Pink

Da Wikipedia.

C'l artìcul chè 'l è scrit in Miranduléś Emiliàn


«
I don't know if i can yell any louder, how many times have i kicked you outer here? Or said something insulting? I can be so mean when I wanna be, I am capable of realy anything, I could cut you into pieces but my heart is broken. Please don't leave me.»
(EN)(Please don't leave me, 2008)
«
A n sò minga s'a pòs sigàr più fòrt, quànti vòlti t ò-j-a butâ fóra da 'd chè? O t ò-j-a dit di quèi d'uféndar? A sòṅ bòna ad far incòsa, a prév tajàr-'t a féti ma 'l mè cōr 'l è dastrùt. Par piaśér minga mulàr-um.»
(MUD)


La Alecia Beth Moore, in art Pink, dal vòlti scrit P!nk (Doylestown, 8 ad Setémbar dal 1979), l'è na cantànta e atóra americàna.

La P!nk tòlta śò in dal 2006

In dal córs dla sò caréra l'à muciâ sù dimóndi sucès in tut al mónd, vindénd da piò ad quarànta migliòṅ 'd àlbum e ssanta-sinc migliòṅ ad sìngui, dvintànd anc una dal vóś più grintóśi e puténti dal mónd muśicàl mundiàl di an Dumìla. La gh'à abû anc dimóndi arcgnusimènt, cuma 5 MTV Video Music Awards e 2 Grammy Awards.

Par la Billboard, la Pink la s è misa a 'l 13śum pòst dla lista di artìsta di prim déś an dal Dumìla e a 'l prim pòst in quéla dal canti pop, sèmp'r ad chi an lè. Dū di sò àlbum i aṅ tucâ la sima dla clasìfica in di Stat Unî, Europa, Giapòṅ e Austràglia.

Una dal sò cansòṅ più cgnusùdi, So What, 'l è òṅ di sìngui più dascargâ da la réda ad tut i tèmp (12śum pòst).

Biugrafìa

Da putìna Alecia la patìs la separasiòṅ di sò genitōr quànd la gh'iva sèt an e la taca a drugàr-as a tréd'ś an in fiṅ a 'l 1995. Da śóvna la fà la camaréra par Pizza Hut, McDonald's e in na stasiòṅ ad servìsi. In cal mèntar la taca anc a cantàr in soquànt grup cuma i Middleground e i Choice.

In dal 1998 la firma al sò prim sìngul da par lē, sóta 'l nóm 'd art ad Pink (Róśa). Al tìtul 'l è Gonna Make Ya Move (Don't Stop), na canta house/trance ch'l'armàn in dla top 200 dal Régn Unî par na stmana.

2000-01: Can't Take Me Home

La Pink la taca dabòṅ la sò caréra cuma cantànta R&B cun al sò prim disc Can't Take Me Home, publicâ al 4 'd Avrìl dal 2000. Dū di sò sìngui (al disc 'd òr There You Go e Most Girls) i finìsan in di prim déś pòst in clasìfica e i gh daṅ un cuć deciśìṿ. Un tèrs sìngul (You Make Me Sick) a véd la luś a la fiṅ dal 2000, dvintànd na hit a 'l inìsi dal 2001, anc p'r al fat 'd èsar stâ sarnî par la culòna sunóra dal film Save the Last Dance.

La Pink la vèṅ acsè numinàda a i MTV Video Music Award cuma mijóra artìsta a 'l debut. In dla Primavéra dal 2001, la Pink la canta insém a Lil'Kim, Mya e Christina Aguilera la cover ad Patti LaBelle Lady Marmalade (druàda in dal film Moulin Rouge) vinsénd un Grammy Award.

2001-02: M!ssundaztood

Stufa 'd èsar vindùda cuma 'n prudót dal marketing muśicàl, Alecia Moore la taca a scrìvar dal cansòṅ più sêri, cambiànd diresiòṅ a 'l sòṅ dal sò secónd àlbum. La dmanda ajùt a la Linda Perry di 4 Non Blondes e insém i scrìvan dimóndi di pès dal disc M!ssundaztood, gnû fóra al 20 ad Nuvémbar dal 2001. Al prim sìngul a védar la luś 'l è Get the Party Started ch'al finìs spidî in di prim 5 pòst dla clasìfica americàna. Anc i àtar sìngui sarnî (Don't Let Me Get Me e Family Portrait) i èṅ di sucès mundiài, ma specialmènt Just Like a Pill al 'l è, anc parchè al parmét a la P!nk ad cgnósar al prim pòst in dal clasìfichi ingléśi in dal Setémbar dal 2001.

M!ssundaztood 'l è stâ al secónd disc più vindû in UK in dal 2002, e muciànd sù 5 migliòṅ ad còpi in di Stat Unî e 12 migliòṅ in tut al mónd.

