Rednex

C'l artìcul chè 'l è scrit in Miranduléś

«

Wish you were here, don't you know the stove is getting colder and I miss you like hell and I'm feeling blue. I've got feelings for you babe, do you still feel the same, from the first time I laid my eyes on you, I felt joy of living, I saw heaven in your eyes, in your eyes. I miss your laugh, I miss your smile, I miss everything about you, every second's like a minute, every minute's like a day when you're far away.»

(EN)(Wish you were here, 1995)

«

A vrév ch'at fus chè, a n sà't minga che la stua l'è drē a dvintàr sèmpar più fréda? Ta m manc cuma 'l Inféran e a m sènt śò. A gh'ò di sentimènt par tè amór, è-la listés par tè? Da la prima vòlta ch'a t ò butâ i òć adòs, a-j-ò sintî al piaśér ad vìvar, a-j-ò vist al Paradìś in di tò òć, in di tò òć. A m manca la tò riśàda, a m manca al tò surìś, a m manca tut at tè, tut i secónd i èṅ cuma 'n mìnut, tut i mìnut i èṅ cum un giōran quand at sē luntàṅ.»

(MUD)

I Rednex i èṅ un grup dance/country śvedéś, cgnusû principalmènt par du dal sò canti di an Nuànta: Cotton Eye Joe e Old pop in A Oak.

In dal grup a n gh'è minga un cantànt sól ma tut i cumpunènt (masć e fémni) i sa spartìsan al lavōr. Cun al pasàr di an, i aṅ patî dimóndi cambiamènt, vdénd andàr e gnir bèṅ quìndas sunadōr.

Biugrafìa

Al grup 'l è n'invensiòṅ di prim an Nuànta di prudutōr śvedéś Janne Ericsson, Örjan "Öban" Öberg e Pat Reiniz ch'i ìvan pinsâ ad misćiàr la mùśica country cun al gènar d'l Eurodance, dimóndi cunsiderâ in chi an lè e ad mòda in dal vèć cuntinènt.

Al nóm Rednex al daśvèṅ da la paròla giustàda "rednecks" ch'la vōl dir gint pòvra dal pòpul, ch'la sà pòc e ch'la vèṅ da i Stat Unî o dal Cànada. I Śvedéś i càtan al sucès cantànd a la manéra dance la cansòṅ tradisiunàla folk Cotton Eyed Joe, dvintàda par lōr Cotton Eye Joe. I s faṅ cgnósar pò anc in Itâglia sunànd-la in dl'Istâ dal 1995 a 'l Festivalbar.

Dal 1994 'l è al prim àlbum Sex & violins (Sès e viulèṅ) ch'al véd in dla cupértina i grugn di sinc Rednex riflès in dla pisa śala mòsa in un bucalèṅ parchè a gh'è un cow-boy in pē ch'l è drē a impinìr-al. Al disc al gh'à dèntar trédas braṅ e dimóndi sìngui gnû fóra in dal 1995: Old Pop in an Oak, al lènt Wish You Were Here cantâ par la dóna dal grup Mary Joe (ma al sò nóm vér 'l è Karin Annika Ljungberg), Wild 'N Free e Rolling Home.

Cuma i èṅ gnû fóra, i Rednex i sparìsan par soquànt an quand in dal 2000 i tàcan incóra a calcàr al sèni ma cun na cantànta nóva, la Whippy. Cun lì lē al sò pòst, a véd la luś al disc Farm Out ch'al vénd bèṅ in Europa, specialmènt in Germâgna par via dal sìngul The Spirit Of The Hawk (la s riferìs a gl'indiàṅ 'd America).

'L an dòp l'è la vòlta ad The Chase, un sìngul vindû specialmènt in dal marcâ ad lìngua tedésca (Germâgna, Śvisra e Àustria).

In dal 2003 a vèṅ fat na racòlta ciamàda The best of the west (Al méj dal wèst, cun in cupertìna la stéla a siē punti dal serìf) ch'la fà sù i sìngui di prim dū àlbum e soquànt braṅ nóṿ ad paca (siē p'r èsar precìś) cantâ par la Scarlet a 'l sò debùt e in mèś a i quài a gh'è anc na riviśitasiòṅ dal prim sìngul, dvintâ adès Cotton Eye Joe 2002.

La stagiòṅ dla Scarlet la n dura pò minga tant in di Rednex. La gh stà sól tri an, pò la và via par cantàr da par lē e la lasa al pòst incóra a la biónda Mary Joe (ma anca lē la mularà la baràca in dal 2009).

I vèć mémbar invéci (Crock, Dagger e Ace) i èṅ sèmpar stâ stabìi in dal grup par dimóndi tèmp ma pò i vènan rimpiasâ anca lōr parchè i s éran quistiunâ.

In dal 2005 i Rednex i sònan a 'l IAAF World Championships in Athletics a Helsinki.

P'r al Swedish Melodifestivalen ad 'l 11 ad Mars dal 2006 a Goteborg, i Rednex i rìvan i finàl par mèrit dal nóṿ sìngul Mama Take Me Home e i s piàsan sèst. In dal Nuvémbar dal 2006 i rigìstran al braṅ Fe Fi (The Old Man Died), fat sintìr a i Nickelodeon Kids Choice Awards: par lōr un surprindènt quàrt pòst in dal clasìfichi dal sò paéś.

In sèguit i tàcan a culaburàr cun al grup rumên Ro-Mania.

In dal 2008 i rigìstran na canta p'r i campiunàt europèi ad balòṅ Football Is Our Religion ch'la finìs al prim pòst in Śvèsia.

Cun un cólp ad teàtar, in dal Śnar dal 2009 i vènan cambiâ tut i cumpunènt dal grup e i tórnan indrē la Scarlet, Dagger e Ace.

Discugrafìa

Tri di Rednex tòlt śò a Stucólma in dal 2008

Album

1995 - Sex & Violins
2000 - Farm Out

Sìngui

1994 - Cotton Eye Joe
1995 - Old Pop in an Oak
1995 - Wish You Were Here
1995 - Wild 'N Free
1995 - Rolling Home
1997 - Riding Alone
1999 - The Way I Mate
2000 - The Spirit Of The Hawk
2000 - Hold Me For A While
2001 - The Chase
2002 - Cotton-Eyed Joe 2002
2006 - Mama Take Me Home
2006 - Fe Fi (The Old Man Died)
2007 - Looking for a star
2008 - Football is our religion
2009 - Desert Town

Vìddeo

2003 - The Best Of The West

Culegamènt estéran