Matthew McConaughey

C'l artìcul chè 'l è scrit in Miranduléś

Matthew David McConaughey (Uvalde, 4 ad Nuvémbar dal 1969, a s lèś [ˈmæθjuː ˈdeɪvɪd məˈkɒnəheɪ] in Ingléś), cgnusû méj cuma Matthew McConaughey, 'l è 'n atōr americàṅ, vinsidōr dal Prèmi Òscar dal 2014 p'r al film Dallas Buyers Club.

Biugrafìa

Fiōl dn'insgnànta texàna e 'd un śugadōr ad fùtbal americàṅ, McConaughey al crés a Longview in Tèxas. Dòp avér ciapâ 'l diplòma, in dal 1988 al fà sù 'l valìś p'r andàr a star par 'n an in Austràglia in du 'l s adàta anc a far di mistēr da pôc cuma lavàr śò i piàt e 'l stramnadōr 'd aldàm e 'd sis.

Turnâ in di Stat Unî al s iscrìv a l'università 'd Austin par studiàr léǵ ma pò al capìs ch'a gh piàś da piò al mónd dal cìnema e al taca a tōr dal lesiòṅ ad recitasiòṅ e ad senegiadùra.

Al sò primi parti i riv'n in dal 1993 cun la cumèdia La vita è un sogno. In dal 1994 al gira al film ad scarésa Non aprite quella porta IV insém a la Renée Zellweger, séguit dal film Non aprite quella porta dal 1974 ad Tobe Hooper méntar 'l an dòp l'è la vòlta 'd A proposito di donne. In dal 1997 al gira dū di sò film più impurtànt, Contact ad Robert Zemeckis e Amistad ad Steven Spielberg. In dal 1998 'l è al prutagunìsta 'd EdTV.

La sò caréra la taca a crésar dimóndi c'n i film U-571 e Prima o poi mi sposo, na cumèdia cun la Jennifer Lopez. Bill Paxton al vōl la sò ghigna in dal 2001 par far al masadōr seriàł „Maṅ ad Dio“ in Frailty - Nessuno è al sicuro.

In dal 2005 al lavóra cun Al Pacino in Rischio a due pò l'è 'l tùran dla cumèdia A casa con i suoi cun la Sarah Jessica Parker, arfacimènt dla pelìcula francéśa Tanguy. In dal 2009 al gira n'atra cumèdia 'd caséta, La rivolta delle ex.

In dal 2014 McConaughey al vins al Prèmi Òscar cuma atōr prutagunìsta p'r al film d'l an prima Dallas Buyers Club in dua al fà al cowboy malâ 'd AIDS. I èṅ i an più impurtànt par la sò caréra parchè al lavóra anc par Steven Soderbergh (Magic Mike, 2012), par Martin Scorsese (The Wolf of Wall Street, 2013), par Christopher Nolan (Interstellar, 2014) e par Gus Van Sant (The Sea of Trees, 2015). Al 17 ad Nuvémbar dal 2014 McConaughey al gh'à 'l unōr 'd avér-ag na stéla a sò nóm in dla Hollywood Walk of Fame, la nùmar 2534, durànt na serimògna insém a la sò famìja e a di sò culéga.

Vita Privàda

In dal 1999 'l è stâ arestâ parchè al gh'iva dla marijuana sèg e al s éra arvultâ a i pulisiòt ch'i éran vgnû subìt dòp ch'i sò vśèṅ 'd cà i s éran lamintâ parché insém a 'l sò amìg Cole Hauser par tuta la nòt al stusàva sunànd tut nûd di bóngo.

'L è stâ 'l muróś par dimóndi an dl'atōra Sandra Bullock e pò dl'Ashley Judd, dla Salli Richardson e dla Penélope Cruz. In séguit al s è spuśâ in dal 2012 cun la mudèla braśigliàna Camila Alves ch'la gh'à dâ tri putèṅ.

Filmugrafìa

1993 - Fantasma per amore (My Boyfriend's Back), regìa ad Bob Balaban
1993 - La vita è un sogno (Dazed and Confused), regìa ad Richard Linklater
1994 - Angels (Angels in the Outfield), regìa ad William Dear
1994 - Non aprite quella porta IV (The Return of the Texas Chainsaw Massacre), regìa ad Kim Henkel
1995 - A proposito di donne (Boys on the Side) regìa 'd Herbert Ross
1995 - Submission, regìa ad Benicio Del Toro - curtumetràǵ
1995 - Judgement, regìa ad David Winkler - curtumetràǵ
1995 - Ultimo appello (Glory Daze), regìa ad Rich Wilkes
1996 - Stella solitaria (Lone Star), regìa ad John Sayles
1996 - Il momento di uccidere (A Time to Kill), regìa ad Joel Schumacher
1996 - Per amore di Vera (Larger than Life), regìa 'd Howard Franklin
1997 - Scorpion Spring, regìa ad Brian Cox
1997 - Contact, regìa ad Robert Zemeckis
1997 - Amistad, regìa ad Steven Spielberg
1998 - Newton Boys (The Newton Boys), regìa ad Richard Linklater
1998 - Making Sandwiches, regìa dla Sandra Bullock - curtumetràǵ
1998 - The Rebel, regìa ad Matthew McConaughey - curtumetràǵ
1998 - EdTV, regìa ad Ron Howard
2000 - U-571, regìa ad Jonathan Mostow
2001 - Prima o poi mi sposo (The Wedding Planner), regìa 'd Adam Shankman
2001 - Tredici variazioni sul tema (Thirteen Conversations About One Thing), regìa ad Jill Sprecher
2001 - Frailty - Nessuno è al sicuro (Frailty), regìa ad Bill Paxton
2002 - Il regno del fuoco (Reign of Fire), regìa ad Rob Bowman
2003 - Come farsi lasciare in 10 giorni (How to Lose a Guy in 10 Days), regìa ad Donald Petrie
2003 - Tiptoes, regìa ad Matthew Bright
2003 - Scatto mortale - Paparazzi (Paparazzi), regìa ad Paul Abascal - cameo
2005 - Sahara, regìa ad Breck Eisner
2005 - Rischio a due (Two for the Money), regìa ad D. J. Caruso
2006 - A casa con i suoi (Failure to Launch), regìa ad Tom Dey
2007 - We Are Marshall, regìa ad McG
2008 - Tutti pazzi per l'oro (Fool's Gold), regìa 'd Andy Tennant
2008 - Tropic Thunder, regìa ad Ben Stiller
2008 - Surfer, Dude, regìa ad S.R. Bindler
2009 - La rivolta delle ex (The Ghosts of Girlfriends Past), regìa ad Mark Waters
2011 - The Lincoln Lawyer, regìa ad Brad Furman
2011 - Killer Joe, regìa ad William Friedkin
2011 - Bernie, regìa ad Richard Linklater
2012 - Magic Mike, regìa ad Steven Soderbergh
2012 - The Paperboy, regìa ad Lee Daniels
2012 - Mud, regìa ad Jeff Nichols
2013 - Dallas Buyers Club, regìa ad Jean-Marc Vallée
2013 - The Wolf of Wall Street, regìa ad Martin Scorsese
2014 - Interstellar, regìa ad Christopher Nolan
2015 - The Sea of Trees, regìa ad Gus Van Sant

Culegamènt estéran

Àtar prugèt

Wikiquote contiene citazioni di o su Matthew McConaughey
Wikimedia Commons contiene file multimediali su Matthew McConaughey