Prodigy

Da Wikipedia.

C'l artìcul chè 'l è scrit in Miranduléś Emiliàn


«
We love Rohypnol, she got Rohypnol, we take Rohypnol just forget it all, just forget it all. This baby's got a temper.»
(EN)(Baby's got a temper, 2002)
«
A nuàtar a s piàś al Rohypnol, lē la gh'à al Rohypnol, nuàtar a tulém al Rohypnol, sōl par daśmingàr incòsa, sōl par daśmingàr incòsa. Cla baghéta chè la gh'à dal caràtar.»
(MUD)


I Prodigy i èṅ un grup dance / Big Beat ingléś, furmâ a Braintree in dal 1990. I èṅ stâ al grup ch'l à purtâ in dla mùśica la cultùra raver di śóvan esénd, insém a i Chemical Brothers e a i Fatboy Slim, òṅ di grup big beat più impurtànt di an Nuànta.

Flint e Maxim di Prodigy tòlt śò in Śvisra in dal Śugn dal 2007

Biugrafìa

I Prodigy i nàsan a la fiṅ di an Utànta a Braintree, in dla regiòṅ d'l Essex, in Inghiltéra. Al grup al mét insém Liam Howlett, al rapper Mc Maxim, al cantànt Keith Flint e al balarèṅ Leeroy Thornhill. Al prim disc dal 1991 al gh'à al tìtul ad What evil lurks (Che mâl al s lóga), un lavōr dal gènar hip hop. Siē méś dòp a véd la luś al sìngul Charly (ch'la sarév pò la cucaìna) ch'al finìs subìt a 'l prim pòst dal clasìfichi dla dance ingléśa par pò rivàr anc a 'l tèrs in quéla pop. Anc i àtar dū sìngui Everybody In The Place e Fire/Jericho i s cumpórtan bèṅ dand-ag l'ucaśiòṅ ad far gnir fóra, par la prima vòlta p'r un grup rave, un àlbum a la fiṅ dal 1992, The Prodigy Experience.

In dal 1994 i regìstran la canta martlànta No good, àtar braṅ da mila mis dèntar a 'l secónd disc, Music For The Jilted Generation. Al disc 'l è fat da trédas cansòṅ, in mèś a i quàli i s càtan anc i àtar sìngui Voodoo People e Poison e la canta fata insém a i Pop Will Eat Itself Their Law.

Un prim piaṅ ad Keith Flint

In dal Mars dal 1996, in mèś a i tant impégn live, i Prodigy i faṅ gnir fóra al lōr sìngul più famóś ad tut, Firestarter (Impisadór dal fōg), cantâ par la prima vòlta da Keith Charles Flint, ch'al riva diretamènt a 'l nùmar òṅ, anc in Amèrica. Gene Simmons di Kiss al la cantarà pò anca lò in dal sò disc Asshole (Buś dal cûl) dal 2004.

In dal 1997 a véd la luś The Fat Of The Land (Al gras dla tèra), al tèrs e più vindû disc dla lōr discugrafìa (10 migliòṅ ad còpi vindùdi a rivàr a Setémbar 1998), purtâ in élt da la Firestarter d'l an prima e da di àtar sìngui cuma Breathe e la discùsa Smack My Bitch Up (A pić la mè putàna), cinsuràda in dal Régn Unî par via dal tèst e dal vìddeo dimóndi scandalóś e viulént girâ cun l'atōra pòran ingléśa Teresa May. Al disc al finìs listés a 'l prim pòst in vint-a-dū paéś (Stat Unî cumpréś) anc se i genitōr i gh daṅ adòs parchè i dìśan che Flint al fà paùra a i putèṅ e anc la cantànta Madonna, ch'la vénd al disc in di States sóta la sò etichéta Maverick, la vrév ch'i s dìsan na giustàda par via di tèst śbucâ asè, ma a lōr a n gh in fréga gnint, i vōlan far schiva dabòṅ, acsè i dìśan [1]. Al braṅ Fuel My Fire al sarà pò cantâ anc par gl'L7, un grup ad fémni rabìdi.

