Mimsy Farmer

Da Wikipedia.
C'l artìcul chè 'l è scrit in Miranduléś Emiliàn
La Mimsy Farmer tòlta śò in dal 1975


La Merle Farmer, cgnusùda méj cuma Mimsy Farmer (Chicago, 28 ad Favràr dal 1945), l'è n'atōra, pitōra e scultōra americàna.

Biugrafìa

La Mimsy, fiōla 'd 'n americàṅ e dna francéśa, la taca a lauràr in dal mónd dal cìnema a séd'ś an quànd Delmer Daves al gh śibìs na part piculìna in dal film Quella nostra estate cun Henry Fonda. In chi an lè la gira anc soquànt telefìlm cuma Perry Mason e Lassie.

La s fà cgnósar dabòṅ c'n al film More ad Barbet Schroeder. Dòp avér girâ soquànt film in di Stat Unî e in dal Régn Unî la s trasferìs in Itàglia in dua la spóśa 'l scritōr Vincenzo Cerami avénd pò na fiōla sèg, l'Aisha Cerami, atōra anc lē.

In chi an lè, prima ad separàr-as da sò marè, la lavóra c'n i fradèi Taviani in Allonsanfàn, cun Marco Ferreri in Ciao maschio ma specialmènt in soquànt film ad scarésa cuma Quattro mosche di velluto grigio ad Dario Argento, Il profumo della signora in nero ad Francesco Barilli, Macchie solari 'd Armando Crispino, Black Cat (Gatto nero) ad Lucio Fulci e Camping del terrore ad Ruggero Deodato.

In dla secónda mità di an Utànta la và a vìv'r in Frància spuśànd al scultōr Francis Poirier e la mòla 'l cìnema par dar-'s a la pitùra e a la scultùra. Al sò creasiòṅ i èṅ stadi druàdi in dimóndi teàtar francéś e anc in film famóś cuma Troy, Marie Antoinette, La fabbrica di cioccolato e La bussola d'oro.

Filmugrafìa

La Mimsy in dal film Allonsanfàn dal 1974

Culegamènt estéran