Anhelina Kalinina
|
C'l artìcul chè 'l è scrit in
Miranduléś |
L’Anhelina Serhiyivna Kalinina (Nova Kakhovka, 7 ad Favràr dal 1997, Ангеліна Сергіївна Калініна in Ucraìn) l'è na tenìsta ucraìna ch'l'è stada la nùmar sènt-quarant'òt dal mónd al 27 ad Luj dal 2015.
In dla sò caréra l'à vins tri tìtui dal sircùit ITF, tut in dal 2015.
Caréra
In dal 2013, a séd'ś an, l’Anhelina la riva in di utàṿ in d'l ITF da stantasìnc-mila dòlar ad Donec'k in dua la pèrd da cl'atra ucraìna, la Svitolina, par 4-6 1-6. In Utóbar la fà i quàrt a Limoges (3-6 4-6 da la Kristýna Plíšková), pò la riva in finàl in dū ITF da vintsìnc-mila dòlar ma la li pèrd tuti.
In dal 2014 la céd par 6-7 0-6 a l'Erika Sema in di utàṿ d'l ITF ad Launceston (Austràglia). In Avrìl la bat l'Irina Falconi a Jackson (ITF da vintsìn-mila dòlar) pò la riva in finàl ma la pèrd da la nurvegéśa Ulrikke Eikeri par 2-6 4-6. in Avrìl la bat l'Asia Muhammad e la Beatriz Haddad Maia in dal qualificasiòṅ dal turnèo ITF ad Dothan ma pò la và fóra in di utàṿ cun la Verónica Cepede Royg. A Hechingen in Germâgna la fà sudàr la padròna 'd cà, la Carina Witthöft, prima 'd andàr a cà in di quàrt c'n al puntéǵ ad 7-6 3-6 5-7. A Équeurdreville-Hainneville la pèrd la sò quàrta finàl ITF cun la Stéphanie Foretz Gacon.
In dal 2015 la riva in semifinàl a Osprey baténd la Kristína Kučová e la Shelby Rogers ma la pèrd par 4-6 2-6 da la Madison Brengle. In Avrìl a Jackson la vins finalmènt al sò prim tìtul, 6-3 6-4 a la Johanna Konta, pò la fà àtar tant la stmana dòp a Pelham (6-3 7-5 a la tedésca Laura Siegemund). In Luj la in vins 'n àt'r a Sacramènto baténd in finàl l'An-Sophie Mestach par 6-4 4-6 6-3. Dòp i quàrt a Lexington, l'ucraìna la gh'à 'n perìud nég'r in dua la pèrd sinc incónt'r ad fila.