Gran Mazinga

Da Wikipedia.

C'l artìcul chè 'l è scrit in Miranduléś Emiliàn

Al Gran Mazinga


Al Gran Mazinga (グレートマジンガ in giapunéś, Gurēto Majingā) 'l è 'n robot d'l anime c'n al stés nóm, creâ p'r al senegiadōr Gō Nagai.

'L è stâ creâ da 'l prufesōr Kenzo Kabuto par diféndar la Tèra da 'l pòpul di Mikenes tulénd spunt da 'l prugèt ad Mazinga Z ad sò pàdar Juzo ma druànd la léga “Nóva Zeta” ch'l'al rénd incóra più fòrt.

Al robot 'l è élt 25 métar p'r un pēś ad trénta-dū tunelàdi. 'L è bòṅ ad cùr'r a 450 km/h e anc ad vulàr sóta 'l cmand ad Tetsuya Tsurugi ch'al s culéga sèg insfilsànd 'l aparéć da casa Brain Condor in dal sò tèsta durànt na manòvra 'd tacamènt. Cl'uperasiòṅ chè la partìs quànd Tetsuya, sigànd “Mazinga fóra!”, 'l al fà vgnir fóra da 'l mâr in du 'l è lugâ, darènt a la Furtésa dal Siénsi.

Durànt i cumbatimènt c'n i móstar gueriér nemìg al dróa gl'armi chè 'd sóta:

  • Amplificadōr o Great Booster: aparéć a “ali” fat cun la Nóva super-léga Z druâ par vulàr a livèl Mach 5 e p'r èsar sparâ cónt'r i nemìg par scavśàr-i in dū;
  • Gran boomerang: fèr rós a "V" dastacâ da 'l pèt e tirâ adòs a i nemìg cuma 'n boomerang par tajàr-i;
  • Gran Stravènt: stravènt spavintóś ch'al partìs da la sò bóca;
  • Mìsil làśer: silta da 800.000 volt sparàda puntànd al sò ìndas cónt'r i nèmig, cun l'energìa ch'la s fà sù in cal méntar faghénd trunàr al cēl e muciànd-la sù par mèś di sò còran śai;
  • Mìsil sentràł: mìsil sparâ da na sfésa ch'la s vèra in dla part basa dla pansa;
  • Ónda 'd fōg: raś 'd energìa ślada sparàda da 'l fèr rós a "V" ch'al s cata su 'l sò pèt;
  • Pugn atòmig: maṅ stricàdi a pugn ch'l è bòṅ ad dastacàr da i bras par butàr-i cónt'r i nemìg;
  • Pugn atòmig prilànt: versiòṅ più putènta di pugn atòmig, strulgàda da 'l prufesōr Tonda, in du i pugn i prìl'n in présia cun dal lami ch'i s śōntan par śbragàr incóra da piò;
  • Punta 'd asàł: punta ch'la salta fóra da i sò śnòć druàda par scurtlàr i nemìg durànt i cumbatimènt còrp a còrp;
  • Raś futònig: raś 'd energìa foto-atòmica ad culōr rós sparâ da i sò òć;
  • Raś gama: raś 'd energìa a 40.000 grâd sparâ da 'l fèr rós a "V" ch'al s cata su 'l sò pèt;
  • Spàda diabòlica: spada ch'la salta fóra da 'l sò còsi;

Finìda la guèra cóntar 'l eśèrcit d'l Imperadōr di Scûr, al Gran Mazinga al finìs in un muśèo insém a Mazinga Z.