Rhode Island

Da Wikipedia.

C'l artìcul chè 'l è scrit in Miranduléś Emiliàn

Al Rhode Island (in rós) a 'l intéran di Stat Unî
Al stéma dal Rhode Island
La bandéra dal Rhode Island


Al Rhode Island (a s lèś /ˌroʊdˈaɪlənd/ in ingléś, scólta'l chè) 'l è 'n stat di Stat Unî ch'al s cata in dla regiòṅ dal New England e ch'al s è unî a la federasiòṅ in dal 1788. 'L è 'l stat più pìcul dal paéś avénd-ag na superfìsi ad sōi 3.140 km² ma 'l è anc pîṅ stóp ad gint, un migliòṅ abundànt, esénd pasâ sōl da 'l New Jersey in fat ad fitùm. Al 4 ad Maǵ dal 1776 l'è stada la prima dal trédas culògni ingléśi a 'rvuntàr-as cónt'r al Régn Unî.

La sò capitàl l'è Providence, granda a 'l incìrca cuma Mòdna, cun Warwick e Cranston atri sità impurtànti. Al cunfìna a nòrd e a èst c'n al Massachusetts, a sud cun 'l Ucéan Atlàntic e c'n al stat ad New York (bōrd marìtim) e a òvest c'n al Connecticut. Al sò nóm al daśvîṅ da la più granda dal sò ìśuli.

Al sò mòt 'l è „Hope“ (Spransa) mént'r al scutmàj ch'i gh'aṅ dâ 'l è „The Ocean State“ (Al stat d'l Ucéan). 'L è divìś in sinc cuntèi e in trénta-nóṿ cumùṅ. Al fiùm più impurtànt ch'a gh pas' in mèś 'l è 'l Blackstone. Al clima dal Rhode Island 'l è cuntinentàł o cuntinentàł/marìtim.

La sò guvernadōra, da 'l 2015, l'è la demucràtica Gina Raimondo. In dla sò stòria al stat l'à praticamènt sèmpar vutâ p'r al partî d'l àśan in dgl'elesiòṅ p'r elèś'r al presidènt di Stat Unî. Da 'l 1960 a vgnir a 'dès sōl in dal 1972 e in dal 1984 i 'l aṅ spuntàda i republicàṅ.

In dal 2010 la sò pupulasiòṅ la s dividìva fra 'n 81,4% ad biànc, un 5,7% ad nég'r e 'n 2,9% 'd aśiàtic. Fra i sò persunàǵ famóś a 'rcurdém la cantànta Blu Cantrell e 'l regìsta Bobby Farrelly.

Culegamènt estéran