Yvonne Meusburger
|
C'l artìcul chè 'l è scrit in
Miranduléś |
L’Yvonne Meusburger (Dornbirn, 3 'd Utóbar dal 1983) l'è na tenìsta austrìaca prufesiunìsta da 'l 1999. La s è stablìda a Schwarzach, paisèṅ ch'a s cata in dal land ad Vorarlberg. L'è élta 175 cm e la péśa 60 chilo. La dróa al bras dèstar e la tira 'l arvèrs a dū maṅ.
La dascór bèṅ in Tedésc, in Ingléś e in Śvedéś.
L'è stada la nùmar sinquànt'òt dal mónd al 22 ad Luj dal 2013. In dla sò caréra l'è rivàda in finàl par tri vòlti in di turnèo WTA, sèmp'r in sla tèra rósa, a Bùdapest in dal 2013 e a Bad Gastein in dal 2007 e 2013, vinsénd-an òṅ. La s è misa in bisàca quìndas tìtui ITF.
Caréra
L’Yvonne la vins al sò prim tìtul ITF in dal 2003 a Sunderland (Régn Unî).
'L an dòp in Avrìl la tōś part a 'l turnèo WTA ad Bùdapest cuma pardénta furtunàda e la pasa un tùran prima ad far al valìś dabòṅ cun la nùmar trénta-quàtar dal mónd, l'ungheréśa Petra Mandula. In Maǵ i gh dànan na carta salvàdga par śugàr a Viéna e lē la riva a 'l secónd tùran dand la paga a l'itagliàna Maria Elena Camerin par 7-6 6-1 prima ad cédar a la canària Magüi Serna. In Luj la riva in finàl in d'l ITF ad Vaduz ma là la pèrd par 6-1 3-6 6-7 cun l'austragliàna Anastasija Rodionova. A gh và méj al méś dòp quànd la s mét in bisàca al tìtul ITF ad Balašicha, 6-3 6-7 6-0 a la bielurùsa Nastas'sja Jakimava, e anc in Nuvémbar cun 'n àtar turnèo ITF vins in Bélgi. La sèra 'l an a 'l 172śum pòst in clasìfica.
In dal 2005, dòp avér fat suo àtar dū tìtui ITF da vintsìnc-mila dòlar, la s qualìfica p'r al Roland Garros ma lè la fà pôca strada, andànd fóra subìt cun la Vera Zvonarëva par 3-6 1-6. In Nuvémbar la cata a 'l prim tùran d'l ITF ad Poitiers la Marion Bartoli e la gh pèrd par 5-7 3-6.
A 'l inìsi dal 2006 la śōga a Canberra e a Melbourne, faghénd secónd e prim tùran. In Mars la pèrd cun l'Al'ona Bondarenko la finàl d'l ITF 'd Orange (Stat Unî) ma in Nuvémbar la in pòrta a cà dū in Mèsic.
In dal 2007 la s fà nutàr a Biberach, vinsénd al turnèo ITF tedésc, ma incóra da piò a Indian Wells in dua, pasànd p'r al qualificasiòṅ, la dà la paga a l'Anna Tatišvili 1-6 6-3 6-3 e a la Roberta Vinci 2-6 6-2 6-4 prima ad cédar a la śvisra Martina Hingis par 2-6 4-6. A la fiṅ 'd Mars, da nùmar sènt-déś dal mónd, la śōga 'l ITF ad Latìna e la 'l fà suo purtànd-al via a la Caroline Wozniacki cun al puntéǵ ad 7-5 4-6 6-3. In Maǵ la pèrd subìt a 'l Roland Garros cun la milanéśa Francesca Schiavone mént'r a Wimbledon la vins al prim incóntar cun la Virginie Razzano prima ad cédar a la nùmar quàtar dal mónd, l'Amélie Mauresmo par 1-6 2-6. Dasfrutànd na carta salvàdga, l’Yvonne la tōś part in Luj a 'l turnèo WTA ad cà ad Bad Gastein e la riva fiṅ in fónd baténd in di quàrt la Lourdes Domínguez Lino 6-1 6-4 e in semifinàl la Karin Knapp par 6-1 3-6 6-3. In finàl però la n pōl briśa tiràr fóra da 'l frigo la butìglia ad spumànt parchè la gh'à da patìr un 1-6 4-6 da la Francesca Schiavone. Da nùmar ssanta-dū dal mónd la sa spòsta a Stucólma ma la vèṅ mandàda a cà subìt da la Stéphanie Cohen-Aloro par 6-2 6-4, stés quèl anc a gl'US Open cun l'Eleni Daniilidou ch'la la bat in dū sét. I prim tùran par lē i cuntìnuan anc a Bordeaux (ITF), Pòrtrōś, Lussembûrgh e Śurîg mént'r a Linz la pasa sōl un tùran.
