Barbara Bouchet

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

La Barbara Bouchet tòlta śò in dal 2006


La Bärbel Gutscher, cgnusùda méj cuma Barbara Bouchet (Reichenberg, 15 'd Agóst dal 1944), l'è n'atōra tedésca naturaliśàda itagliàna famóśa p'r al sò cumèdi spurcaciòni a l'itagliàna di an Stanta e anc p'r al pelìculi śali ch'l à girâ par di regìsta quài Lucio Fulci e Emilio Miraglia. In séguit, da i an Utànta in avànti, l'à anc fat la dóna 'd afâr, la cantànta (cun tri sìngui publicâ in di an Utànta) e la cundutōra televiśìva.

L'è stada spuśàda cun 'l imprendidōr Luigi Borghese e la gh'à abû sèg dū fiōi, Alessandro e Massimiliano.

Biugrafìa

La Barbara Bouchet la nas in dal 1944 a Liberec, adès in dla Repùblica céca ma in alóra sità tedésca c'n al nóm ad Reichenberg. Finìda la secónda guèra mundiàla lē e la sò famìja i vàn'n a star in di Stat Unî e 'l è là ch'la Barbara la taca a giràr i sò prim film cuma Scusa, me lo presti tuo marito? (Scuś'um bèṅ, m al prèst-at tò marè?, 1964) e A braccia aperte (A bras avèrt, 1965). In dal 1967 l'è in dal cast dal film James Bond 007 - Casino Royale c'n al rōl dla Miss Moneypenny. A la fiṅ di an Ssanta la và a star in Itàglia e la dvènta famóśa in pôc tèmp girànd dal pelìculi śali, cuma L'uomo dagli occhi di ghiaccio (’L óm da i òć ad giàs) o La tarantola dal ventre nero (La taràntla da 'l vèntar négar), o dal cumèdi malnéti cuma Donne sopra, femmine sotto (Dóni ad sōvar, fémni ad sóta), Il prete sposato (Al prevòstar spuśâ) o Le calde notti di Don Giovanni (Al nòt caldi ad Don Śvan), tut film dal 1971. In dal 1972 la tōś part a ùndas pelìculi cuma Racconti proibiti... di niente vestiti (Racònt pruibî... ad gnint vistî), Milano calibro 9 (Milàṅ càlibar nóṿ) ad Fernando Di Leo, Valeria dentro e fuori (Valèria dènt'r e fóra), La dama rossa uccide sette volte (La dama rósa la cópa sèt vòlti) 'd Emilio Miraglia e a 'l cult Non si sevizia un paperino (A n s pōl minga far dal mâł a 'n pavarèṅ) ad Lucio Fulci cun l'Irene Papas, Tomas Milian e la Florinda Bolkan.

In dal 1975 la gira òṅ di sò film più impurtànt, L'anatra all'arancia (La nadra c'n i purtugài) ad Luciano Salce. In dal 1976 la tórna a 'l thriller c'n al film Con la rabbia agli occhi 'd Antonio Margheriti faghénd in cal mèntar anc dū film cun Sergio Martino, Spogliamoci così, senza pudor (Cavém-as śò acsè, sénsa vargóggna) e 40 gradi all'ombra del lenzuolo (Quarànta grâd a l'òra dal linsōł) insém a l'Edwige Fenech. La tórna a lauràr cun chi dū lè anc in dal 1980 in La moglie in vacanza... l'amante in città (La mujér in vacànsa... l'amànta in sità). Dòp Diamond Connection ad Sergio Bergonzelli dal 1982 la gh dà 'n taj c'n al cìnema e la taca a lauràr in televiśiòṅ in dal prugràma Beauty Center Show. La tórna a recitàr dòp vint an cun Mari del sud (Mâr dal sud) e c'n al blockbuster Gangs of New York ad Martin Scorsese dal 2002.

Filmugrafìa

Culegamènt estéran