2003-05: Try This

La P!nk la s fà 'n bicér

Al tèrs disc dla Pink, Try This, al vèṅ publicâ 'l 11 ad Nuvémbar dal 2003, cun òt pès su trédas scrit par Tim Armstrong di Rancid. 'L àlbum al gh la cava a piasàr-as in dla Top 10 in U.S.A., Cànada, UK e Austràglia ma i sìngui invéci i n vaṅ minga acsè bèṅ. A s trada ad Trouble, God Is a DJ e Last to Know. Gnanc dū àtar sìngui śuntâ in séguit (Catch Me While I'm Sleeping e Humble Neighborhoods) i càmbian al ròbi. Un po' méj al braṅ Feel Good Time druâ in dal film Charlie's Angels - Più che mai dal 2003.

2006-07: I'm Not Dead

In d'l Avrìl dal 2006 la Pink la fà catàr in dal butéghi, turnànd a la vècia cà discugràfica LaFace, 'l àlbum I'm Not Dead (A n sòṅ minga mòrta) e l'è pròpria acsè parchè al lavōr al vénd bèṅ (6 migliòṅ e mèś ad còpi) e al gh'à dèntar soquànt di braṅ più famóś dla cantànta dla Pensilvàgna cuma Stupid Girls (nùmar trédas dla Billboard Hot 100 e sètim in Itâglia), Dear Mr. President (na létra vèrta a 'l presidènt americàṅ 'd alóra George W. Bush e lè lē la gh và śò péśa), al lènt in ciàv rock Who Knew (nùmar òṅ in dla Repùblica Céca) e Nobody Knows.

«
Dear Mr. President, come take a walk with me, let's pretend we're just two people and you're not better than me, I'd like to ask you some questions if we can speak honestly. What do you feel when you see all the homeless on the street? Who do you pray for at night before you go to sleep? What do you feel when you look in the mirror? Are you proud? How do you sleep while the rest of us cry? How do you dream when a mother has no chance to say goodbye? How do you walk with your head held high? Can you even look me in the eye and tell me why?»
(EN)(Dear Mr. President, 2006)
«
Câr al mè Presidènt al végna a far dū pas mèg, féma finta 'd èsar dū parsòni nurmàli e che vò a siv méj ad mè, a m piaśrév dmandàr-uv soquànti ròbi s'a psém dascórar sćèt. Cuma v sintìv vò quànd a vdiv tut chi sénsa cà p'r al stradi? La nòt, prima 'd andàr a durmìr, a chi fav al vòstri préghi? Cuśa sintìv vò quànd a v guardàv a 'l spèć? V sintìv argujóś? Cuma fav a durmìr mént'r al rèst ad nuàtar al piànś? Cuma fav vò a sugnàr quànd na màdar la n pōl dir gnint àtar che "adìo"? Cuma fav a giràr cun la tèsta in élt? Siv bòṅ a guardàr-'m in di òć dgénd-'m al parchè?»
(MUD)

2008-10: Funhouse

Pink durànt un cuncèrt lundinéś segrét dal 2008

Al quìnt disc ad Pink al gh'à al tìtul ad Funhouse e 'l è d'l Utóbar dal 2008. Cuciâ in élt da di sìngui ad sucès cuma So What (prim pòst in USA e UK), Sober, Please Don't Leave Me e Bad Influence, 'l àlbum al vénd siē migliòṅ ad còpi.

In di negòsi a s pōl anc catàr na versiòṅ dal disc cun dèntar un dvd cun un cuncèrt dal viṿ.

In dal Nuvémbar dal 2010 a vèṅ fóra la racòlta Greatest Hits... So Far!!! cun dèntar quàtar braṅ inèdit: Raise Your Glass, Fuckin' Perfect, Heartbreak Down e Whataya Want from Me (qvést chè però sōl p'r i marcâ austragliàṅ e tedésc).

La sò caréra in dal cìnema

La Pink la gh'à abû anc tri part da atóra a 'l cìnema:

  • "Rollerball" (al remake dal 2002);
  • "Charlie's Angels: più che mai" (in du la canta anc al braṅ "Feel Good Time");
  • "Catacombs" (un film ad scarésa dal 2007 in du lē la fà la Carolyn).

Vita privàda

La Pink l'è spuśàda da 'l 7 ad Śnar dal 2006 cun al curidōr ad mòti Carey Hart. Dòpa na separasiòṅ 'd 'n an, la cantànta e al spurtìṿ i èṅ turnâ incóra insém e al 3 ad Śugn dal 2011 i aṅ dâ a la luś la pìcula Willow Sage Hart.

Discugrafìa

Àlbum

  • 1999 - Can't Take Me Home
  • 2001 - M!ssundaztood
  • 2003 - Try This
  • 2006 - I'm Not Dead
  • 2008 - Funhouse
  • 2012 - The Truth About Love
  • 2017 - Beautiful Trauma
  • 2019 - Hurts 2B Human
  • 2023 - Trustfall

Live

  • 2009 - Funhouse Tour: Live in Australia

Racòlti

  • 2010 - Greatest Hits... So Far!!!

Videugrafìa

  • P!nk: Live in Europe
  • P!nk: Live from Wembley Arena
  • P!nk: Live in Australia
  • Greatest Hits... So Far!!!

Ligàm ad fóra