In dal 2002, dòp na pàuśa ad soquànt an e 'l abandòṅ ad Leeroy, al grup al fà gnir fóra un sìngul cuntruvèrs e censurâ anc quést, Baby’s Got A Temper, ch'al dascór dla madśìna Royhypnol, druàda da i drugâ pódag a 'l pòst d'l eruìna.

In dal vìddeo a s véd tri impiegâ in 'd là di an ch'i s vistìsan da i Prodigy par sunàr in mèś a dal vachi cun al diav'l adòs mèntar un dunòṅ cun na scùria in maṅ la custrìnś dal śuvnòti cavàdi śò a mùnśar in présia dal vachi p'r impinìr di bucét ad lat da véndar in un luna park pòst davśèṅ a n'indùstria inquinànta, faghénd far un muć ad bèsi a 'l negusiànt.

Liam Howlett da drē dal tastéri

In dal 2004 'l è al tùran ad Always Outnumbered, Never Outgunned (Sémp'r in pôc, mai diśarmâ), quàrt lavōr dal grup (Howlett e soquànt àtar), cun dèntar i sìngui Spitfire (cun l'atōra Juliette Lewis ch'la fà i côr) e Girls. A gh'è anc na cover dal braṅ Love Buzz di Shocking Blue (chè dèntar ciamâ Phoenix), dvintàda famóśa parchè sunàda in d'l àlbum Bleach da i Nirvana. Thriller ad Michael Jackson invéci la s pōl sintìr campiunàda in dla canta The Way It Is.

In dal 2005 a vèṅ fóra la racòlta di sìngui Their Law: The Singles 1990-2005. Par l'ucaśiòṅ a vèṅ arfàt ad nóṿ al vìddeo dla canta Voodoo People in dua un grup ad śóvan insiminî, bindâ e cun al maṅ ligàdi da drē da la schina, al taca a cùrar séns'usta ad nòt p'r al stradi dna sità, andànd a stablìr-as atàc a di mur, finénd sóta a dal màchini o ficànd-as còntra a di àlbar, mèntar i Prodigy i i tōśan śò divertî cun di telefunèṅ.

In dal 2008, cun dènt'r incóra Flint e Maxim e cun 'l ajùt ad Dave Grohl di Foo Fighters, a véd la luś Invaders Must Die (Gl'invaśōr i gh'aṅ da murìr) cun i sìngui Invaders Must die, Omen, Warrior's Dance e Take Me to the Hospital.

World's on Fire (Al mónd 'l è a fōg) l'è la sò ultma fadìga, un disc dal viṿ dal 2011.

Mémbar

Maxim di Prodigy
  • Keith Flint – vóś, balarèṅ
  • Liam Howlett – synth, tastéri, prudutōr
  • Maxim – MC, vóś

Discugrafìa

Àlbum

  • 1992 - Experience
  • 1994 - Music for the Jilted Generation
  • 1997 - The Fat of the Land
  • 2004 - Always Outnumbered, Never Outgunned
  • 2009 - Invaders Must Die
  • 2015 - The Day Is My Enemy
  • 2018 - No Tourists

da 'l Viṿ

  • 2011 - World's on Fire

Racòlti

  • 1999 - The Dirtchamber Sessions Volume One
  • 2005 - Their Law: The Singles 1990-2005

EP

  • 1991 - What Evil Lurks
  • 1995 - Voodoo People
  • 2002 - Baby's Got a Temper

Sìngui

  • 1991 - Charly
  • 1991 - Everybody in the Place
  • 1992 - Fire/Jericho
  • 1992 - Out of Space
  • 1993 - Wind It Up (Rewound)
  • 1993 - One Love
  • 1994 - No Good (Start the Dance)
  • 1994 - Voodoo People
  • 1995 - Poison
  • 1996 - Firestarter
  • 1996 - Breathe
  • 1997 - Smack My Bitch Up
  • 2004 - Girls
  • 2004 - Hotride
  • 2005 - Spitfire
  • 2005 - Voodoo People/Out of Space
  • 2008 - Invaders Must Die
  • 2009 - Omen
  • 2009 - Warrior's Dance
  • 2009 - Take Me to the Hospital

Culegamènt estéran

Nòti

  1. Prodigy cinsurâ anc da la Madóna Corriere.it, 5 'd Agóst dal 1997