La mano sulla culla
|
C'l artìcul chè 'l è scrit in
Miranduléś |
 The Hand That Rocks the Cradle
| ||
| La mano sulla culla | ||
 L'Annabella Sciorra in na figùra dal film | ||
| La maṅ in sla cuna 1992 | ||
|---|---|---|
| Regìa: Curtis Hanson | ||
| Scritōr: Amanda Silver | ||
| Atōr: Annabella Sciorra • Rebecca De Mornay Matt McCoy • Julianne Moore • Madeline Zima Ernie Hudson • John de Lancie • Kevin Skousen Mitchell Laurance • Todd Jamieson • Laura Ferri | ||
| Müsica: Graeme Revell | ||
| Léngua: Ingléś | ||
| Dürä dal film: 110 minüt | ||
| Nasiōṅ: Stat Unî | ||
La mano sulla culla (La maṅ in sla cuna) 'l è 'n thriller dal 1992 ad Curtis Hanson. 'L à fat sù da piò 'd utànt'òt migliòṅ ad dòlar a frònt 'd un cóst 'd ùnd'ś e sèt e 'l à vins al prèmi dla giurìa e dal pùblic a 'l Fèstival ad Cognàc dal 1992.
A 'l èstar 'l è cgnusû cuma “La main sur le berceau” in Frància, “La mano que mece la cuna” in Spaggna, “Die Hand an der Wiege” in Germâgna e “A Mão Que Embala o Berço” in Purtugàl.
Sunt
Mike Bartel (Matt McCoy) e la Claire (Annabella Sciorra), na dóna cun di prubléma 'd àśma, i eṅ spuśâ e i gh'aṅ na bèla putìna, l’Emma (Madeline Zima), e 'n àtar 'l è drē a rivàr. Durànt na vìśita c'n al sò nóṿ ginecòlug, al dutōr Mott (John de Lancie), chi lò al gh próa miténd-'g al maṅ adòs. La dóna la s tira indrē e pò la in dascór cun sò marè ch'al gh cunsìlia 'd andàr a la pulisìa. Anc s'la n al denùnsia minga, al sò far-'s avànti al dà curàǵ a di atri dóni ch'i còntan 'd avér patî anc lōr un quèl dal gènar da lò. Par la vargógna, lì lò al s cópa pôc tèmp dòp.
Dòp al funeràł la mujér dal mèdag, anca lē gravda, la vèṅ a savēr che tut i sò bèṅ e qvéi ad sò marè i èṅ stâ mis śóta sequèstar p'r al Stat e ch'la gh'à dònca da lasàr la cà. P'r al strèss e p'r un strabùc la dóna la pèrd al sò putèṅ e la n in purà avér gnanc piò in di an a vgnir parchè i dutōr i èṅ custrét a far-ag n'isterectumìa. Da 'n telegiunràł la cgnós almànc al nóm dla dóna ch'l'à vèrt al bèc par prima, la sgnōra Bartel, ch'invéci l'à parturî 'l suo.
In cal méntar la Claire la tōś a lauràr sèg 'n óm ch'al n gh'è mia tant cun la tèsta, Solomon (Ernie Hudson), par jutàr-la a mét'r in pē na sèra ad fiōr e na ramàda 'd intór'n a cà ma la gh'à biśógn anc dna badànta p'r i sò dū fiōi pìcui. Quànd a s preśènta la dólsa Peyton Flanders (Rebecca De Mornay), che pò la sarév pròpria la mujér dal dutōr Mott mascràda, lē la la tōś sèg anc parchè la Peyton la fà finta ad tiràr via a 'l ùltim minùt un buclèṅ da la cuna che lē la gh'iva mis ad prupòśit, c'n al risć véra 'd èsar mandâ śò p'r al putèṅ. Cla sira lè la Peyton la và in dla cambra dal neunâ a dar-'g al sò lat. Adès tut qvél ch'la vōl lē 'l è ruinàr la vita dla Claire, cuma lē la gh'à fat a sò vòlta, purtàr-ag via sò marè, tgnir-'s i sò putèṅ e far-as finalmènt la famìja ch'l'à sèmpar pascâ.
La Peyton la dvènta amìga subìt dl’Emma e ninsòṅ a pōl sōl pinsàr a qvél ch'la gh'à in dla suca. Sōl la Marlene (Julianne Moore), amìga 'd famìja e èx muróśa ad Mike, la naśa quèl ad strâṅ. Un dè Solomon al véd c'n i sò òć al putèṅ di Bartel titàr da la Peyton che però la fà in tèmp a dar-'g a mènt. Par paràr-al via, la fà crédar a la Claire che lò al faga 'l purcùs cun l’Emma e par far-as crédar la fà catàr dal mudandìni dla putìna in dal sò carét. Mandâ via 'l óm, la Peyton la gh'à camp lìbar p'r i sò tragatèṅ e l'insfìlsa 'n impisafōg dla Marlene in dal braghi ad Mike. La Claire la 'l bèca durànt la sò fèsta ad cumpléan e la s arlìa sèg davànti a tut i òspit dgénd che lò al gh fà i còran.
Quànd la Claire la dmanda a sò marè ad partìr p'r un viàś sénsa la badànta, parchè l'iva capî ch'in lē a gh'è quèl ch'a traśa, la Peyton la trapla 'd cupàr-la in dla sèra fagénd in manéra ch'al téǵ ad vēdar al végna śò vrénd la pòrta. I sò piàṅ i vaṅ in fum quànd la Marlene la capìs chi la sia dabòṅ, la mujér dal dutōr Mott. Andàda a cà di Bartel par cuntàr incòsa a la sò amìga, la dóna la fà 'l śbali ad dascórar prima cun la Peyton ch'la la spedìs acsè in dla sèra dgénd-ag ch'la Claire l'è là. Invéci ad catàr-ag la sgnōra Bartel, la Marlene la cata la mòrt.
Quànd la Claire la tórna a cà e la véd al cadàvar dla sò amìga, a gh vèṅ 'n atàc 'd àśma p'r al spavènt. A n cavànd-'g-la piò a tiràr fiâ, la dóna la cur subìt in cuśìna par druàr un sprusèṅ p'r al sò mâł ma a n gh'è gnint da far. La Peyton la i à vudâ tut e anc s'la Claire, c'n al lansōr adòs, la rana in tut i casét, la n cata gnint ch'a pòsa jutàr-la.