Alizé Cornet
|
C'l artìcul chè 'l è scrit in
Miranduléś |
L’Alizé Cornet (Nisa, 22 ad Śnar dal 1990) l'è na tenìsta francéśa prufesiunìsta da 'l 2006 ch'l'è stada la nùmar ùndas dal mónd in singulàr (al 16 ad Favràr dal 2009).
In dla sò caréra l'à vins dū tìtui WTA (pardénd-an tri in finàl) e tri ad qvéi d'l ITF, tacànd a tgnir in maṅ la rachéta a quàt'r an. L'è élta 173 cm par 60 chilo.
A l’Alizé Cornet a gh piàś tgnir dal bèsti, difàti la gh'à 'n gat (Papyrus) e 'n caṅ (Andy), e śugàr in sla tèra. L'è an nac patìda dal grup rock di Muse.
Caréra
La Cornet la taca a śugàr in dal sircùit ITF in dal 2004. 'L an dòp a riva al prim sucès cóntar na Top 100 (la nùmar ssanta Maria Elena Camerin). Quéi dal Roland Garros i gh dànan na carta salvàdga e lē la vins al sò prim incóntar in un turnèo WTA baténd l'Alina Židkova ma pò la ciàpa la paga da l'Amélie Mauresmo. Pardû al prim sét par 6-0, chi lē la naśa ch'a gh'è quèl ch'a traśa e difàti la patìs anc un 6-2 ch'al la manda a cà.
In dal 2006 la vins dū tìtui ITF: a Bari (cóntar l'itagliàna Tathiana Garbin par 6-3 3-6 6-2) e pò anc a Padva. Cun dū carti salvàdghi in bisàca la śōga gl'Australian Open (in dua la pèrd da la giapunéśa Aiko Nakamura par 6-2 4-6 6-2) e incóra al Roland Garros in dua la pasa 'l prim tùran faghénd fóra la Virginia Ruano Pascual prima ad cédar a la Tathiana Garbin.
Al sò 2007 al taca mâl par lē parchè, pasàdi al qualificasiòṅ di Australian Open, la pèrd subìt in dū sét da la Daniela Hantuchová. A Acapûlc la pèrd da la Flavia Pennetta e a 'l Roland Garros da la Venus Williams par 6-4 6-3, dòp i quàrt tucâ a Fes. A Wimbledon la bat la Marija Kirilenko (in alóra nùmar 42 dal mónd) ma la pèrd pò a 'l secónd tùran da l'Ai Sugiyama. Dimóndi méj la gh và a gl'US Open in dua l'è bòna ad far fóra la Samantha Stosur e pò anc la Caroline Wozniacki prima ad cédar a la Jelena Janković. In dal mèś la fà suo 'l ITF ad Dnepropetrovsk baténd in dla finàla la śvisra Stefanie Vögele.
In dal 2008 la śōga la finàl dal turnèo 'd Acapûlc ma la Flavia Pennetta la la mét incóra in riga cuma 'l an prima baténd-la par 6-0 4-6 6-1. Ma 'l è sōl 'l inìsi parchè la francéśa la s fà dimóndi strada anc a Amelia Island e in sla tèra vérda ad Charleston in dua la riva in semifinàl, batùda prima da la Dominika Cibulková e pò da la Serena Williams. A Róma, parténd da 'l qualificasiòṅ, la riva in finàl baténd via via la Vera Duševina, la Francesca Schiavone, la Svetlana Kuznecova, la Serena Williams (par bandòṅ) e l'Anna Čakvetadze, lasànd pò strada a la sèrba Jelena Janković cun un dópi 6-2. Dòp avér pasâ dū tùran a 'l Roland Garros e ès'r andàda a cà subìt a Wimbledon, la vins, sénsa cédar gnanc un sét, al sò prim turnèo WTA a Budapèst cóntar la śluvéna Andreja Klepač par 7–6 6–3. A New Haven la riva in semifinàl (a n gh'è gnint da far cun la Caroline Wozniacki), śuntànd-ag anc tri tùran a gl'US Open la finìs acsè 'l an in dal primi vint.
Al 2009 al taca dimóndi bèṅ cun i quàrt a Sydeny e gl'utàṿ a Melbourne, in dua l'è sèmpar la Dinara Safina a mét'r-as in mèś. Dòp avér tucâ al sò best ranking (11śum pòst) la cróda sò in clasìfica, fóra da 'l primi quarànta. Anc al 2010 'l è 'n an griś.
In dal 2011 la riva a 'l tèrs tùran prima a gl'Australian Open (la pèrd da la Kim Clijsters) e pò a Indian Wells (farmàda da la Francesca Schiavone par 6-2 6-3). In dal 2012 la riva in di quàrt a Cupenàghen ma la Caroline Wozniacki la l'asfàlta 6-0 6-3. A Stucàrda la pasa un tùran prima 'd incruśàr la Marija Šarapova ch'la la spedìs a cà. La śōga a Straśbûrg par via dna carta salvàdga e la riva in finàl ma pò la céd a la Francesca Schiavone par 6-4 6-4. Al méś dòp la s pòrta a cà al sò secónd tìtul WTA a Bad Gastein avénd-ag la méj su la bélga Yanina Wickmayer par 7-5 7-6.