Il momento di uccidere (film 1996)
|
C'l artìcul chè 'l è scrit in
Miranduléś |
 A Time to Kill
| ||
| Il momento di uccidere | ||
.png) Kiefer Sutherland in na figùra dal film | ||
| Al mumènt ad masàr 1996 | ||
|---|---|---|
| Regìa: Joel Schumacher | ||
| Scritōr: John Grisham • Akiva Goldsman | ||
| Atōr: Matthew McConaughey • Samuel L. Jackson Sandra Bullock • Kevin Spacey • Oliver Platt Charles S. Dutton • Brenda Fricker • John Diehl Nicky Katt • Kiefer Sutherland • Donald Sutherland Beth Grant • Patrick McGoohan • Ashley Judd Tonea Stewart • Chris Cooper • Anthony Heald | ||
| Müsica: Elliot Goldenthal | ||
| Léngua: Ingléś | ||
| Dürä dal film: 149 minüt | ||
| Nasiōṅ: Stat Unî | ||
Il momento di uccidere (Al mumènt ad masàr) l è 'n film dramàtic dal 1996 ad Joel Schumacher trat da 'l rumànś umònim ad John Grisham.
La pelìcula l'è custàda quarànta migliòṅ a 'l incìrca, siē finî in bisàca dla prutagunìsta dóna, la Sandra Bullock, ma la 'n à fat sù da piò ad sènt-sinquànta.
Sunt
Mént'r i èṅ in gir su 'l sò pick up trucâ, cun na bandéra di stat cunfederài a i vēdar, a far dal cativèri a i négar in un paiśèṅ dal Missisìpi, i dū rasìsta biànc Billy Ray Cobb (Nicky Katt) e James Louis Willard dit Pete (Doug Hutchison) i incróśan par strada na putìna 'd déś an 'd culōr ciamàda Tonya (RaéVen Kelly), fiōla d'l uperàj Carl Lee Hailey (Samuel L. Jackson). Dòp avēr-la ligàda e viulentàda a tùran, i dū óm i próvan prima a impicàr-la a 'n àrbul, ma 'l ram al sa scavśa p'r al pēś, pò i la bùtan śò p'r un pònt. Cardénd-la mòrta, chi lōr i vàn'n a bévar quèl in un bar.
La putìna però la s salva e, turnàd a cà, la cònta incòsa a i suo. Al sierìf Ozzie Walls (Charles S. Dutton) al mét i criminài in parśòṅ. Quànd Carl Lee però al capìs ch'l è fàcil ch'la n gh'arà mia giustìsia listés, esénd in un pòst dal sud di Stat Unî in dua i dirìt di négar i èṅ da spés butâ in dal rusc, al tōś un sćiòp e 'l masa chi dū delinquènt là in tribunàł. Durànt i spâr a 'rmàgn frî al pulisiòt Dwayne Looney (Chris Cooper) ch'al pèrd na gamba.
A diféndar 'l óm a prucès, in dū a gh'è 'n giùdas minga tant gustóś, Omar Noose (Patrick McGoohan), a gh'è 'l avucàt Jake Tyler Brigance (Matthew McConaughey), jutâ p'r i sò culéga Harry Rex Vonner (Oliver Platt), Lucien Wilbanks (Donald Sutherland), radiâ da 'l alb, e l′Ellen Roark (Sandra Bullock), rivàda diretamènt da la liberal Boston par lauràr sèg a gràtis. Da 'l cant suo 'l prucuradōr distretuàł Rufus Buckley (Kevin Spacey) al fà da tut par far-al cundanàr a la cambra a gas. Anc di mémbar dal Ku Klux Klan, cuma Freddie Lee Cobb (Kiefer Sutherland), fradèl ad Billy Ray, Stump Sisson (Kurtwood Smith) e Winston (Tim Parati), i dànan cónt'r a la diféśa, prima bruśànd la cà 'd Jake e pò piciànd l′Ellen.
Quànd a s sarnìs la giurìa pupulàr, fata tuta 'd biànc, al destîṅ ad Carl Lee al pâr sgnâ.