Harvey Keitel

Da Wikipedia.

C'l artìcul chè 'l è scrit in Miranduléś Emiliàn

Harvey Keitel śò in dal 2009


Harvey Keitel (New York, 13 ad Maǵ dal 1939, a s lèś ['hɑːvɪ kaɪ'tɛl] in Ingléś) 'l è 'n atōr e prudutōr americàṅ.

Biugrafìa

Fiōl dna famìja ebréja cun di urìgini ruméni e pulàchi, Keitel a séd'ś an al partìs p'r al Lìban c'n i Marines pò al tórna a New York par studiàr a 'l Actors Studio. Dòp déś an ad teàtar e na cumparsàda in dal film Riflessi in un occhio d'oro ad John Huston, al s fà cgnósar par quàtar film ad Martin Scorsese, Chi sta bussando alla mia porta?, Mean Streets - Domenica in chiesa, lunedì all'inferno, Alice non abita più qui e Taxi Driver.

Dòp al western Buffalo Bill e gli indiani ad Robert Altman, in dal 1977 al tîṅ a batéś Ridley Scott cun I duellanti. In di an Utànta la sò caréra la patìs un pôc, a 'l arcurdém giràr dimóndi film in Itàglia cun Ettore Scola (Il mondo nuovo), Roberto Faenza (Copkiller (L'assassino dei poliziotti)), la Lina Wertmüller (Un complicato intrigo di donne vicoli e delitti), Giovanni Soldati (La sposa americana), Damiano Damiani (L'inchiesta), Augusto Caminito (Grandi cacciatori) e Carlo Lizzani (Caro Gorbaciov). Al gira anc soquànt film 'd avtōr cuma Cadaveri e compari ad Brian De Palma (1986) e L'ultima tentazione di Cristo ad Martin Scorsese (1988).

In dal 1990 'l è 'l prutagunìsta d'l epiśòdi “Al gat négar” girâ par Dario Argento insém a George A. Romero in Due occhi diabolici. Sèmp'r in dal 1990 Jack Nicholson 'l al sarnìs p'r al sò Il grande inganno. 'L an dòp al tōś part a Thelma & Louise ad Ridley Scott e a Bugsy ad Barry Levinson, pò 'l è prutagunìsta di prim dū film ad Quentin Tarantino, Le iene e Pulp Fiction. In mèś Lezioni di piano dla Jane Campion, in dua al s cava śò nûd, e cun Abel Ferrara Il cattivo tenente e Occhi di serpente in du al recìta insém a la Madonna. In dal 1995 al gira cun Wayne Wang Smoke e Blue in the Face.

In dal 2002 'l è in dal cast dal film ad scarésa Red Dragon. In séguit al lavóra anc cun Wes Anderson in Moonrise Kingdom - Una fuga d'amore e in Grand Budapest Hotel.

Vita privàda

'L è stâ fidansâ da 'l 1982 a 'l 1993 cun l'atōra Lorraine Bracco ch'la gh'à dâ na fiōla in dal 1985, la Stella. In séguit al s è mis cun la Lisa Karmazin avénd-ag sèg 'n àtar fiōl in dal 2001, Hudson.

'L 11 ad Setémbar dal 2001, durànt al Fèstival dal Film ad Turònt al cgnós la śōvn' atōra Daphna Kastner ch'la dvènta sò mujér tri stmani dòp a Geruśalèm. I dū i gh'aṅ un fiōl insém, Roman, nâ in dal 2004.

Filmugrafìa

Culegamènt estéran