Bella di giorno
|
C'l artìcul chè 'l è scrit in
Miranduléś |
 Belle de jour
| ||
| Bella di giorno | ||
 Jean Sorel e la Deneuve in na figùra dal film | ||
| Bèla 'd dè 1967 | ||
|---|---|---|
| Regìa: Luis Buñuel | ||
| Scritōr: Jean-Claude Carrière Joseph Kessel • Luis Buñuel | ||
| Atōr: Catherine Deneuve • Jean Sorel • Muni Macha Méril • Michel Piccoli • Geneviève Page Pierre Clémenti • Marcel Charvey • Luis Buñuel Françoise Fabian • Maria Latour • Claude Cerval Michel Charrel • Iska Khan • Bernard Musson | ||
| Müsica: René Longuet | ||
| Léngua: Francéś • Spagnōl • Móngul | ||
| Dürä dal film: 100 minüt | ||
| Nasiōṅ: Frància • Itàglia | ||
Bella di giorno (Bèla 'd dè) 'l è 'n film dramàtic dal 1967 ad Luis Buñuel trat da 'l rumànś dal 1928 Belle de jour ad Joseph Kessel. 'L à vins al Lèòṅ 'd Òr a 'l 32śum Fèstival ad Venèsia e 'l à pasâ i vint migliòṅ ad dòlar 'd incàs.
In dl'edisiòṅ itagliàna la cinsùra l'iva cavâ via tri séni in alóra cuma qvéla in dua la Séverine, da pìcula, la n vliva minga far la Prima Cumuniòṅ.
Dimóndi di vistî ch'la pòrta adòs la sgnōra Catherine Deneuve i èṅ stâ disgnâ p'r Yves St. Laurent. La “Bèla 'd dè” ch'a s dascór l'è la dóna ch'la fà la scaja 'd mistēr.
Sunt
La Séverine Serizy (Catherine Deneuve) l'è na bèla raśdóra spuśàda c'n al cirùśic Pierre Serizy (Jean Sorel) ma la śuvnòta la gh'à 'n prubléma: anc s'la vōl bèṅ a sò marè la n gh la cava briśa a gusàr sèg. La riva giùst a catàr gust a pinsàr di quèi malnét ligâ a 'l sadumaśuchìśum, al dumìni e 'l bondage. 'L óm, anc se malvluntéra, al pòrta rispèt par la Séverine e p'r al sò prubléma.
Durànt na vacànsa la cgnós la Renée (Macha Méril) e Henri Husson (Michel Piccoli). Chi lò al gh buta sèmp'r i òć adòs e a lē a n gh piàś minga cal fat lè. Turnàda a Parì la Séverine la vèṅ a savēr da la Renée ch'una dgl'amìghi ch'i gh'aṅ insém, l’Henriette, l'à tacâ a lauràr in un caśèṅ. Da 'l cant suo Henri al s fà avànti cun la Séverine e al gh rigàla dal róśi, pò al cònta anc quèl su 'n burdèl par qvéi dla clas élta, purtâ avànti par la Madame Anaïs (Geneviève Page).
La Séverine, ch'l'arcòrda da spés i tèmp ad quànd l'éra pìcula e 'n óm al la tucàva, la decìd 'd andàr a lauràr par la Madame Anaïs tut i dòpmeśdè méntar sò marè 'l è via, tant ch'i gh dàn'n al scutmàj ad „Bèla 'd dè“. In dla cà 'd piaśēr la taca a véd'r-as da spés c'n un delinquènt, Marcel (Pierre Clémenti), ch'a lèt al gh fà pruàr i śgriśōr ch'la s è sèmp'r insuniàda. La dóna la s figùra anc ad purtàr-'s a lèt Henri insém a sò marè.
Quànd Marcel al dvènta tròp gelóś, la Séverine la decìd ad dar-'g un taj c'n al mistēr dla putàna ma Marcel al n mòla minga e al gh diś ch'al cuntarà incòsa a sò marè.