Dennis Hopper

Da Wikipedia.
C'l artìcul chè 'l è scrit in Miranduléś Emiliàn
Hopper tòlt śò in dal 1990


Dennis Lee Hopper (Dodge City, 17 ad Maǵ dal 1936 - Los Angeles, 29 ad Maǵ dal 2010) 'l è stâ 'n atōr, regìsta e senegiadōr americàṅ, candidâ a 'l Prèmi Òscar in dal 1970 par la senegiadùra 'd Easy Rider (premiâ invéci a 'l Fèstival ad Cannes cuma òpra prima) e in dal 1987 cuma atōr minga prutagunìsta in Colpo vincente.

Republicàṅ da sèmpar, a part al 2008 quànd al s è mis da la banda 'd Barack Obama, spuśâ sinc vòlti cun quàtar fiōi, Hopper 'l è mòrt in Califòrgna a séguit 'd un cànc'r a la pròstata dū méś dòp èsar finî in dla Hollywood Walk of Fame.

Biugrafìa

Uriginàri dal Kànsas, Hopper al s trasferìs dòp la secónda guèra mundiàla a Kansas City in Missouri e pò a San Diego.

In dal 1955 al fà 'l sò debùt a 'l cìnema in Gioventù bruciata, film girâ cun James Dean e la Natalie Wood. In dal 1969 al gira la sò prima pelìcula da regìsta, Easy Rider cun Peter Fonda e Jack Nicholson, film su 'n viàś in mòta ad dū amìg da Los Angeles a la Luiśiàna ch'l à purtâ a cà dimóndi prèmi.

In dal 1979 Dennis 'l è in dal cast dal film ad guèra Apocalypse Now ad Francis Ford Coppola, pò al laurarà sèg anc in quàt'r an dòp in Rusty il selvaggio insém a Chris Penn, Matt Dillon e Nicolas Cage. In di an Utànta al gira anc la cumèdia Non giocate con il cactus, al film ad scarésa Non aprite quella porta 2 e i thriller I ragazzi del fiume, Velluto blu e La vedova nera cun la Debra Winger e la Theresa Russell. In dal 1990 al dirìś dū thriller anc lò, Ore contate cun la Jodie Foster e John Turturro e Hot Spot - Il posto caldo cun Don Johnson, la Virginia Madsen e la Jennifer Connelly, pò al tórna a far 'l atōr par Tony Scott (Una vita al massimo, 1993), par Julian Schnabel (Basquiat, 1996), p'r Abel Ferrara (Blackout, 1997) e par Ron Howard (EdTV, 1999).

In séguit al gira di film più cic cuma 'l film ad śómbi La terra dei morti viventi o la cumèdia Swing Vote - Un uomo da 300 milioni di voti.

Filmugrafìa

Dennis a 'l Fèstival ad Cannes dal 2008
Hopper a la serimògna d'l Hollywood Walk of Fame in dal 2010

Cuma atōr

Cuma regìsta

Culegamènt estéran

Àtar prugèt