Le barzellette
|
C'l artìcul chè 'l è scrit in
Miranduléś |
 Le barzellette
| ||
 Stefano Bigondi e Vito in na figùra dal film | ||
| Al barśeléti 2004 | ||
|---|---|---|
| Regìa: Carlo Vanzina | ||
| Scritōr: Carlo Vanzina • Enrico Vanzina | ||
| Atōr: Gigi Proietti • Vanessa Hessler • Enzo Salvi Massimiliano Giusti • Biagio Izzo • Max Cavallari Carlo Buccirosso • Ermanno Casari • Éva Henger Nadia Carlomagno • Vito • Eleonora Daniele Bruno Arena • Lorenzo Flaherty • Mariano d'Angelo Chiara Noschese • Valeria Bandino • Fabio Peluso | ||
| Müsica: Andrea Guerra | ||
| Léngua: Itagliàṅ • Emigliàṅ • Sicigliàṅ Napulitàṅ • Ingléś • Tedésc • Spagnōl | ||
| Dürä dal film: 92 minüt | ||
| Nasiōṅ: Itàglia | ||
Le barzellette (Al barśeléti) l'è na cumèdia a epiśòdi dal 2004 ad Carlo Vanzina ch'al l'à anc scrita insém a sò fradèl Enrico.
Sunt
Da 'l lubiòṅ 'd un teàtar na ragasōla in età da marè, la Clelia (Samuela Sardo), la vōl preśentàr al sò muróś, ufisiàł in divìśa (Lorenzo Flaherty), a i suo. Sò màdar (Anita Bartolucci) l'è 'd acòrd sèg ch'l è bèl dabòṅ, ch'al gh'à dla clas e ch'al gh'à 'n bèl purtamènt ma quànd chi lò al vèra bóca al gh admànda «Rompo li cojoni?».
Al sgnōr Rossi (Carlo Buccirosso) 'l è a 'l uśdàł ch'al gh'à da far-as tiràr via i càlcui a 'l fégat ma 'l cirùśig (Marco Messeri) al s la rid un po' tròp p'r i sò gust. 'N eśibisiunìsta malnét cun na ghigna cumpàgna a qvéla dal malâ (Carlo Buccirosso) al còmpra 'n gabardèṅ par far véd'r in gir cuśa 'l gh'à 'd sóta, pò al ciàma a 'l telèf'n un nùm'r a caś, qvél dl’Assunta Poppa (Anna Lelio), par far al purcùs sèg ma chi lē l'è na vècia in punt ad mòrt e la gh rispónd cumpàgn ma sōl parchè la gh'à la ragàja.
Oscar (Enzo Salvi) 'l è 'n rumàṅ gréś ch'a piga e al gh'à na muróśa dla Rumanìa, l’Olga (Dorelia Vasilescu), ch'la càmbia i culasōi a i vèć anc s'la vrév invéci far la velìna. Mént'r al la pòrta a 'l mâr al canta 'l braṅ Chiwawa dal DJ Bobo, lē la gh admànda cuś è'l e lò al gh rispónd ch'l è 'n bagàj ad trénta-tri sentìmet'r a 'l incìrca. Quànd la ragàsa la gh diś «Csa t in fà't 'd un quèl ad trénta-tri sentìmetar?», lò al vèra bóca par dir «Cuśa t in fà't? Ta gh fà na bèla figùra Amó».
Mario (Max Giusti) 'l è 'n marchigiàṅ in viàś ad nòsi a Venèsia cun la sò spóśa 'd Maceràta, la Debora (Chiara Noschese), dgém ch'a s sènt dimóndi. Al cònta na barśeléta a sò mujér su di négar salvàd'g e canìbai.
A Sènt un vìgil dimóndi catìṿ, Moruzzi (Vito), al fà la multa a 'l prevòstar Don Renato (Marcello Foschini) parchè 'l à dit ch'al gh'à sèmp'r al Pad'r Etèran ch'al gira sèg in dla sèla, dònca dū su 'n muturèṅ.
Dū fîg 'd Ìndia (Max Cavallari e Bruno Arena) i èṅ in pinsēr parchè i aṅ sintî 'n inśgnēr (Mario Patanè) cuntàr a 'n pulìtig sicigliàṅ (Corrado Scalia) un prugèt par tiràr sù 'n pònt su 'l strét ad Mesìna e par far-al i gh'aṅ da spasàr via incòsa.
Dū lumbàrd, Tunin (Max Cavallari) e Giuanin (Bruno Arena), i decìdan 'd andàr a véd'r-as un film pòran ma prima Tunin al gh'à da lugàr in dal braghi l'òca ch'al gh'iva sèg. Durànt la prujesiòṅ la bèstia la tira fóra la tèsta da la sfésa e na dóni lè davśèṅ, la Bruna (Bruno Arena), la diś a la sò amìga, la Marta (Max Cavallari), che 'l óm ch'la gh'à darènt 'l à tirâ fóra 'l uśèl. Chi lē la gh rispónd che lè i al fànan tut.
