Un detective

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Un detective
Detective.png
La Bolkan e Franco Nero in na figùra dal film
id.
1969
Regia: Romolo Guerrieri
Scritùr: Ludovico Dentice • Massimo D'Avak
Alberto Silvestri • Franco Verucci
Atùr: Franco NeroSusanna Martinková
Florinda BolkanAdolfo CeliDelia Boccardo
Renzo PalmerRoberto BisaccoMarino Masé
Laura AntonelliMaurizio BonugliaJohn Stacy
Müsica: Fred Bongusto
Lengua: Itagliàṅ
Dürä dal film: 103 minüt
Nasiòṅ: Itàglia


«
Un cumisàri curót 'l indàga su na cà discugràfica ma al s catarà 'd frònt a soquànt masamènt misterióś!»
(Tagline dal film)


Un detective (id.), cgnusû anc c'n al tìtul ad Macchie di belletto (Maci 'd truc), 'l è 'n film śal dal 1969 ad Romolo Guerrieri.

La culóna sunòra l'è 'd Fred Bongusto cun gl'arangiamènt ad Robby Poitevin. Al braṅ The world of the Blues 'l è cantâ par la Shirley Harmer. Renzo Palmer, ch'in dla pelìcula 'l à fat al persunàǵ dal cumisàri Baldo, in dal 1983 'l à cundót al quiz televiśìṿ Giallo sera su Rai Uno in du a gh'éra d'indvinàr al sasèṅ 'd un telefìlm.

Sunt

Al cumisàri Stefano Belli (Franco Nero) al lavóra par la questùra 'd Róma in du 'l è respunàbil d'l ufìsi p'r i furastēr ma se qualchidòṅ al gh ślunga di bèsi al s dà da far anc par sò cònt. Inóltar quànd al vōl savēr quèl al n s fà minga di prubléma a 'lvàr al maṅ e a tiràr dal śéśuli.

Un dè 'l avucàt Fontana (Adolfo Celi) 'l al ciàma p'r investigàr su 'n discugràfic ciamâ Romanis (Marino Masé) ch'l iva dmanda 'n finansiamènt a sò fiōl Mino (Maurizio Bonuglia) e 'l avucàt al vōl savēr s'l è 'n tisi ch'a gh s pōl cuntàr dabòṅ. Inólt'r a Fontana a gh dà fastìdi che na mudèla ingléśa, la Sandy Bronson (Delia Boccardo), la s sia misa insém a Mino e che lò al la vója spuśàr dònca al vrév che Belli, dasfrutànd al sò rōl, al la spedìs a cà sua d'in du l'è daśvgnùda, in dal Régn Unî, tirànd-ag via 'l parmés p'r armàgn'r in Itàglia esénd lē n'extracumunitària.

Dòp avér fat un gir in d'l apartamènt dla dóna e avér-ag dit ciàr e tónd ch'la gh'à da far sù 'l valìś parchè l'è vgnuda chè sōl par curómp'r i nòstar śuvnòt, Stefano al và pò da Romanis ma 'l al cata mòrt masâ. Qualchidòṅ al gh'à sparâ di cōlp par la fnèstra méntar lò 'l éra in vastàja e 'l purtinàr (John Stacy) 'l arcgnós in dla Sandy la sò amànta. In cà la pulisìa la gh cata na fóto dna dóna nuda cun sćiancâ via 'n cunsèṅ, qvél dal grugn.

Al caś al finìs in dal maṅ dal cumisàri Baldo (Renzo Palmer) ma Belli al cuntìnua gl'indàśin par sò cònt e al vîṅ a savēr da l'ingléśa che na vòlta Mino al s è piciâ cun Romanis quànd al l'à bcada a lèt sèg. In séguit al fà dal dmandi anc a la mujér ad Fontana, la Vera (Florinda Bolkan), surèla dla màd'r ad Mino pò mòrta pôc tèmp dòp avér-al mis a 'l mónd. L'éra lē ch'la gh'iva da dar i bèsi a Romanis. N'atra dóna insaplàda dèntar l'è la cantànta furastéra Emmanuelle (Susanna Martinková), una ch'la gira cun na Ferrari śala, ch'la vliva lauràr par Romanis e ch'la s è fata anc Mino un dòpmèśdè. Quànd al cumisàri al gh cata in cà dla dròga, par taśēr al gh diś ch'al vōl quìndas migliòṅ ad franc, acsè l'impàra cla visióśa lè.

In cal méntar 'n amìg futógrafar ad Mino, Claudio Fuscani (Roberto Bisacco), 'l è drē a pascar un negatìṿ, giusà ch'al n sia pròpria qvél dla dóna cavàda śò.

Culegamènt estéran