Fratelli in erba
|
C'l artìcul chè 'l è scrit in
Miranduléś |
 Leaves of Grass
| ||
| Fratelli in erba | ||
 Edward Norton in na figùra dal film | ||
| Fradèi in èrba 2009 | ||
|---|---|---|
| Regìa: Tim Blake Nelson | ||
| Scritōr: Tim Blake Nelson | ||
| Atōr: Edward Norton • Lucy DeVito • Keri Russell Susan Sarandon • Ty Burrell • Richard Dreyfuss Randal Reeder • Tim Blake Nelson • Josh Pais | ||
| Müsica: Jeff Danna | ||
| Léngua: Ingléś • Latìn | ||
| Dürä dal film: 105 minüt | ||
| Nasiōṅ: Stat Unî | ||
Fratelli in erba (Fradèi in èrba) l'è na cumèdia dramàtica americàna dal 2009 ad Tim Blake Nelson ch'al l'à anc scrita.
La pelìcula, preśentàda a 'l Fèstival ad Turònt, l'à fat sù un migliòṅ ad dòlar a 'l incìrca a frònt 'd un cóst ad nóṿ.
Sunt
Bill Kincaid (Edward Norton) al fà 'l prufesōr ad filuśufìa in dla Brown University in dal Rhode Island in du 'l inséggna Platån. Un dè al ricév na telefunàda da Bolger (Tim Blake Nelson), amìg ad sò fradèl śmèl redneck Brady (Edward Norton), ch'al gh diś che chi lò 'l è mòrt masâ insfilsâ da 'n cōlp ad bulsòṅ. 'L insgnànt al partìs acsè subìt in aparéć p'r andàr da 'l sò parènt ch'al vivìva in un paiśèṅ d'l Oklahoma in dla regiòṅ ad Little Dixie, davśèṅ a Tulsa.
Rivâ a destinasiòṅ, Bill al s rènt cònt che Brady 'l è incóra viṿ e ch'l iva strulgâ la bala dal masamènt p'r èsar sicûr ch'al vgnis a far-ag vìśita dabòṅ parchè al gh'à da spuśàr-as cun la sò muróśa, la Colleen (Melanie Lynskey), ch'la gh'à da 'vēr fiōl. Ma qvéla lè la n è minga la sōla surpréśa par lò parchè sò fradèl al gh'à na cultivasiòṅ ad marijuana ma al s cata in di guàj esénd ch'al gh'à da dar indrē dimóndi bèsi a 'n ebrèj, Pug Rothbaum (Richard Dreyfuss), ch'al gh i iva dâ par parmét'r-ag ad tacàr al sò lavōr.
Durànt na fèsta a cà 'd sò fradèl, Bill al cgnós na ragàsa ch'la scriv dal pueśìi, la Janet (Keri Russell), e 'l s inamóra 'd lē. Chi lē, ch'la gh'à la pasiòṅ 'd andàr a pés, la fà l'insgnànta 'd létri pròpria cuma na vòlta sò màdar Daisy (Susan Sarandon) ch'adès l'è a 'l ricòvar. Brady al manda 'l sò śmèl a catàr-la a 'l uspìsi acsè tut i al pòsan védar cardénd-al lò adès ch'al s è anc tajâ i sò cavìi a la “mullet” da white trash ch'al gh'iva prima. In cla manéra chè al pōl avēr-ag 'n àlibi in maṅ p'r andàr a cupàr Pug cun 'l ajùt ad Bolger.