La notte dei morti viventi (film 1968)

Da Wikipedia.

C'l artìcul chè 'l è scrit in Miranduléś Emiliàn

Night of the Living Dead
La notte dei morti viventi

Na figùra dal film
La nòt di mòrt viṿ
1968
Regìa: George A. Romero
Scritōr: John A. Russo • George A. Romero
Atōr: Duane JonesJudith O'DeaKeith Wayne
Marilyn EastmanKarl HardmanJudith Ridley
Kyra SchonCharles CraigS. William Hinzman
George KosanaFrank DoakBill Cardille
Müsica: Karl Hardman
Marilyn Eastman • George A. Romero
Léngua: Ingléś
Dürä dal film: 96 minüt
Nasiōṅ: Stat Unî


«
S'al n t spavénta briśa, at sē bèla mòrt!»
(Tagline dal film)


Al film La notte dei morti viventi in léngua ingléśa

La notte dei morti viventi (La nòt di mòrt viṿ) 'l è 'n film ad scarésa dal 1968, girâ in biànc e négar, ad George A. Romero, prim capìtul dla saga di mòrt viṿ ch'la cuntìnua cun Zombi (1978), Il giorno degli zombi (1985), La terra dei morti viventi (2005), Le cronache dei morti viventi (2007) e Survival of the Dead - L'isola dei sopravvissuti (2009). Al gh'à abû anc dū afracimènt, al prim in dal 1990 p'r òpra ad Tom Savini, al secónd in dal 2006 girâ in 3D par Jeff Broadstreet.

Custâ sèntquatórdas-mila dòlar, al 'n à pò fat sù quarànta-dū migliòṅ.

Sunt

In un pòst ad campàggna dla Pennsylvania, la Barbara (Judith O'Dea) e sò fradèl Johnny (Russell Streiner) i vaṅ a catàr a 'l simitèri la tómba ad sò pàdar quànd, tut 'd un trat, 'n óm ch'al gira piàṅ e daśgrasiâ ch'al pâr 'n imbariagòs al gh salta adòs masànd al śóvan. Sò surèla la gh la cava a scapàr via e a lugàr-as in na cà lè davśèṅ in dua la cata al cadàvar mars dla pardòna 'd cà. Al telèfun 'l è dastacâ e al n và minga.

Par sò furtùna a riva lè Ben (Duane Jones) ch'al s inśégna par difénd'r-as da di perunàǵ dimóndi strân ch'i èṅ drē a muciàr-as lè 'd fóra, di mòrt viṿ ciamâ śómbi. Chi lōr i pàran ch'i fàgan di quèi sénsa pinsàr, i gh'aṅ sōl vója ad masàr e ad magnàr dla carna umàna. Par śmarìr-i a s pōl druàr dal fōg parchè lōr i gh 'n aṅ scarésa.

Da la cantìna i riv'n anc dū tisi ch'i 'l aṅ scampàda: Tom (Keith Wayne) e Harry (Karl Hardman). Chi lò al gh'à sèg sò mujér Helen (Marilyn Eastman) e sò fiōla pìcula, la Karen (Kyra Schon), frida ad òṅ ad qvi là.

Tom invéci 'l è insém a la sò muróśa Judy (Judith Ridley). Quànd a la fnèstra a s para lè un śómbi, Ben al gh tira tri sćiuptàdi in tèsta śbragand-'g-la. Ma i stus i arciàman lè tut chi àtar mòrt. La nòt l'è lunga.

Dirìt

La notte dei morti viventi 'l è dvintâ ad dumìni pùblic parchè la cà ch'la 'l à prudót in alóra, la Walter Reade Organization, la s éra daśmindgàda ad métar 'l avìś ad copyright in sla pelìcula, un quèl necesàri in dal 1968 par tgnir stric i dirìt. Al film al pōl èsar acsè dascargâ in manéra libra da di sit internet cuma Google Video e Internet Archive.

Culegamènt estéran