Bill Paxton

Da Wikipedia.

C'l artìcul chè 'l è scrit in Miranduléś Emiliàn

Paxton tòlt śò in dal 2014

William "Bill" Paxton (Fort Worth, 17 ad Maǵ dal 1955 – Ojai, 25 ad Farvàr dal 2017) 'l è stâ 'n atōr, un regìsta e 'n prudutōr ad film americàṅ, candidâ par quàtar vòlti a i Golden Globe.

Biugrafìa

Uriginàri dal Tèxas, Paxton al spatìna da śōv'n a Los Angeles par lauràr cuma cataròbi par Roger Corman pò 'l và a star a New York par studiàr a la New York University. Al sò debùt cuma atōr 'l è in na pelìcula dal 1975 ad Jonathan Demme, Crazy Mama, anc s'al sò nóm al n cumparìs briśa ufisialmènt.

A 'l inìsi di an Utànta al rècita in dla cumèdia Stripes - Un plotone di svitati e in dal film dramàtic Cavalli di razza. In dal 1983 al tōś part a 'n film ad scarésa, Mortuary - Obitorio, méntar 'l an dòp al gira dū film dimóndi impurtànt par lò cuma Strade di fuoco e Terminator ad James Cameron. C'n al regìsta canadéś al lavóra anc in Aliens - Scontro finale dal 1986. 'L an dòp 'l è impgnâ invéci in Il buio si avvicina dla Kathryn Bigelow.

In di an Nuànta al gira Predator 2 ma 'l è cun Qualcuno sta per morire, pelìcula dal 1991 ch'l'à ciapâ dimóndi prèmi, ch'al cata la sò cunsacrasiòṅ. In dal 1993 al fà 'l amànt dla Sherilyn Fenn in Boxing Helena e 'l western Tombstone ad George Pan Cosmatos cun Kurt Russell e Val Kilmer. In séguit al tōś part a dū blockbuster cuma True Lies ad James Cameron e Apollo 13 ad Ron Howard e a 'n film indipendènt cuma Una cena quasi perfetta in du 'l fà 'n camiunìsta rasìsta scurtlâ a séna da 'n grup ad liberal ch'i n s al cumpatìvan briśa. In dal 1996 e in dal 1997 al gira i film catastròfic Twister e Titanic insém a Leonardo DiCaprio e a la Kate Winslet, pò al ciàpa na part in dal thriller Soldi sporchi ad Sam Raimi.

In dal 2001 al gira 'l sò prim film, Frailty - Nessuno è al sicuro. In dla sò caréra 'l à anc recitâ in soquànti séri televiśìvi cuma Miami Vice (1986), I racconti della cripta (2003) e Big Love (2006/2011) in du 'l fava la part 'd un pulìgam cun tri mujér e sèt fiōi.

Filmugrafìa

Culegamènt estéran

Àtar prugèt