Le fate ignoranti
|
C'l artìcul chè 'l è scrit in
Miranduléś |
 Le fate ignoranti
| ||
 Gabriel Garko in na figùra dal film | ||
| Al fati ignurànti 2001 | ||
|---|---|---|
| Regìa: Ferzan Özpetek | ||
| Scritōr: Gianni Romoli • Ferzan Özpetek | ||
| Atōr: Margherita Buy • Serra Yilmaz • Erika Blanc Stefano Accorsi • Gabriel Garko • Andrea Renzi Filippo Nigro • Luca Calvani • Koray Candemir | ||
| Müsica: Andrea Guerra | ||
| Léngua: Itagliàṅ • Turc | ||
| Dürä dal film: 106 minüt | ||
| Nasiōṅ: Itàglia • Frància | ||
Le fate ignoranti (Al fati ignurànti) 'l è 'n film dramàtic dal 2001 ad Ferzan Özpetek ch'al 'l à scrit insém a Gianni Romoli.
La pelìcula, vinsidōra 'd quàtar Nàstar 'd Argìnt, l'è stada preśentàda a 'l 51śum Fèstival ad Berlîṅ in du 'l regìsta 'l è stâ numinâ par vìnsar 'l „Ōrs 'd Òr“ andâ pò a Patrice Chéreau p'r Intimacy - Nell'intimità.
In dla culòna sunóra, firmàda da Andrea Guerra, i s càtan di pès di Tiromancino (Due destini), dla Violeta Parra (Gracias a la vida) e dla Stefania Rotolo (Cocktail d'amore).
Sunt
L’Antonia (Margherita Buy) l'è na dutōra spuśàda da piò ad déś an cun Massimo (Andrea Renzi). In famìja a và tut bèṅ a part al rapòrt difìcil ch'la gh'à cun sò màdar Veronica (Erika Blanc). Un dè però la sò vita la càmbia dal tut quànd sò marè al mōr finénd sóta na màchina e la dóna la s lasa andàr pardénd la vója 'd vìvar e finénd in depresiòṅ.
Fra gl'ugèt persunài che la védva la và a tōr in d'l ufìsi 'd Massimo a salta fóra 'n quàdar ciamâ “Al fati ignurànti” ch'al gh'iva rigalâ na parsòna ch'la gh'iva na relasiòṅ segréta sèg, un quèl ch'al squàsa dimóndi l’Antonia ch'la n s 'l iva mai gnanc imaginâ luntanamènt un lavōr dal gènar. La dóna la sènt al biśógn 'd andàr a catàr l'amànta 'd sò marè avénd-ag 'l indirìs ma quànd i gh vèran 'l us la s rénd cònt ch'l amōr segrét ad sò marè 'l éra 'n ragàs ciamâ Michele (Stefano Accorsi).
Praticamènt l’Antonia la capìs che Massimo al s éra fat in c'l apartamènt lè in dal quartēr Ostiense na secónda famìja, insém a Michele ma anc cun di àtar fnòć ch'i vìvan lè cuma Riccardo (Filippo Nigro) e Ernesto (Gabriel Garko), malâ 'd AIDS, o di àt'r emarginâ cuma na trans dla basitàglia ciamàda Mara (Lucrezia Valia), na pròfuga turca, la Serra (Serra Yilmaz), e sò fradèl Emir (Koray Candemir). A s trata 'd un mónd che l’Antonia la n à mai cgnusû e ch'la fadìga a mandàr śò.