Monica Seles

Da Wikipedia.
C'l artìcul chè 'l è scrit in Miranduléś Emiliàn
Monica Seles al servìsi


Monica Seles (Monika Seleš in jugoślàv, Mónika Szeles in ungheréś) l'è stada na tenìsta americàna, nada in Jugoslavia a Novi Sad, sità śmèla ad Mòdna, al 2 ad Dicémbar dal 1973. L'è dvintàda americàna in dal 1994 e dal 2007 l'è anc na sitadìna ungheréśa.

In dla sò caréra l'è stada la nùmero òṅ in dla clasìfica WTA par 178 stmani e l'à vins 53 tìtui in dal singulàr, 9 ad quéi dal Grand Slam e 6 in dal dòpi.

Biugrafìa

Monica Seles la taca a śugàr a tennis a siē an e a nóṿ an la vins al sò prim turnéo. In dal 1985 la vins un turnéo a Miami e la vèṅ duciàda par 'l alenadór Nick Bollettieri ch'al la cunvìns a stablìr-as in di Stat Unî insém a la sò famìja p'r iscrivàr-'s a la sò acadèmmia ad tènis a Bradenton, in Florida.

Monica la dróa la rachéta sèmpar a du maṅ, anc s'l'è mansìna, e la gh la cava sèmpar a far andàr fòrt la bucìna da tut al bandi faghénd sèmpar di sîg quand la la culpìs.

1988-1992

La fà al sò debùt in dal sircùit in dal Mars dal 1988 in dal turnéo ad Boca Raton e la dvénta na prufesiunìsta al 13 ad Favràr dal 1989. In Maǵ la vins al sò prim tìtul dal WTA a Houston baténd in finàl Chris Evert par 3-6, 6-1, 6-4. Al méś dòp la riva in semifinàl al Roland Garros pardénd còntra la nùmero òṅ Steffi Graf. La finìs 'l an al sèst pòst in clasìfica.

In dal 1990 Monica Seles la dvènta a 16 an e 6 méś, la più śóvna ad sèmpar a vìnsar al Roland Garros in finàl còntra Steffi Graf. A la fiṅ d'l an la vins anc al Virginia Slims Championships baténd Gabriela Sabatini in sinc sèt in dla finàla e la dvènta la nùmero 2 in clasìfica, vinsénd 9 turnéo in dla stagiòṅ.

In dal 1991 Monica la taca la stagiòṅ a la granda: la vins 'l Australian Open còntra Jana Novotna e pò àtar du tìtui in Mars (quand la dvénta la nùmero òṅ al pòst ad Steffi Graf dòp quàt'r an) e in Avrìl. La vins incóra a Parìś in finàl còntra la spagnóla Arantxa Sánchez Vicario ma la salta Wimbledon par na periustìt e la Graf la gh tóś al prim pòst. La Seles la salta siē stmani e la tórna a śugàr a 'l US Open e la'l vins còntra Martina Navrátilová e la tórna in sima a la clasìfica.

In dal 1992 Monica la vins àtar 10 tìtui WTA (tri dal Grand Slam, in Austràglia còntra Mary Joe Fernández, in Francia còntra Steffi Graf in tri sèt e in di Stat Unî còntra Arantxa Sánchez Vicario). La pèrd la finàl ad Wimbledon còntra Steffi Graf ma la vins a Tokyo, a Oakland e al Virginia Slims Championships baténd Martina Navrátilová cuma l'iva fat anc 'l an prima.

La taca bèṅ anc al 1993 vinsénd par la tèrsa vòlta in Austràglia (incóra còntra Steffi Graf) e a Chicago. Fiṅ lè, in dal perìud fra 'l Śnar 1991 e 'l Favràr 1993, Monica Seles l'à vins 22 tìtui WTA andànd in finàl 33 vòlti su 34 turnéo disputâ vinsénd al 93% dal vòlti (159 gari vinsi e 12 pardùdi). In di turnéo dal Grand Slam la và incóra méj, cun 55 gari vinsi su 56.

1993-2003: agresiòṅ e ritóran

Al 30 'd Avrìl dal 1993 a sucèd quèl mai vist: durànt al turnéo 'd Ambùrg, mèntar la Seles l'è drē a punsàr durànt 'l incòntar còntra Magdalena Maleeva, la ciàpa na curtlàda a la schina par Günther Parche, un fan sfegatâ ad Steffi Graf. Monica la patìs un shock treménd in dla mènt e l'è custréta a lasàr al tènis par piò ad du an, pardénd la sò puśisiòṅ ad nùmero òṅ.

Purtròp Günther Parche la gh 'l à fata a far andàr al ròbi cuma al vliva: dòp al ritir dla Seles, la Graf la tórna ad èsar la nùmero òṅ e a vìnsar di turnéo dal Grand Slam a tut andàr.

Monica Seles la tórna a śugàr sól in d'l Agóst dal 1995 e la vins al Canadian Open ad Turònt mèntar la pèrd la cumbatùda finàl di US Open par maṅ ad Steffi Graf. In dal 1996 la vins al sò ùltim tìtul dal Gran Slam, gl'Australian Open.

In di an sucesìṿ la vins incóra soquànt turnéo (Råmma in dal 2000 còntra Amélie Mauresmo, par dir-'n una) e la sa stablìs fisa in dal primi déśi śugadóri in dla clasìfica WTA ma la n tórna più a i livèi ad prima, anc par via ad 'n infurtùni al pē sinìstar.

La s ritìra definitivamènt a 34 an, dòp avér vins anc 3 vòlti la Federation Cup cun i Stat Unî e na mdaja ad brónś a gl'Ulimpiàdi ad Sydney in dal 2000, baténd Jelena Dokić cun al puntéǵ ad 6-1, 6-4.

Finàli in di Gran Slam

Monica Seles durànt n'intervìsta
Turnéo An Vins/Pardû Aversàri in finàl Puntéǵ
Roland Garros 1990 V Steffi Graf 7–6(6), 6–4
Australian Open 1991 V Jana Novotná 5–7, 6–3, 6–1
Roland Garros 1991 V Arantxa Sánchez Vicario 6–3, 6–4
US Open 1991 V Martina Navrátilová 7–6(1), 6–1
Australian Open 1992 V Mary Joe Fernández 6–2, 6–3
Roland Garros 1992 V Steffi Graf 6–2, 3–6, 10–8
Wimbledon 1992 P Steffi Graf 6–2, 6–1
US Open 1992 V Arantxa Sánchez Vicario 6–3, 6–3
Australian Open 1993 V Steffi Graf 4–6, 6–3, 6–2
US Open 1995 P Steffi Graf 7–6(6), 0–6, 6–3
Australian Open 1996 V Anke Huber 6–4, 6–1
US Open 1996 P Steffi Graf 7–5, 6–4
Roland Garros 1998 P Arantxa Sánchez Vicario 7–6(5), 0–6, 6–2