Un camarēr (Gigi Proietti) al pòrta 'n minestròṅ a 'n sò cliènt (Biagio Izzo) ma pugiànd al tónd in sla tavla al gh insfìlsa 'l pòlas dèntar e al fà àtar tant anc cun di àtar piàt. Al cliènt al próa a tastàr quèl ma pò al s arlìa sèg. Al camarēr al gh rispónd ch'al gh'à 'n infesiòṅ a 'l dî e 'l dutōr al gh'à dit ad tgnir-'l a 'l cald ùmid. C'l àt'r al salta sù dgénd-ag ad tgnir-'l in dal cûl alóra e 'l camarēr al diś ch'al 'l à bèla fat, fra na purtàda e cl'atra.
Al sgnōr Rossi al tórna a cà e sò mujér, l’Elena (Simona Guarino), la gh in diś ad tut i culōr parchè in dla bisàca dal sò giachét la gh'à catâ 'n bijét e na scatla 'd fulminànt 'd un lucàl malnét, al Las Vegas 69, in dua i s śibìsan dal purcùsi cuma l’Asia D'Argento e l’Éva Henger (Éva Henger). La dóna la gh vōl andàr a far un gir sèg par védar cum 'l è e quànd i èṅ là tut i salùtan sò marè cuma s'i al cgnusìsan bèla e s'al gh andìs da spés. Sò mujér la s arlìa, la gh cur adrē in fiṅ a 'l taxi e pò la taca a dar-ag śò cun la burséta. Al tasìsta (Biagio Izzo) al s la rid dgénd «Sgnōr Rossi a 'n ém cargàdi dal rój, ma cumpagni a qvésta chè mai».
'N óm (Gigi Proietti) al s déśda da lèt e 'l taca a dir ad cuntìnuv “Daśdòt” dapartùt. Muntâ insìma a 'n bus a gh'è òṅ (Riccardo Angelini) ch'al gh admànda parchè al ripét sèmpar cal nùmar lè. C'l àtar al gh rispónd «Cal chè 'n àtar ch'al n s fà mai i cas suo. Daśnóṿ, daśnóṿ, daśnóṿ, ...». In cal méntar Oscar al pòrta l’Olga a cà sua par far-ag cgnósar sò nunóna (Enzo Salvi). A riva dènt'r anc sò fradèl Sandro (Enzo Salvi), drugâ pódag, ch'al gh cònta ch'l è andâ a rapinàr 'n ufìsi pustàł insém a 'n sò amìg cgnusû cuma „Barone“ (Raffaele Vannoli) parchè al lavóra in un bar grand.
Mario e sò mujér in èṅ rivâ in Sardéggna e lò al gh cònta na barśeléta in dua a gh'è dū aglièṅ, al masć Quiz (Bruno Arena) e la fémna Quaz (Max Cavallari), ch'i rìv'n in un sit ad cuntadèṅ diretamènt da Plutòṅ. I padròṅ ad cà, la Teresa (Luciana Alzati) e sò marè (Alfredo Colina), i gh dànan dla pulénta da magnàr par séna e pò i gh śibìs'n ad far un scambi ad còpia parchè i èṅ curióś ad védar cum l'è far-al cun di marsiàṅ. Quànd Quiz 'l al tira fóra la Teresa la diś «Tut lè?» ma pò lò al s tira 'n uréć par ślungàr-al e c'l àtar far far-al dvintàr più grôs, pò i gùsan tut cuntènt. La matìna dòp gl'aglièṅ i partìs'n e la Teresa la dmanda a sò marè cum è-la andàda. Lò al gh rispónd ch'i marsiàṅ i èṅ strâṅ dimóndi parchè la Quaz l'à pasâ tuta nòt a tiràr-ag gl'uréci.
Al mafióś Santuzzo (Biagio Izzo) al férma òṅ (Santino La Macchia) ch'a riva in màchina da 'l sò bandi puntànd-'g un sćiòp in fàcia e urdnànd-'g ad far-as na pugnéta e subìt. Quàl là 'l ubidìs ma pò al gh in fà far n'atra. Adès ch'l è dascàrag dal tut al pōl dar un pasàǵ a sò mujér, la Carmela (Giada Albanese), ch'la gh'à da 'ndàr a Tràpani e ch'la gh'à biśógn 'd èsar scarusàda.
