Una cena quasi perfetta

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg The Last Supper
Una cena quasi perfetta
Cena quasi perfetta.png
Ron Eldard e la Cameron Diaz in na figùra dal film
Na séna dagnóra parfèta
1995
Regia: Stacy Title
Scritùr: Dan Rosen
Atùr: Cameron DiazRon EldardBill Paxton
Gil SegelAnnabeth GishJonathan Penner
Ron PerlmanCourtney B. VanceNora Dunn
Dan RosenAmber TaylorCharles Durning
Mark HarmonMatt CooperRachel Chagall
Jason AlexanderAmy HillNicholas Sadler
Müsica: Mark Mothersbaugh
Lengua: Ingléś
Dürä dal film: 92 minüt
Nasiòṅ: Stat Unî


«
Magnàr, bévar e vgnir saplî.»
(Tagline dal film)


Una cena quasi perfetta (Na séna dagnóra parfèta) l'è na cumèdia négra americàna, giràda a Los Angeles in dal 1995, dla Stacy Title, chè a 'l sò debùt. La regìsta l'à vins al prèmi par la mijóra regìsta a 'l fèstival di film pulisiésc ad Cugnàc.

Al persunàǵ ad Norman Arbuthnot 'l è ispirâ a la vita dal pulìtig cunservadōr Rush Limbaugh. Par cla part lè, finìda pò a Ron Perlman, a s éra pinsâ a 'l inìsi a Beau Bridges.

Sunt

La Jude (Cameron Diaz), Pete (Ron Eldard), la Paulie (Annabeth Gish), Marc (Jonathan Penner) e Luke (Courtney B. Vance) i èṅ sinc amìg ch'i vìvn'n insém in na cà davśèṅ a n'autostràda in d'l Iowa. Al grup di śōvan 'l è dimóndi unî anc parchè i s inténdan bèṅ avénd dgl'idéi pulìtighi liberal.

Na sira Pete al s fà scarusàr a da 'n camiunìsta ch'al pasàva da 'l sò bandi, Zachary Cody (Bill Paxton). Avénd fat a mènt ch'l è dimóndi stuf e anc par śdebitàr-as, Pete al śibìs a Zack 'd armàgnar sèg a séna e, in dal caś, anc a durmìr da lò. Quànd i èṅ tut a tavla, al camiunìsta al taca a dascórar dal sò patriutìśum, dal fat ch'l à tòlt part da marine a la guèra in Iràq Desert Storm, dand pò adòs a qvéi dgl'atri rasi e rivànd anc a dir che 'l Ulucàust al gh'è minga stâ dabòṅ. 'L èx suldâ al s bèca acsè cun tut chi àtar, specialmènt cun Marc, e 'l tira fóra 'n curtèl. Pete al salta sù par difénd'r al sò amìg ma 'l s fà mâł a 'n bras méntar Zack al mōr dòp na scurtlàda a la schina durànt la lòta.

I sinc amìg i èṅ tut inspirtâ par qvél ch'l è sucès ma pò Luke al fà 'n dascōrs paragunànd Zack a 'n futùr Hitler dgénd ch'a s pōl anc dar che cal masamènt lè 'l àppia salvâ la vita a di migliòṅ ad parsòni: «Viaśànd in dal tèmp a finém in dal 1909 in Àustria. At sē in un pub e 't bév dla grapa c'n un tisi ch'ta n cgnós briśa. At sà ch'al stùdia art e ch'a gh cala 'n cajòṅ. Al sò nóm 'l è Adolf. A cal punt lè dla sò vita al n à incóra fat gnint ad mâł. Al n è mia delùś, al n è mia arliâ, al n à incóra fat di crìmin, al n và minga a séna purtànd sèg un curtèl in bisàca, al n à masâ ninsòṅ e gnanc 'l à tacâ na guèra mundiàla. N al mas-at brisâ tè? At gh'à da métar dal vlèṅ in dla grapa saénd ad psēr salvàr di migliòṅ 'd inusènt». Al grup, esénd 'd acòrd c'n al ragàs ad culōr, al decìd ad saplìr al camiunìsta in giardèṅ e 'd far finta 'd gnint ma in séguit i sinc i capìsan ch'a n s pōl piò armàgnar lè sénsa far gnint. Tut i sàbat i gh'aṅ da ciamàr a séna di tisi òṅ a la vòlta, far-i dascórar, capìr cuśa gh'aṅ-i in dla suca, pruàr a far-ag cambiàr idéa cun di ragiunamènt e, s'a n gh'è gnint da far, far-ag bévar dal vèṅ misćiâ cun d'l arsènig.

La prima stmana Jude al ciàma 'n sò amìg ad quànd 'l éra pìcul, Gerald Hutchens (Charles Durning), adès prevòstar. Al religióś al taca a dar adòs a i gay ma par pôc parchè Pete al gh śibìs al bicér ch'al s mèrita. La fòsa l'è prònta anc p'r un nèo-naśìsta ch'al vrév dar fōg a i barbòṅ parchè i n mèritan briśa 'd vìvar (Nicholas Sadler) e a 'n avucàt ch'a n gh in ciàva gnint d'l ambînt e dal bèsti (Jason Alexander) parchè 'l óm 'l è superiōr.

Luke al vrév invidàr a séna 'n scritōr ad dèstra pēś, rasìsta e omofòbic, ch'a sò dita al fà i bèsi esénd fals e buśiàrd, Norman Arbuthnot (Ron Perlman).

Culegamènt estéran