America oggi

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg Short Cuts
America oggi
America oggi.png
Matthew Modine in na figùra dal film
Amèrica incō
1993
Regia: Robert Altman
Scritùr: Raymond Caruer • Robert Altman
Frank Barhydt
Atùr: Andie MacDowellMatthew Modine
Tim RobbinsJack LemmonJulianne Moore
Frances McDormandLili TaylorChris Penn
Jennifer Jason LeighRobert Downey Jr.
Peter GallagherAnne ArcherFred Ward
Bruce DavisonTom WaitsMadeleine Stowe
Lori SingerZane CassidyCharles Rocket
Müsica: Johann Sebastian BachGavin Friday
Antonín DvorákVictor HerbertMark Isham
Doc PomusIgor Stravinsky
Lengua: Ingléś
Dürä dal film: 187 minüt
Nasiòṅ: Stat Unî


«
Da dū mìst'r americàṅ a riva 'n film ch'a n gh 'n è mia ad cumpàgn.»
(Tagline dal film)


America oggi (Amèrica incō) 'l è 'n film dramàtic dal 1993 ad Robert Altman ch'l à purtâ a cà al Lèòṅ 'd òr p'r al film più bèl a la 50śma edisiòṅ dal Fèstival ad Venèsia. Al sugèt dal film al tōś ispirasiòṅ da nóṿ racònt difarènt e na pueśìa ad Raymond Carver.

'L à muciâ sù da piò ad siē migliòṅ ad dòlar.

Sunt

In dla sità ad Los Angeles i s incróś'n al viti ad soquànt persunàǵ. Al dutōr Ralph Wyman (Matthew Modine) e sò mujér e pitōra Marian (Julianne Moore), durànt un cunsèrt ad viulunsèl dla Zoe Trainer (Lori Singer), i cgnósan na còpia ad spōś, Stuart Kane (Fred Ward) e la Claire (Anne Archer), e i gh śibìs'n ad pasàr na Dméndga a séna da lōr. La surèla dla Marian, la Sherri Shepard (Madeleine Stowe), l'è la mujér 'd un pulisiòt ad nóm Gene (Tim Robbins) ch'al n s cumpatìs minga i caṅ e ch'al gh fà sèmp'r i còran invintànd-as pò da tut par quaciàr i sò tradimènt cun la Betty Weathers (Frances McDormand). Chi lē l'è drē a divursiàr da 'n pilòta 'd elicòtar, Stormy (Peter Gallagher), ch'in chi dè lè 'l è impgnâ, insém a di sò culéga, a stramnàr p'r i cēi dla Califòrgna dal vlèṅ par cumbàtar la mósca dla fruta.

La camaréra Doreen Piggot (Lily Tomlin) l'è spuśàda c'n al guidadōr ad limousine Earl (Tom Waits) che da spés 'l è imbariàg. Howard Finnigan (Bruce Davison), fiōl ad Paul (Jack Lemmon) ch'al s è śluntanâ da lò da dimóndi an, al fà 'l cumentadōr televiśìṿ e al viṿ insém a sò mujér Ann (Andie MacDowell) e a la sò famìja darènt a la Zoe e a sò màdar Tess Trainer (Annie Ross) ch'la fà la cantànta 'd cabaret. A pulìr-ag la pisìna a gh pènsa Jerry Kaiser (Chris Penn) méntar la sò dóna, la Lois (Jennifer Jason Leigh), la cata sù quèl laurànd da cà faghénd la spurcaciòna a 'l telèfun par na ligna eròtica e tgnénd a drē a i putèṅ. Chi lōr dū i èṅ amìg dla fiōla dla Doreen, l’Honey (Lili Taylor), e ad sò marè Bill Bush (Robert Downey, Jr.) ch'al fà 'l trucadōr p'r al mónd dal cìnema e ch'al n gh cata briśa gust a gusàr-la se prima al n la truca minga da śómbi.

Un dè la Doreen la mét sóta al putèṅ pìcul 'd Howard, Casey (Zane Cassidy), ma chi lò al n in vōl savér 'd èsar purtâ a 'l uśdàł ma acsè al finìs in còma. In cal méntar a vèṅ catâ 'l cadàvar dna dóna andgàda in un fiùm ma a n gh in fréga gnint a ninsòṅ e tut i cuntìnuan a 'ndàr a pés cuma s'a n fus sucès gnint. Sōl la Claire, ch'la s dà da far in dal tèmp lìbar p'r i putèṅ miténd-'s adòs di vistî da pajàs par far-i rìdar, la decìd pò 'd andàr a 'l sò funeràl. La Zoe, ch'la gh'à sèmp'r abû 'n rapòrt difìcil cun sò màdar, quànd la vèṅ a savér dla daśgràsia ch'l à patî al pòvar Casey, la s masa c'n i gas ad scàrag dla màchina.

Culegamènt estéran