Carroll Baker

Da Wikipedia.
Jump to navigation Jump to search
C'l artìcul chè 'l è scrit in Miranduléś Emiliàn
La Carroll Baker tòlta śò in dal 1967


La Karolina Piekarski, cgnusùda méj c'n al nóm 'd art ad Carroll Baker (Johnstown, 28 ad Maǵ dal 1931) l'è n'atōra americàna candidàda a i Prèmi Òscar dal 1957 cuma atōra prutagunìsta par la pelìcula Baby Doll - La bambola viva 'd Elia Kazan ch'la gh'à anc fat vìns'r un Golden Globe.

Famóśa p'r avér girâ dimóndi film anc in Itàglia, da 'l 1960 la gh'à na stéla in dla Walk of Fame. La Baker l'à scrit tri lìbar.

Biugrafìa

Dòp avér fat dla reclàm e la pin-up a 'l inìsi dla sò caréra, in di an Siquànta la s adàta a far la balarìna in un night club ad New York par psēr studiàr a 'l Actors Studio. In chi an lè la sa spóśa par la secónda vòlta c'n al regìsta Jack Garfein ch'al gh dà dū fiōi: la Blanche e Herschel.

A 'l cìnema la taca a far-as cgnós'r in dal 1955 faghénd Il gigante. 'L an dòp la gira Baby Doll - La bambola viva 'd Elia Kazan ch'al gh fruta na nomination a i Prèmi Òscar, foravìa i sò rapòrt cun la Warner Bros. i s ruìnan p'r al fat ch'i prudutōr i gh śibìvan sèmpar dal parti ch'a lē i n gh piaśìvan briśa.

A la mità di an Ssanta la s trasferìs in Itàglia par giràr L'harem par Marco Ferrei e soquànti atri pelìculi par Romolo Guerrieri (Il dolce corpo di Deborah) e specialmènt p'r Umberto Lenzi ch'al gh fà far, da 'l 1969 a 'l 1970, tri śai eròtic sufisticâ 'd fila cuma Orgasmo, Così dolce... così perversa e Paranoia. C'n al regìsta tuscàṅ la lavóra anc in dal 1972 faghénd al thriller Il coltello di ghiaccio.

In séguit la càmbia da spés paéś andànd a vìv'r in Spaggna, in Germàgna, in Inghiltèra e in Mèsic par pò turnàr in di an Utànta in di Stat Unî in du la spóśa 'l atōr Donald Burton. In Ironweed, prim film americàṅ 'd Héctor Babenco (1987), la lavóra insém a la Meryl Streep e a Jack Nicholson. In dal 1997 la gira la sò ultma pelìcula internasiunàla cun The Game - Nessuna regola ad David Fincher.

Filmugrafìa

La Baker in dal 1964

Culegamènt estéran

Àtar prugèt