La taca la stagiòṅ 2008 a Auckland baténd l'Akiko Morigami par 7-5 6-0 ma pardénd pò da la Katarina Srebotnik par 0-6 1-6. La fà secónd tùr'n anc a gl'Australian Open (3-6 1-6 da l'Ekaterina Makarova), a Bugutà (1-6 2-6 da la Mariana Duque Mariño), a Acapûlc (1-6 5-7 da l'Iveta Benešová) e a Las Vegas (3-6 4-6 da la Madison Brengle) par pò mét'r in fila siē prim tùran òṅ a drē a c'l àtar, cun in mèś na finàla pardùda in 'n ITF rumàṅ cun la Tathiana Garbin. In Luj la in pèrd 'n àtar a Śagàbria, 2-6 6-2 2-6 da la carta salvàdga ad cà Petra Martić. A Bad Gastein la và fóra in di quàrt da la francéśa Pauline Parmentier e acsè la cróda śò in clasìfica, da 'd là da la puśisiòṅ sènt. A gl'US Open la bat la Lourdes Domínguez Lino par pò cédar par 1-6 3-6 a la Katarina Srebotnik. In Utóbar la vèṅ batùda subìt a Linz da la Dominika Cibulková par 4-6 2-6.
'L inìsi dal 2009 'l è 'n diśàstar par l'austrìaca parchè la n pasa briśa 'l qualificasiòṅ a Auckland e a Sydney mént'r a gl'Australian Open la fà 'l valìś subìt ciapànd na scòpla da la Jelena Janković, nùmar òṅ dal mónd. L’Yvonne l'è custréta acsè a turnàr a pistàr i camp dal sircùit ITF a part un prim tùran a 'l Roland Garros da qualificàda (1-6 2-6 da la Lucie Hradecká). In Luj la dasfrùta na carta salvàdga par tōr part a 'l turnèo ad Bad Gastein e la fà incóra i quàrt (2-6 3-6 da la Jaroslava Švedova) pò in dal gir dna stmana la pòrta a cà in Agóst dū tìtui ITF in Germâgna e in Sluvâchia. A gl'US Open la pèrd a 'l prim tùran 1-6 2-6 da la Francesca Schiavone e la fà cumpàgn anc a Linz (6-7 1-6 da l'Urszula Radwańska).
In dal 2010 la śōga 'l qualificasiòṅ a Hobart e a gl'Australian Open. In dal prim caś la và a cà subìt pardénd in tri sét da la Roberta Vinci 6-3 5-7 2-6 mént'r a Melbourne la và avànti mulànd sù un 3-6 7-5 6-4 a la Bethanie Mattek-Sands. La Meusburger la céd pò a 'l secónd tùran a la Marija Kirilenko par 3-6 1-6. In séguit la tōś part a i turnèo WTA ad Marbella e Esturìl faghénd sèmpar prim tùran, prima cun la Viktoryja Azaranka e pò cun l'Anastasija Rodionova. A Straśbûrg e a 'l Roland Garros la riva invéci a 'l secónd tùran. A Bad Gastein la pèrd in semifinàl da la śvisra Timea Bacsinszky par 6-1 4-6 3-6. A gl'US Open la và fóra a 'l secónd tùran cun la Marija Kirilenko acsè cuma l'iva fat anc a Parì in Maǵ. La sèra 'l an mâl pardénd subìt a Linz da la Sofia Arvidsson, piasànd-as acsè a 'l 94śum pòst dal ranking.
In dal 2011 la taca a śugàr sōl in Favràr a Bugutà e a Acapûlc, vinsénd na partìda e pò basta. 'L ùnic turnèo WTA ch'l'è bòna ad far da lè a la fiṅ d'l an 'l è qvél ad Bad Gastein in dua la pèrd in di quàrt da la María José Martínez Sánchez par 6-7 6-4 3-6. La gh'à da cuntintàr-as ad śugàr tri finàli in di turnèo ITF, cun un tìtul.
In dal 2012 la n pasa briśa 'l qualificasiòṅ a Brisbane e a Melbourne. A Kuala Lumpur la và fóra subìt cun la Shuai Peng. In Luj la riva in di quàrt a Bad Gastein (3-6 2-6 da la Yanina Wickmayer), p'r al rèst la n pòrta a cà gnint àtar.
La cuntìnua a śugàr mâl anc a 'l inìsi dal 2013. In Avrìl, da nùmar 136 dal mónd, la và a śugàr 'n ITF in Tuniśìa e la 'l pòrta a cà baténd in semifinàl la Yana Buchina 6-1 1-6 6-1 e pò in finàl la Victoria Kan 6-3 6-4. L'austrìaca la in vins òṅ anc in Maǵ a Wiesbaden in Germâgna e pò 'n àtar a Grâd in Itâglia. A Wimbledon la gh la cava a pasàr al qualificasiòṅ ma a 'l prim tùran la cata la finalìsta d'l an pasâ, l'Agnieszka Radwańska, e la gh pèrd subìt par 1-6 1-6. In Luj la dvénta la prima śugadōra dal sò paéś a 'l pòst dla Tamira Paszek cun i punt muciâ sù in dal finàli WTA ad Bùdapest (3-6 7-6 1-6 da la Simona Halep) e ad Bad Gastein (al sò prim tìtul WTA in caréra, 7-5 6-2 a la Andrea Hlaváčková).