Faster, Pussycat! Kill! Kill!
|
C'l artìcul chè 'l è scrit in
Miranduléś |
 Faster, Pussycat! Kill! Kill!
| ||
 La Tura Satana in na figùra dal film | ||
| Più in présia, Mimìna! Masa! Masa! 1965 | ||
|---|---|---|
| Regìa: Russ Meyer | ||
| Scritōr: Jackie Moran • Russ Meyer | ||
| Atōr: Tura Satana • Haji • Stuart Lancaster Sue Bernard • Ray Barlow • Lori Williams Michael Finn • Dennis Busch • Paul Trinka | ||
| Müsica: Igo Kantor • Paul Sawtell • Bert Shefter | ||
| Léngua: Ingléś | ||
| Dürä dal film: 83 minüt | ||
| Nasiōṅ: Stat Unî | ||
Faster, Pussycat! Kill! Kill! (Più in présia, Mimìna! Masa! Masa!) 'l è 'n film 'd asiòṅ americaṅ dal 1965 ad Russ Meyer girâ in biànc e négar c'n un budget ad quarànta-sincmìla dòlar.
Cunsiderâ un cult movie par di regìsta quài John Waters e Quentin Tarantino, 'l arév psû avér 'n arfacimènt a culōr, a dita 'd Meyer stés, ma pò a n s 'n è fat gnint.
Al regìsta al gh'à abû soquànt prubléma cun gl'atōri: la Lori Williams la n saìva briśa guidàr, la Tura Satana la vliva far sèmpar qvél ch'a gh parìva a lē e giràr dal séni in manéra difarènta méntar la màdar dla Susan Bernard, ch'la gh'iva séd'ś an, la s lamintàva sèmpar che Meyer al la tulìs śò sèmpar tròp pôc.
Sunt
Tri ragàsi tetóni ch'i s càvan śò par mistēr, la Varla (Tura Satana) ch'l'è la capa, la Rosie (Haji) inamuràda 'd lē in segrét, e la Billie (Lori Williams), biónda e gustóśa, i decìd'n ad far-'s un viàś in dal deśèrt druànd di machinòṅ. Lè i cgnósan na còpia 'd ragàs, Tommy (Ray Barlow) e la sò muróśa, la Linda (Susan Bernard). La Varla la sfida Tommy a 'n garèṅ par védar ch'i gh'à più stómag p'r andàr fòrt ma pò la 'l masa tut 'd un cōlp purtànd-as via la ragasōla sóta 'l efèt dla śdòrmia.
Lung la via i s férman par far al pîṅ in na stasiòṅ ad rifurnimènt e da luntàṅ i véd'n un vèć (Stuart Lancaster) su na scrana a rudèli cun sò fiōl sèg. Chi lò al gh'à di mùscui ma i al ciàman listés “Al Vegetàł” (Dennis Busch) parchè al n dascór mai. Al benśinàr (Mickey Foxx) al gh diś ch'al vèć al viṿ in un ranch in ruìna insém a i sò dū fiōi e che di bèsi al gh 'n à dimóndi.
Al tri Pussycat i decìdan 'd andàr a catàr-al par fargàr-'g incòsa.