100 minüt
Nasiōṅ: ItàgliaFrància


«
Cuśa s pōl'n-i far i musulmàṅ ch'i cristiàṅ i n s aṅ bèla fat?»


Flavia, la monaca musulmana (Flavia, la mònaga musulmàna) 'l è 'n film dramàtic dal 1974 dirèt da 'l regìsta bulgnéś Gianfranco Mingozzi. 'L è stâ girâ in Pùglia a Trâṅ, a Barléta e a Ustùni.

La pelìcula la tōś ispirasiòṅ da la Batàja 'd Òtrant dal 1480 e da la stòria dla mònaga Flavia Gaetani, splàda viva in chi an lè p'r avér lasâ 'l cunvènt.

Sunt

La Flavia Gaetani (Florinda Bolkan), fiōla 'd un sgnuròt dal pòst, Don Diego (Diego Michelotti), a 'l inìsi dal Quatarsènt l'è custréta da sò pàdar a dvintàr na mònaga in dal cunvènt in du a gh cmanda la màdar superióra (Jill Pratt). Un dè i rìvan lè dal dóni tarantulàdi e c'n al diav'l adòs ch'i tàc'n a far al purcùsi, strusiànd-as dapartùt. La sōra Livia (Raika Juri) la pèrd la ragiòṅ anca lē faghénd la daśnumóśa cun na dóna culgàda par tèra. Par cal mutìṿ lè, chi atri sōri i la cunségnan a 'l sgnuròt par far-la turturàr. La Flavia la dmanda in śnòć a sò pàdar ad pardunàr-la e ad lasàr-la libra ma a n gh'è gnint da far. Turnàda in cunvènt, lì lē la gh'à da védar 'n àtar quèl 'd arvultàr al stómag: un duca francéś (Spiros Focás) al viulénta na dóna in un ciûś in mèś a i nimâi sénsa ch'al sōri i dgìsan gnint.

La Flavia, ch'la n in pōl piò, la decìd ad scapàr via insém a 'n ebrèi ch'al sarvìs là, Abram (Claudio Cassinelli). La s è stufàda 'd un mónd in dua cal dóni i gh'aṅ 'd armàgnar schisi a chi óm acsè cuma 'l bèsti e gl'ebrèi a i cristiàṅ. E quànd la pénsa a Geśù Crist, a Dio, a 'l Spìrit Sant e a gl'apòstui, la fà a mènt ch'i èṅ tut di masć. Purtròp par lē, la vèṅ catàda subìt e purtàda incóra in dal cunvènt dòp avér patî soquànt cólp ad scùria in sla schina. Abram al finìs invéci in parśòṅ e ardùt in cadéni. A dar-ag fòrsa a gh pènsa la sōra Agata (María Casares), una ch'la pinsàva ad dvintàr papa e ch'l à sèmpar pascâ al putēr p'r al fémni.

Un dè i rìv'n in Pùglia i saracèṅ cmandâ p'r Ahmed (Anthony Higgins). Par la Flavia l'è l'ucaśiòṅ 'd avér l'arvìnsida in di cunfrònt ad sò pàdar e ad cal mónd lè che lē l'à sèmp'r abû in òdi. Dòp ès'r andàda a lèt sèg, la pòrta avànti l'arvòlta cónt'r i cristiàṅ.

Culegamènt estéran