Catherine Deneuve

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

La Deneuve tòlta śò in dal 1969


La Catherine Fabienne Dorléac, cgnusùda méj c'n al nóm 'd art ad Catherine Deneuve (Parì, 22 'd Utóbar dal 1943, a s lèś [kat'ʁin də'nœv] in francéś), l'è n'atōra francéśa, candidàda i Prèmi Òscar dal 1992 par la pelìcula Indocina. L'è anc ambasadōra d'l UNESCO.

L'è stada spuśàda da 'l 1965 a 'l 1972 c'n al futógrafar britànic David Bailey e la gh'à dū fiōi: Christian, abû in dal 1963 da 'l regìsta Roger Vadim, e la Chiara, nada in dal 1972 da na sò relasiòṅ cun 'l atōr itagliàṅ Marcello Mastroianni.

Biugrafìa

Fiōla dna famìja 'd ardupiadōr, la Deneuve la taca a lauràr da atōra in dal 1956 cun la pelìcula Le collegiali. Anc sò surèla più granda, la Françoise Dorléac, l'iva tacâ na caréra cumpàgna prima 'd murìr a vint-sinc an in 'n incidènt in màchina. In di an Ssanta la gira dū pelìculi dimóndi impurtànti cuma Repulsion ad Roman Polański e Bella di giorno ad Luis Buñuel.

In di an Stanta la lavóra dimóndi in Itàglia girànd di film par Marco Ferreri, Mauro Bolognini, Sergio Citti e Dino Risi. In dal 1981 la vins al sò prim Prèmi César par la sò interpretasiòṅ in L'ultimo metrò ad François Truffaut. Dū an dòp l'è prutagunìsta, insém a David Bowie e a la Susan Sarandon, dal film ad scarésa patinâ Miriam si sveglia a mezzanotte ad Tony Scott.

In dal 1992 la vins al sò secónd César andànd anc in a risć ad purtàr-'s a cà 'n Òscar. In dal 1998 la ciàpa la Cópa Volpi a 'l Fèstival ad Venèsia par Place Vendôme méntar 'l an dòp la gira 'l scandalóś Pola X. A 'l inìsi di an Dumìla la tōś part insém a la cantànta Björk a Dancer in the Dark, pò la gira 'l musical 8 donne e un mistero ad François Ozon ch'l'incruśrà anc in dal 2010 in Potiche - La bella statuina.

Filmugrafìa

La Catherine a Cannes in dal 1995

Culegamènt estéran