Belli e dannati

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg My Own Private Idaho
Belli e dannati
Belli e dannati.png
River Phoenix e Keanu Reeves in na figùra dal film
Bèi e maladî
1991
Regia: Gus Van Sant
Scritùr: William Shakespeare • Gus Van Sant
Atùr: Keanu ReevesRiver PhoenixJames Russo
William RichertRodney HarveyChiara CaselliFlea
Michael ParkerJessie ThomasMassimo Di Cataldo
Müsica: River Phoenix • Bill Stafford
Lengua: Ingléś
Dürä dal film: 102 minüt
Nasiòṅ: Stat Unî


«
Gl'àngil i èṅ in cēl, in na calda giurnàda ad sōl in d'l Idaho.»
(Tagline dal film)


Belli e dannati (Bèi e maladî) 'l è 'n film dramàtic americàṅ dal 1991 ad Gus Van Sant ch'l è stâ preśentâ a 'l 48śum Fèstival ad Cannes in dua River Phoenix 'l à vins la Cópa Volpi p'r al mijór atōr.

Al film, ch'l à fat sù siē migliòṅ e quàt'r ad dòlar esénd-an custâ dū e mèś, l'è na libra interpretasiòṅ d'l Enrico IV ad William Shakespeare.

Sunt

Mike Waters (River Phoenix) e Scott Favor (Keanu Reeves) i èṅ dū tòsic śōv'n ad Seattle. Par far sù di bèsi par pagàr-as la dròga, i s prustituìsan c'n al dóni ma anc c'n i óm. Mike 'l è fnòć bandunâ da pìcul e dal vòlti al s durmènsa tut 'd un trat sénsa psēr-ag far gnint. Scott invéci 'l è 'l fiōl arvèrs dal sìndic ad Portland e al gh cata gust a mét'r in imbaràs sò pàdar faghénd la vita ch'al fà. I dū i s fànan di amìg in d'l ambînt dla prustitusiòṅ, davśinànd-'s a di àtar drugâ dla sità c'n a cap Bob Pigeon (William Richert), al pàdar spirituàł ad Scott.

Un dè Mike al decìd 'd andàr a catàr sò màdar e sò fradèl Richard (James Russo) in d'l Idaho e Scott al và sèg in mòta. Durànt al viàś Mike al gh cunfésa 'd ès'r inamurâ 'd lò ma c'l àtar al n gh dà spransa parchè a lò i gh piàś'n al dóni e al gh'à intensiòṅ prèst ad far-as na famìja e ad mulàr la vita par strada. Richard al diś a Mike che sò màdar la lavóra in 'n hutèl ma quànd lò al và là al vèṅ a savēr ch'l'è partìda par l'Itàglia. I dū i decìd'n acsè 'd andàr a pascàr-la a Róma. Chè Scott al cgnós la Carmela (Chiara Caselli) ch'la dvènta la sò muróśa e pò la và sèg a Portland. Mike invéci 'l armàgn in du 'l è par pascàr sò màdar cuntinuànd anc la sò vita fata ad dròga, ad vajòṅ e ad prustitusiòṅ.

Culegamènt estéran