Swing Vote - Un uomo da 300 milioni di voti
|
C'l artìcul chè 'l è scrit in
Miranduléś |
 Swing Vote
| ||
| Swing Vote - Un uomo da 300 milioni di voti | ||
 Costner e la Madeline Carroll in na figùra dal film | ||
| Vōt Balarèṅ - 'N óm da 300 migliòṅ ad vōt 2008 | ||
|---|---|---|
| Regìa: Joshua Michael Stern | ||
| Scritōr: Jason Richman • Joshua Michael Stern | ||
| Atōr: Kevin Costner • Madeline Carroll • Mary Hart Paula Patton • Dennis Hopper • George Lopez Kelsey Grammer • Stanley Tucci • Charles Esten Richard Petty • Willie Nelson • Mare Winningham Nathan Lane • Lawrence O'Donnell • Larry King | ||
| Müsica: John Debney | ||
| Léngua: Ingléś | ||
| Dürä dal film: 120 minüt | ||
| Nasiōṅ: Stat Unî | ||
Swing Vote - Un uomo da 300 milioni di voti (Vōt Balarèṅ - 'N óm da 300 migliòṅ ad vōt) l'è na cumèdia dal 2008 ad Joshua Michael Stern ch'al l'à scrita insém a Jason Richman.
In dla pelìcula a s fà riferimènt a 'n vōt sōl dal Mèsic Nóṿ ch'al pōl decìd'r al presidènt di Stat Unî. In cal stat lè, fra 'l àtar, a gh'è dabòṅ na léǵ ch'la diś ch'in caś ad paréś i sò vōt eleturài a gh'è da śugàr-'s-i faghénd na maṅ a poker.
La pelìcula, finansiàda par Kevin Costner in parsòna, l'è custàda vint-i-òṅ migliòṅ ad dòlar e la 'n à pò fat sù dagnóra daśdòt.
Sunt
Earnest Johnson dit "Bud" (Kevin Costner) 'l è 'n espunènt dal white trash americàṅ ch'al n à gnanc finî 'l scóli. Dòp èsar-'s divìś da sò mujér Larissa (Mare Winningham) al viṿ in na roulotte a Tèxic, un paiśèṅ dal Mèsic Nóṿ, in buléta sparàda insém a sò fiōla Molly (Madeline Carroll) ma fra i dū al putèṅ pìcul a pâr pròpria lò. Ad mistēr al lavóra in na fàbrica 'd óṿ ma adès 'l à pardû 'l sò pòst parchè al bév tròp e pò al sò padròṅ al preferìs tōr di mesicàṅ ch'i lavór'n al dópi par la mità di bèsi.
La ragasōla la fà da tut par jutàr sò pàd'r a èsar 'n óm mijór e prima dgl'elesiòṅ dal 2004 la 'l iscrìv a 'l listi eleturàli cuma indipendènt faghénd-ag prumétar ch'l andrà anc a vutàr ma a Bud a n gh in ciàva gnint parchè tant a n càmbia mai gnint p'r al pòpul, minga c'n i republicàṅ dal presidènt Andrew Boone (Kelsey Grammer) e gnanc c'n i demucràtic dal sfidànt Donald Greenleaf (Dennis Hopper), un liberal dal Vermònt. La nòt dal vutasiòṅ Earnest al pasa 'l sò tèmp in un bar a bév'r e a śugàr a bigliàr e sò fiōla la decìd dònca 'd vutàr a 'l sò pòst, tant in dal séǵ al presidènt al dòrum e lē la gh'à acsè via libra par firmàr al regìst'r e p'r insfilsàr la schéda in dla màchina letrònica cunta-vōt. Purtròp la dóna dal pulisìi, pasànd da 'd lè, la dastàca sénsa vlēr la spina ciapànd-'g incòst e 'l vōt dla Molly al s pèrd. A pâr un quèl da gnint mo invéci i sinc vōt eleturài dal Mèsic Nóṿ i èṅ deciśìṿ par psēr elèś'r al presidènt di Stat Unî ma 'l è tut férum parchè i cònt in cal stat lè i èṅ para! La cumisiòṅ la fà a mènt a 'l vōt andâ pardû e la và a pascàr Earnest par far-al vutàr incóra. A sarà dònca lò a decìd'r al nóm dal presidènt.
Martin Fox (Stanley Tucci), 'l óm ch'l al tîṅ adrē a la campàgna dal GOP, 'l invìda Bud a dascórar c'n al presidènt su 'l Air Force One par cunvìs'r a vutàr par lò ma anc i demucràtic i s daṅ da far par bóca dal cantànt country Willie Nelson (Willie Nelson) ch'l al ciàma a séna da Art Crumb (Nathan Lane), mémbar dal staff ad Donald. Durànt la fèsta in sò unōr la giurnalìsta ch'l'à fat al scoop dgénd par prima 'l sò nóm, la Kate Madison (Paula Patton), la dascór cun la Molly parchè la vrév n'intervìsta da sò pàdar.