Pablo (Alessandro Borgese) 'l è dimóndi śò parchè al Real Madrid 'l à pardû da 'l Atletico Madrid, dònca al vōl masàr-as butànd-as śò par la fnèstra méntar la sò dóna (Lucianna De Falco) in piàsa la siga fòrt 'd a n far-al briśa. I rìv'n i pumpēr (Max Cavallari e Bruno Arena) che però, quànd 'l óm 'l è drē a stablìr-as par tèra, i tìran via 'l tlòṅ dgénd «¡Olé!».
A 'n cunvégn ad luminàri 'l inśgnēr campàṅ Quaquarullo (Biagio Izzo) al cgnós al prufesōr Schmidt (Markus Eberhard) dal pulitècnig ad Berlîṅ e 'l prufesōr Jones (Robert Mitchell Dawson) dal Massachusetts Istitute of Technology. Mént'r i dascóran, al tedésc e 'l americàṅ i ricévan dal telefunàdi e i rispóndan schisànd un chip lugâ sóta la pèla dla maṅ e dal còl, sénsa biśógn ad telefunèṅ e 'd curnéti. A Quaquarullo a gh scapa na scuréśa e 'l diś ch'a gh'è péna rivâ 'n fax.
Al pustèṅ Antonelli (Vito) al gh'à da purtàr dla pòsta a Fantuzzi (Ermanno Casari), al barìsta dna cà dal pòpul. Fóra a gh'è 'n cald da sasèṅ e Antonelli al vōl far-as sarvìr da bévar ma Fantuzzi al gh diś che lè a s sarvìs sōl i „cumpàgn“ dònca 'l vōl savēr s'l è iscrìt a 'l partî cumunìsta. Par védar s'l è òṅ di suo, al gh admànda «Chi è'l chi lò?» mustrànd-ag na foto ad Karl Marx. Vdénd ch'al n vèra bóca al gh diś ch'al n sà gnint parchè a la cà dal pòpul al gh và tròp pôc e che «La spuma a 'l ginger a n t la dag minga». I dū i vàn'n avànti acsè par dgl'atri vòlti incóra, pò a Nadàł 'l è Antonelli a tiràr fóra na foto 'd un tisi par dmandàr-ag chi 'l è. Fantuzzi al diś ch'al n al sà minga e 'l pustèṅ al salta sù dgénd-ag che s'l armagnìs méno in dla cà dal pòpul al savrév che 'l óm in sla foto 'l è qvél ch'al s ciùla sò mujér durànt al dè.
Mént'r i aparéć'n in tavla e i daṅ śò a la pólvra a i bicér, dū camarēr i s còntan i sò insùni dla nòt prima. Al prim al cònta ch'l à pasâ na nòt in sna giòstra, al secónd (Gigi Proietti) invéci a gusàr-as dal dóni da nuànta cuma la Sharon Stone, la Brigitte Bardot e la Monica Bellucci ch'i s śibìvan da par lōr. A la fiṅ al n in psiva piò anc parchè a n gh'éra gnanc 'n amìg a jutàr-al. C'l àtar al salta sù dgénd ch'al psiva ciamàr-al ma lò al gh diś ch'al gh'à pruâ a telefunàr-ag ma che lò 'l éra impgnâ a giràr in sna giòstra.
Sandro al và a cunfesàr-'s in céśa da Don Mariano (Mariano D'Angelo). Chi lò al gh diś ad cuntàr-ag tut i sò pcâ e Sandro al taca dgénd ch'un sò amìg al gh'iva regalâ na dôś ad dròga e lò 'l éra andâ subìt a far-'s-la in un bar ma pò la pólva la gh'éra cascàda śò p'r al cèso. Al prēt al gh admànda «Dònchina?» e Sandro al gh rispónd «Ag pcâ!».
Pinardi (Uccio De Santis), par far al gustóś c'n al sò cap, al gh cònta dal barśeléti: «Cuma s ciàm'la la più granda balarìna cecuśluvàca? Ciolanka Sbilenka», «Cuma s ciàm'l al più grand imbariagòs àrab? Nabir Albar», «Cuma s ciàm'l al più famóś fnòć rus? Andrei Coimaski» e via dascurénd.
Al purtēr Antonio (Biagio Izzo) al gh'à n'usesiòṅ par la sgnōra Mariotti (Nadia Carlomagno) ch'la stà in dal sò palàs. Na sira chi lē la 'l ciàma parchè a gh'è andàda via la luś in dal sò apartamènt e la gh'à biśógn 'd ajùt parchè sò marè 'l è via par lavōr tuta la nòt. La 'l ricév in sótvèsta e lò al gh cunfésa ch'al sarév prònt a dar-ag sinc-sènt euro par gusàr-la. La dóna la gh astà. Quànd a tórna a cà 'l avucàt sò marè (Francesco Guzzo), Antonio al gh diś ch'l à péna giustâ na spina ch'la n andàva piò e ch'i sinc-sènt euro ch'al gh'iva dâ in prèst la stmana prima al i à péna dâ indrē a sò mujér.