George Clooney

Da Wikipedia.

C'l artìcul chè 'l è scrit in Miranduléś Emiliàn

George Clooney tòlt śò in dal 2011


George Timothy Clooney, cgnusû méj cuma George Clooney (Lexington, 6 ad Maǵ dal 1961) 'l è 'n atōr, regìsta, senegiadōr e prudutōr americàṅ ch'l à vins tri Golden Globe e 'n Prèmi Òscar.

Biugrafìa

Da śóvan al taca a lauràr vindénd di vistî da óm, dal scarpi da dóna, dal tabàc e dal pòlisi 'd asicurasiòṅ andànd a cà dla gint. In dal 1978 al fà la cumpàrsa in televiśiòṅ faghénd na part in dla miniserie Colorado par la NBC. In séguit al gh la cava a ciapàr na part impurtànta in dla sitcom P/S - Pronto soccorso in du 'l lavóra insém a Elliott Gould.

Al taca anc a far 'l atōr in soquànt film ad scarésa cuma La scuola degli orrori (La scóla dal scarési) e Il ritorno dei pomodori assassini (Al ritóran di pamdòr sasèṅ).

Al sucès internasiunàl al riva però faghénd la part dal dutōr Douglas Ross dit Doug in dla sèrie E.R. - Medici in prima linea, da 'l 1994 a 'l 1999.

In dal 1996 al ròbi i s métan bèṅ anc a 'l cìnema quànd al rècita, insém a Quentin Tarantino, Harvey Keitel e la Juliette Lewis, in dal film Dal tramonto all'alba (Da 'l tramònt a l'alba) ad Robert Rodríguez. A cal punt lè, 'l us 'd Hollywood al s vèra dal tut e George al mét insém un sucès da drē a c'l àtar cuma Un giorno per caso (Un dè par caś) con la Michelle Pfeiffer e The Peacemaker (Al mediadōr ad paś) cun la Nicole Kidman.

In dal 1997 al fà la part ad Batman in dal film Batman & Robin ad Joel Schumacher e 'l an dòp 'l è Jack Foley in dal film Out of Sight ricitâ insém a la Jennifer Lopez. A s trata dal prim di sò tant lavōr cun al regìsta Steven Soderbergh.

Clooney insém a 'l presidènt Obama

In dal 2000 al lavóra cun i fradèi Coen in dla cumèdia Fratello, dove sei? (Fradèl, in du sē't?) e in dal 2001 incóra cun Soderbergh cun Ocean's Eleven, un film pîṅ ad stéli (Brad Pitt, Elliott Gould, Matt Damon, Andy García, la Julia Roberts e l'Angie Dickinson) ch'l à fat sù un muć ad bèsi e dū sèguit (Ocean's Twelve dal 2004 e Ocean's Thirteen dal 2007).

In dal 2002 al gira al sò prim film, Confessioni di una mente pericolosa (Cunfesiòṅ dna mènt periculóśa) e pò Good Night, and Good Luck. (Bòna nòt e bòna furtùna), preśénta a Venèsia in dal 2005, ch'al trata al téma dal macartìśum. Sèmp'r in c'l an lè al lavóra in Syriana, didicâ a Robert Baer, ex agènt dla CIA. Par cla part chè, Clooney al ciàpa 'l Prèmi Òscar.

In dal 2009 al rècita in dal cumèdia L'uomo che fissa le capre (’L óm ch'al tîṅ 'd òć al cavri).

Clooney 'l è famóś anc par 'l apòǵ ch'al dà a 'l càuśi umanitàri e a 'l Partî Demucràtic di Stat Unî e a Barack Obama in particulàr. 'L à visû par 18 an cun un ninèṅ ad 130 chilo in ciamâ Max.

George, ch'al gh la cava a dascórar anc in Itagliàṅ, al gh'à dal vili in sal lâg ad Còm. 'L è stâ spuśâ par quàt'r an cun la fiōla ad Martin Balsam, Talia. Da 'l Luj dal 2009 a 'l Śugn dal 2011 'l è stâ insém a l'Elisabetta Canalis. Dòp na stòria cun la lutadōra Stacy Keibler[1], al 29 ad Setémbar dal 2014 al s è spuśâ cun l'avucàta libanéśa naturaliśàda britànica Amal Alamuddin.

Filmugrafìa

George a 'l Fèstival ad Venèsia 2009
Clooney a Cannes cun la Julia Roberts
George Clooney in na foto dal 2000
'L atōr insém a sò mujér, l'Amal

da Atōr

da Regìsta

Culegamènt estéran

Nòti

  1. Dòp la Canalis Clooney al sarnìs la lutadóra iltempo.it, 4 'd Agóst dal 2011

Àtar prugèt