M*A*S*H

Da Wikipedia.

C'l artìcul chè 'l è scrit in Miranduléś Emiliàn

M*A*S*H

Elliott Gould in na figùra dal film
id.
1970
Regìa: Robert Altman
Scritōr: Richard Hooker • Laura Kerr
Ring Lardner Jr. • Allen Rivkin
Atōr: Donald SutherlandSally Kellerman
Elliott GouldRobert DuvallRoger Bowen
Tom SkerrittDavid ArkinRene Auberjonois
Bobby TroupMichael MurphyJo Ann Pflug
Müsica: Johnny Mandel
Léngua: Ingléś
Dürä dal film: 116 minüt
Nasiōṅ: Stat Unî


«
M•A•S•H al s in F•R•É•G•A»
(Tagline dal film)


M*A*S*H (id.) l'è na cumèdia dal 1970 ad Robert Altman. L'è custàda tri migliòṅ ad dòlar a 'l incìrca ma la 'n à pò purtâ a cà da piò 'd utànt'òṅ. La pelìcula l'è trata da 'n rumànś ad Richard Hooker ch'l à dâ vita anc a na série televiśìva ad sucès, traśmìsa da 'l 1972 a 'l 1983. Par la prima vòlta, in un film minga vietâ a qvéi ad sóta di daśdòt an, a s sènt dir «Ma và a dar via 'l cûl» da John Schuck durànt na partìda ad football americàṅ.

Al film 'l è stâ numinâ par sinc Prèmi Òscar, vinsénd qvél par la senegiadùra minga uriginàla, e a soquànt Golden Globe. Inóltar 'l à vins la Palma 'd òr a 'l 23śum Fèstival ad Cannes.

In dal 1996 i americàṅ i aṅ decìś ad tgnìr-al dacàt in dla bibliutéca dal cungrès di Stat Unî.

Al tìtul al fà riferimènt a 'l acrònim druâ p'r indicàr al grup mòbil chirùrgic d'l eśèrcit di Stat Unî, Mobile Army Surgical Hospital (Uśdàl Militàr Chirùrgic da Camp), in pē in fiṅ a 'l 2006 in soquànt pòst ad guèra cuma Algerìa, Ìndia, Birmàgna, Curèa, Vietnam e Iraq.

Sunt

Durànt la guèra ad Curèa, in di an Sinquànta, in 'n uśdàl americàṅ da camp, dū dutōr, al capitàṅ Benjamin Franklin (Donald Sutherland), dit "Falc", e al capitàṅ Augustus Bedford Forrest (Tom Skerritt), dit "Duke" i n s cupatìsan briśa ad far sèmpar qvél ch'i gh dìśan. Piutòst i vrév'n invéci rispónd'r-ag séc, far di schèrs e dal batùdi e pasàr-'s al tèmp andànd a lèt cun gl'infarméri.

Ad sòlit al sò vitmi i èṅ sèmp'r al magiōr rivâ da pôc e la cap infarméra.

Culegamènt estéran