Il profumo della signora in nero
|
C'l artìcul chè 'l è scrit in
Miranduléś |
 Il profumo della signora in nero
| ||
 La Mimsy Farmer in na figùra dal film | ||
| Al parfùm dla sgnóra in négar 1974 | ||
|---|---|---|
| Regìa: Francesco Barilli | ||
| Scritōr: Francesco Barilli • Massimo D'Avack | ||
| Atōr: Mimsy Farmer • Nike Arrighi • Lara Wendel Maurizio Bonuglia • Aleka Paizi • Mario Scaccia Orazio Orlando • Carla Mancini • Jho Jhenkins Renata Zamengo • Aldo Valletti • Donna Jordan | ||
| Müsica: Nicola Piovani | ||
| Léngua: Itagliàṅ | ||
| Dürä dal film: 105 minüt | ||
| Nasiōṅ: Itàglia | ||
Il profumo della signora in nero (Al parfùm dla sgnóra in négar) 'l è 'n film ad scarésa dal 1974 ad Francesco Barilli, chè a 'l sò debùt, ch'al tōś al nóm da na pelìcula francéśa dal 1931, „Le parfum de la dame en noir“ ad Marcel L'Herbier.
La part dla Silvia da pìcula l'è fata par la Lara Wendel c'n al nóm ad “Daniela Barnes”.
Sunt
La Silvia (Mimsy Farmer) la lavōra in un laburatòri ad chìmica ad Róma. Da pìcula 'l à patî la mòrt ad sò pàdar, un marinàr, e anc ad sò màdar (Renata Zamengo) ma, in cal caś chè, par cólpa sua. Par furtùna al tèmp 'l à ścanślâ incòsa e adès a pâr ch'la gh'àppia na vita più tranquìla e pîna 'd sudisfasiòṅ.
Na sira, durànt na séna a cà da di amìg, insém a 'l sò muróś Roberto (Maurizio Bonuglia) la cgnós un prufesōr africàṅ ad suciulugìa, Andy (Jho Jhenkins), ch'al gh cònta di quèi ch'i sucéd'n incóra in Àfrica cuma 'l mési négri e la striarìa négra. La dóna la gh armàṅ mâł, chi dascōrs lè i tàc'n a squasàr-ag la mènt e a far-ag vgnir in mènt di fat brut ad quand l'éra pìcula. La s arcòrda sò màdar ch'la s vistìva 'd négar e la s dava dal parfùm quànd la gh'iva da preparàr-as par ricév'r in cà Nicola (Orazio Orlando), un sò amìg, quànd sò marè 'l éra via par lavōr. E la 'l fava p'r andàr-'g a lèt, tant ch'na sira, da putìna, la i à bcâ in dal méntar ch'i gusàvan e l'è armàśa sgnada par sèmpar.
La Silvia la taca a 'ndàr fóra 'd tèsta sèmpar da piò, c'n al sò muróś ch'al s cumpòrta in na manéra strana acsè cuma i sò vśèṅ ad cà. Quànd pò Nicola al próa a viulentàr-la, lē la 'l cópa tirànd-ag na préda in tèsta e pò la s persuàd che tut i gh l'àppian sèg. Par cal mutìṿ lè lē la gh'à da far-i fóra tut.