Arthur Hiller

Da Wikipedia.
C'l artìcul chè 'l è scrit in Miranduléś Emiliàn
Arthur Hiller tòlt śò in dal 1970


Arthur Hiller (Edmonton, 22 ad Nuvémbar dal 1923 - Los Angeles, 17 'd Agóst dal 2016), 'l è stâ 'n regìsta canadéś candidâ a 'l Prèmi Òscar par la pelìcula Love Story, al sò film più cgnusû ad tut.

Da 'l 1993 a 'l 1997 'l è stâ 'l presidènt dl'Academy of Motion Picture Arts and Sciences.

Biugrafìa

Fiōl dna famìja 'd ebrèj emigrâ in Cànada da la Pulògna in dal 1912, Arthur al s laureâ a l'Università ad Turònt in dal 1947 ciapànd pò anc un master in psiculugìa tri an dòp.

Al taca la sò caréra da regìsta in di an Sinquànta girànd soquànt epiśòdi 'd telefìlm par la televiśiòṅ cuma Perry Mason, The Barbara Stanwyck Show, Alfred Hitchcock presenta e La famiglia Addams. In di an Ssanta al pasa a 'l schérum grand faghénd dal cumèdi ma anc di film dramàtic cuma Love Story, pelìcula da làgarmi dal 1970 in du na stòria 'd amōr la finìs mâł par via dla leucemìa ch'la lasa pôc da scampàr a la śōvna prutagunìsta, l'Ali MacGraw. Cl'òpra chè l'à vins al Prèmi Òscar dal 1971 par la culòna sunóra dòp avér ciapâ sèt candidadùri in tut. 'L an dòp al regìsta canadéś al lavóra a la cumèdia Anche i dottori ce l'hanno, film ch'in dal 1995 gl'americàṅ i aṅ decìś, par la sò impurtànsa, ad tgnìr dacàt in dla bibliutéca dal cungrès di Stat Unî.

In dal 1982 al gira Making Love, atra pelìcula cun na stòria 'd amōr ma 'sta vòlta cun di buśòṅ prutagunìsta, una dal primi a far-al. In dal 1989 l'è la vòlta ad Non guardarmi: non ti sento cun Gene Wilder. Dòp Hollywood brucia, firmâ c'n al pseudònim ad chi a n vōl minga firmàr-as, Alan Smithee, in dal 2006 al gira la sò ultma pelìcula, Pucked, cun prutagunìsta al cantànt di Bon Jovi, Jon Bon Jovi.

Filmugrafìa

Culegamènt estéran