Paula Ormaechea
|
C'l artìcul chè 'l è scrit in
Miranduléś |
_(9630039233).jpg)
La Paula Ormaechea (Sunchales, 28 ad Setémbar dal 1992) l'è na tenìsta argentìna vinsidōra ad nóṿ tìtui ITF.
L'è élta un mét'r e stanta, la péśa sinquànta-sèt chilo e la stà a Buenos Aires. La dróa al bras dèstar e la tira 'l arvèrs a dū maṅ anc s'al sò cōlp preferî 'l è 'l drit. La scólta i Coldplay e l'è bòna ad dascórar in Spagnōl e in Ingléś.
In dla sò caréra l'è rivàda a èsar la nùmar sinquànta-nóṿ dal mónd al 21 'd Utóbar dal 2013.
Caréra
La Paula la śóga sinc finàli ITF in dal 2011 vinsénd a Santiàgo cun la Catalina Pella, a Podgorica cun la Danka Kovinić e a Fógia cun la Renata Voráčová e pardénd a Praga cun la Lucie Hradecká e a Madrid (al nùmar nóṿ) cun la Nastassja Burnett.
L'argentìna la manda a cà la Simona Halep a gl'Australian Open dal 2012 par pò farmàr-as a 'l secónd tùran cun l'Agnieszka Radwańska. A Bugutà la ciàpa la paga da la Lara Arruabarrena Vecino in di quàrt (3-6 0-6 al puntéǵ). A 'l Roland Garros e a Birmingham la gh dà dèntar ma la pèrd listés par dū vòlti a 'l tèrs sét prima cun la Venus Williams e pò cun la padròna ad cà, l'Heather Watson.
La taca mâł al 2013 a n pasànd minga 'l qualificasiòṅ a Bisbane, a Sydney e a Melbourne. In Favràr invéci la s fà strada a Cali e a Bugutà baténd par dū vòlti la María Teresa Torró Flor e anc la Francesca Schiavone e acsè la riva prima in semifinàl (3-6 1-6 da la Lara Arruabarrena Vecino) e pò anc in finàl (1-6 2-6 da la Jelena Janković), la sò prima in dal sircùit WTA. In Maǵ la pasa 'l qualificasiòṅ dal Roland Garros e lè la riva anc a 'l tèrs tùran pardénd par 6-4 1-6 3-6 da la Bethanie Mattek-Sands. A Washington la s férma in di quàrt cun l'Andrea Petković par 6-4 1-6 3-6.
In dal 2014 la pèrd subìt a Auckland (6-7 1-6 da la Karolína Plíšková), a Sydney (6-3 6-7 2-6 da la Carla Suárez Navarro) e a Melbourne (4-6 2-6 da la Karin Knapp). A Rio de Janeiro l'è invéci cl'atra itagliàna, la Nastassja Burnett, a mandàr-la fóra in di quàrt par 7-5 2-6 5-7. In Mars la pèrd a 'l secónd tùr'n a Miami da la Petra Kvitová mènt'r a Charleston al turnèo par lē al finìs subìt cóntar la Kiki Bertens. A 'l Roland Garros la và fóra a 'l tèrs tùran paténd un séc 0-6 0-6 da la Marija Šarapova e na multa ad tri-mila dòlar par coaching[1].
Culegamènt estéran
Nòti
- ↑ Pèrdar 6-0 6-0 e patìr na multa ad tri-mila dòlar par coaching. Qvést chè 'l è quél ch'l è sucès a l'argentìna Paula Ormaechea livetennis.it, 3 ad Śugn dal 2014