La nuvola
|
C'l artìcul chè 'l è scrit in
Miranduléś |
 The Beta Cloud
| ||
| La nuvola | ||
 John Hug in na figùra dal telefìlm | ||
| La nuvla 1976 | ||
|---|---|---|
| Gènar: Fantasiénsa | ||
| Stagiòṅ: 2 | ||
| Epiśòdi: 14 | ||
| Regìa: Robert Lynn | ||
| Scritōr: Fred Freiberger | ||
| Atōr: Martin Landau • Barbara Bain • Nick Tate Catherine Schell • Tony Anholt • Zienia Merton John Hug • Roy Everson • Robert Reeves | ||
| Mùśica: Derek Wadsworth | ||
| Duràda: 52 minùt | ||
| Léngua: Ingléś | ||
| Nasiòṅ: Régn Unî • Stat Unî | ||
La nuvola (La nuvla) 'l è 'l quaturdicéś'm epiśòdi dla secónda série dal telefilm Spazio 1999 (Spasi 1999) dirèt par Robert Lynn e ambintâ 1503 dè dòp al dastàc da l'òrbita dla Tèra. 'L è stâ prudót par la britànica ITC cun 'l ajùt ad Fred Freiberger e di sò bèsi americàṅ.
La senegiadùra 'l è ad Fred Freiberger che chè al s firma cuma “Charles Woodgrove”. Al telefilm 'l è stâ pò girâ in dal Luj e in d'l Agóst dal 1976. 'L è stâ traśmìs par la prima vòlta in televiśiòṅ al 16 ad Dicémbar dal 1976.
Trama
Dimóndi di abitànt 'd Alpha i tàc'n a 'vér di mancamènt e a star mâł in dal méntar che na nuvla misterióśa la s davśìna a la Luna. Fra i prim a ès'r-an culpî i èṅ al cmandànt Koenig (Martin Landau) e pò anc la dutōra Russell (Barbara Bain) e Alan (Nick Tate). Sōl pôchi parsòni i èṅ bòni ad reśìstar cuma la Maya (Catherine Schell), la Sandra (Zienia Merton), 'l astrunàuta Bill Fraser (John Hug) e Tony (Tony Anholt) ch'al tōś al cmand parchè John al n stà minga in pē.
Da 'l spasi a tórna indrē n'Àquila ma insìma a n gh'è minga al pilòta ch'a gh'iva da guardàr-ag dènt'r a la nuvla ma na criatùra ch'la s insfìlsa in dla baś. La nuvla la taca a dascórar e la diś a Tony ch'al móstar 'l è lè par fargàr-'g al sistéma 'd mantenimènt ch'al gh sarvìs a lē, ch'a gh daspiàś par lōr ch'i gh'aṅ da murìr ma a n s pōl far àtar, al sistéma a gh vōl, punt e basta.
Tony e la Maya i faṅ da tut par farmàr la criatùra ma a n gh'è gnint da far. Lì lē l'è bòna ad scampàr a i làśèr, a i mìsii, a 'l clôr, a 'l vōd e a na carga 'd energìa preparàda da Fraser su indicasiòṅ dla Sandra. Quànd a pâr ch'a sia rivàda la fiṅ, Tony al diś a la Maya ch'al gh vōl bèṅ e al la baśa. Subìt dòp la Maya la capìs ch'al móstar al n è mia 'n èsar vivènt ma sōl un robot. La s trasfórma acsè in na béga p'r andàr da 'n uréć a dastrùśar, giùst in tèmp, i sò sircùit cumputeriśâ ch'i s càt'n in dla sò tèsta. Quànd al robot al śmét ad funsiunàr, la nuvla la sparìs da par lē e Alpha l'è salva.
C'n un bras rót durànt la lòta, Tony al diś a la Maya che prima al schersàva quànd al gh'iva dit ad vlér-ag bèṅ e lē la s 'n in và miténd-'g al muś.