Emeja linguestga

St’artéchel ché ’l é stê scret int la koinè Emijana.

La spartisioun di dialet dla laingua Emijana.

Al stêd itajan, quand l’à dsidû ed instituir el regioun, l’à brixa fat di cunfein pulid cumainter ch’al eira drej a trasêr el frunteir str’el regioun sau. Cunpagn a’j êtri regioun dl’Êit’Itaja, l’Emeja-Rumagna, e cun li l’Emeja, la puseid mega socuant teritôri ch’i·s câten faura dl’Emeja-Rumagna, paró i en par laingua o par stôria emijan. I cunfein geugrafgh cunvensiunêj (quej dla regioun Emeja-Rumagna) dl’Emeja i en: i fiom Sèlar prema e Rain pau a mateina, ch’la sepêren de la Rumagna; al Pò ed soata, a’l cunfein cun la Lunbardie es al Vènet; dedsoura al Apenein, a’l cunfein cun la Tuscana e la Liguria.

L’Emeja la fa, intinimaud, pêrt dla Lunbardie stôrica.

L’Emeja linguestga vesta de’l intêren, cun i cunfein pruvinsiêl, anch quej fôra dla regioun aministrativa.

I cunfein dl’Emeja linguestga i tauln a’l lour intêren anch:

• la pêrt vêrs al Pò dla pruveinsa ed Mantva (coun pur al sau cheplaugh);
• di teritôri ch'i·s câten del band ed Caxelmazour e Vidana str’el pruveins ed Mantva e Carmouna;
• la Transpadana fraraixa int la pruveinsa ed Ruigh, int al Vènet;
• l'Ultrapò pavaix int la pruveinsa ed Pavie;
• al Turtunaix in coala ed Lisandria;
• el band ed Sarzana int la pruveinsa ed Speiza;
• la pruveinsa dla Mâsa e Carêra;
• del vault la Garfagnana int la pruveinsa ed Loca, sturicamaint têra ed Môdna e Rèz;
• Pêvna int al cmon dla Sanbuga int la pruveinsa ed Pistoaja;
• e pêrt dal cmon, par la pió rumagnaul, ed Firansaula int la pruveinsa ed Fiurainsa.