Lorna
|
C'l artìcul chè 'l è scrit in
Miranduléś |
 Lorna
| ||
| Lorna | ||
 La Lorna Maitland in na figùra dal film | ||
| id. 1964 | ||
|---|---|---|
| Regìa: Russ Meyer | ||
| Scritōr: James Griffith • Russ Meyer | ||
| Atōr: Lorna Maitland • Hal Hopper • Doc Scortt James Rucker • Mark Bradley • Althea Currier Fred Owens • James Griffith • Frank Bolger | ||
| Müsica: Hal Hopper • James Griffith | ||
| Léngua: Ingléś | ||
| Dürä dal film: 78 minüt | ||
| Nasiōṅ: Stat Unî | ||
Lorna (id.) 'l è 'n film dramàtic americaṅ dal 1964 ad Russ Meyer girâ in biànc e négar in déś dè in Califòrgna c'n un budget ad ssanta-mìla dòlar.
Par far soquànti séni cun la Lorna, specialmènt qvéli in du lē la gira cun dal braghéti curti dimóndi strichi, al regìsta 'l à fat riferimènt a la mundarìś Silvana Mangano ad Riso amaro.
Sunt
La Lorna (Lorna Maitland) l'è na biónda ch'la viṿ in un paiśèṅ ad campàgna di Stat Unî insém a sò marè Jim (James Rucker), 'n óm par bèṅ ch'al fà 'l uperàj in na mina 'd sâł insém a i sò culéga Luther (Hal Hopper) e Jonah (Doc Scortt). Purtròp a lèt al ròbi i n vànan minga cum a s dév parchè Jim al n è briśa bòṅ, dgém-la tuta.
La Lorna la pasa 'l sò tèmp a far la raśdóra in cà e 'l sò sógn al sarév qvél ad dvintàr na balarìna. Un dè 'n óm (Mark Bradley) al scapa via da parśòṅ e quànd al la cata giràr da par lē in riva a 'n fiùm al la viulénta. Turnàda in paéś la Lorna la 'l véd in mèś a la gint mo invéci ad puntàr-'g al dî la taś e la fà finta 'd gnint parchè c'l àtar dè al gh'è piaśû dimóndi e par la prima vòlta l'à sintî dal gudiōl c'n al sès.
La dóna la decìd ad tacàr na relasiòṅ sèg e la 'l tōś in cà. La gint la taca a spataglàr e Luther e Jonah, dū bruti parsòni e viulentadōr a sò vòlta, i dascóran cun Jim faghénd-ag vgnir di dubi su sò mujér, giusà cuśa fà-la tut i dè a cà da par lē.