Cerēto Lêgh
|
C'l artìcul chè 'l è scrit in
Arzân |
Cerēto Lêgh (Cerreto Laghi in italiân) l'é 'na frasiòun dal cmûn ed Culâgna int la pruvîncia ed Rèz l'é 'na stasiòun per siêr cgnusûda ed l' Apenèin Tôsch-Emiliân.
La só puşisiòun la fa sé ch' la sia frequentêda mia sōl da gînta ch' la deşvîn da la pruvîncia ed Rèz mó ânca da gînta ch' la deşvîn da la Lunigiâna e in perticulêr dal pruvînci ed Mâsa-Carêra e da La Spèsia.
Geograféia
Cerēto Lêgh a 's câta a cîrca 2 chilômeter tra mezdé e matèina dal Pâs dal Cerēto a dóve l'é unî cun la strêda pruvincêla (SP 58) ch' la s' unés a la SS63 prôpria insém al pâs.
Al nòm dal pôst al deşvîn da laghèt ch' a gh'é in zôna: al Lêgh Ceretân l'é davânti a la piâsa dal paèis, pió vêrs vâl a 's câten i lêgh Scûr, Al Gôri e Prânda. Al cèinter abitê l'é a 1.300 mēter 'd altèza e l'é pôst lòngh al fiânch a nôt dal Mûnt La Nûda (1.894m.).
Cerēto Lêgh l'é fât préma ed tót da albêregh, negôsi e secòndi cà, cun na popolasiòun, ch' la ghe stà ed cà, ed: 118 persòuni. [1]
D' invêren
La stasiòun l'é fâta da 16 chilômeter ed pésti 'n dóve a 's pōl fêr dal scì alpèin, per un totêl 'd 11 pésti servî da 4 impiânt per turnêr só. Dal piasêl dal Lêgh Ceretân a 's và int la zôna d' ariv e partèinsa dal pésti Zêro, Ûn, Dû e Trî ch' a fân l' istèsa rîva cun divêrs percōrs atravêrs un bôsch ed pêla e sèr. La partèinsa se de sté pésti divêrsi l'é int la pêrta d'ed sōver dal bôsch, aşvèin al rifûg La Pièla a 1.650 mēter.
Int la zôna atâch a l' arîv ed la segiovéia a quâter pôst cun partèinsa dal Lêgh Ceretân a gh'é 'n êter impiânt a trî pôsta ch' al pôrta fîn a la séma dal Mûnt La nûda. Da la séma dal mûnt a 's pōl fêr 3 disèişi divêrsi ch' a vân a unîres int al j êtri quâter pésti ed préma e in pió l'é pusébil girêr vêrs la pésta Belfiore, ch' la fà la rîva ed la muntâgna ch' la và int al fiânch a sîra. Tóti sté pésti e i relatîv colegamèint a 's pōlen arfêr a la categoréia dal "pésti ròsi" mēno 'na disèişa divêrsa dal Mûnt La nûda, giudichêda tr' al "nîgri".
A sté pésti a vân zuntê al câmp e-scōla cun di tapi roulant e al skilift Tornello aşvèin al Legh Ceretân cun l'arîv fîn sòta al Lêgh Prânda. Sté ûlma pésta, acsé cm' al circuît ed fònd 'd atōren al Lêgh Pânda (12 km), a pōlen èser sarê perché an gh'é mia j impiânt per la nèiva artificêla preşèint invēci in ch' al j êtri pésti. A círca metê strêda tr' al rifûg La Pièla e al Lêgh Ceretân, ch' a s' égh pôl rivêr dal pést 1 e 2 , l'é stê preparê un snow-park (ZanziPark) per a chî 'gh piêş al snowboard.
A chî 'gh piêş i spòrt invernêl al pōl in pió druvêr al Palsèt dal Giâs ch' l' é lòngha la pruvincêla préma dal cèinter dal bōregh. L' impiânt l'é dal gèner olimpiônich e lì* apruvê per ògni gèner 'd ativitê al quacê. Ed règola l'é avêrt int al tèimp ed la stagiòun ed l'invêren e in istê cun 'na fermêda int i mèiş ed mâg e zógn.
D' istê
Cerēto Lêgh a 's câta int al Pêrch Nasionêl ed l' Apenèin Tôsch-Emiliân e int la bèla stagiòun l'é al pûnt ed partèinsa de şgambinêdi a pē, a cavâl, e biciclèti da muntâgna vêrs, per eşèimpi, al Mûnt Êlt, al Surşèi dal Sècia, l' Êlp ed Sucîş e la Séma Belfiōr.
Int al peréiod ed l'istê, al pió grôs arciâm l'é fât da i lêgh ceretân, un gróp ed lêgh 'd urégin giasèint més aşvèin a la stasiòun turéstica Cerēto Lêgh, Quâter lêgh i pió céch Lêgh Gôri, e Lêgh Scûr, al Lêgh Prânda e al Lêgh Ceretân (o dal Cerēto) còst l' é al pió cgnusû dât ch' a 's câta ed frûnt a la Piâsa e al Pèsti ed Cerēto Lêgh.
Al Lêgh Prânda invēci l' é al pió lêregh, é fâcil rivêregh, pôch minût, da la strêda pruvincêla SP58 e dòunca da Cerēto Lêgh. L'é dèinter aun bôsch fés ed fâza, al gh' à di prê lêregh ch' a permèten a i sō vişitadōr d' arsorêres cun al scampagnêdi, in gèner l'é frequentê da di pescadōr ed trôti e lós
Distânsi e colegamèint
| Localitê | Km | h\min |
|---|---|---|
| Culâgna | 13 | 0.20 |
| Fivisân | 21 | 0.20 |
| Castelnōv di Mûnt | 33 | 0.35 |
| Aóla | 38 | 0.35 |
| Rèz | 74 | 1.20 |
| Carêra | 72 | 1.20 |
| La Spèsia | 61 | 1.00 |
I casē ed l'autostrêda pió aşvèin în quî 'd Aóla ed l' A15 Pèrma-La Spèsia e Rèz ed l' A1 Milân-Bològna. Al stasiòun di trēno pió aşvèin în còli ed Fivisân-Rumèta (a 30 km) ed la ferovéia Lóca-Aóla e Aóla Lunigiâna ed la lénia Pontremolèişa. I campovōlo in a Pèrma, Bològna, e Pisa
Dal j êtri fotograféi
-
Pésta insém al Mûnt La Nûda 1.894 mt. -
Vésta dal j Êlpi dal pésti ed Cerēto Lêgh -
Vésta insém a la Séma dal Mûnt La Nûda. -
Vista Lago del Cerreto durante il periodo estivo -
Vista sul Lago Pranda durante il periodo tardo primaverile
Colegamèin d'ed fōra
Sît ed la Socête ed j Impiânt Sît dal Palâs dal Giâs
Nôti
Nôta: cla pâgina ché l'é stêda inviêda cun 'na tradusiòun da Cerreto Laghi trâta da it.wikipedia.org.
Guêrda la stôria ed la pâgina uriginêla per cgnòser l'elèinch 'd j autōr.